Արհամարհանք՝ լրատվամիջոցների նկատմամբ. «Փաստ»
«Փաստ» օրաթերթը գրում է.
Մարզահամերգային համալիրում կայացած՝ ՀՀ նախագահի երդմնակալության արարողությանը լրագրողները հնարավորություն ունեին հետևելու միայն Ազգային ժողովի շենքից:
Սկսած 1991 թվականից նման ոչ մի արարողության ժամանակ լրատվամիջոցների նկատմամբ նման սահմանափակում չի եղել:
Խոսքի ազատության պաշտպանության կոմիտեի նախագահ Աշոտ Մելիքյանի խոսքով՝ այս սահմանափակումն անսպասելի չէր:
«Այդ առումով այսօրվա իշխանությունների ընդհանուր քաղաքականությունը դեպի ավելի փակ ձևով աշխատելու ուղղությամբ է գնում: Վերոնշյալ սահմանափակումը նախորդ որոշումների տրամաբանական շարունակությունն է: Մյուս կողմից, իհարկե, որոշումն աննախադեպ էր. անկախացումից ի վեր այսպիսի մի դեպք չէր եղել, որ լրատվամիջոցները նախագահի երդմնակալության արարողությունը չլուսաբանեին հենց իրադարձության վայրից: Եվ սա, իհարկե, մեծ հաշվով լրատվամիջոցների աշխատանքի արհամարհում է: Այն փաստը, որ լրատվամիջոցների ղեկավարներին հրավիրել են այնտեղ, ամենևին էլ չի կարող հիմնավորում լինել լուսաբանող լրագրողներին ներս չթողնելու առումով: Լրատվամիջոցների ղեկավարներն այնտեղ էին որպես ղեկավար և ոչ թե որպես լուսաբանող լրագրող: Իհարկե, որևէ լրատվամիջոցի ղեկավար կարող է որոշել, որ ինքն է լուսաբանելու արարողությունը, բայց որպես կանոն ղեկավարներն այնտեղ ուղղակի ներկա են որպես հյուր և ոչ թե որպես լուսաբանող լրագրող: Եվ սա շատ տխուր է՝ իշխանությունը կարծես արհեստականորեն ջրբաժան է անցկացնում իր և լրատվամիջոցների միջև»,– «Փաստ»–ի հետ զրույցում ասաց Աշոտ Մելիքյանը:
Նշենք, որ օրեր առաջ «Լրագրողներ առանց սահմանների» կազմակերպությունը մտահոգություն է հայտնել Հայաստանում մամուլի ազատությունը սահմանափակող օրենսդրական փոփոխությունների առնչությամբ: Կազմակերպությունը շեշտել է, որ «մամուլի ազատության անկումը դադարեցնելը» պետք է Հայաստանի կառավարության հիմնական խնդիրը լինի. «Մենք մտահոգված ենք Հայաստանում մամուլի ազատության նվազման միտումով և կոչ ենք անում խորհրդարանին վերանայել վերջին օրենսդրական նախաձեռնությունները, որոնք սահմանափակում են տեղեկատվության մատչելիության իրավունքը և խոչընդոտում են լրագրողների աշխատանքը»: Կազմակերպության հայտարարության մեջ մասնավորապես ընդգծվել է մարտի 23–ին Ազգային ժողովի կողմից ընդունված օրենսդրական փոփոխությունը, ըստ որի ՀՀ կառավարության նիստերը դռնփակ են լինելու, իսկ ՀՀ կառավարության անդամները առանց վարչապետի թույլտվության չեն կարող հարցազրույց տալ լրագրողներին:
Աշոտ Մելիքյանը շեշտեց՝ համամիտ է կազմակերպության գնահատականի հետ: «Զարգացումներն ինֆորմացիոն ոլորտում ընթանում են այնպես, որ օրենքներում լրատվամիջոցների գործունեության առումով գնալով ավելի են շատանում սահմանափակումները: Այդ սահմանափակումները կան հատկապես պետական մարմինների գործունեությունը լուսաբանելու առումով: Սա, իհարկե, անդրադառնում է խոսքի ազատության, տեղեկատվության ազատության իրավիճակի վրա: Այս ամենը, բնականաբար, չի վրիպում միջազգային կազմակերպությունների աչքից, և այդ ամենն իրենք արտացոլում են իրենց գնահատականներում»,–ընդգծեց ԽԱՊԿ նախագահը:
Իսկ թե բացի գնահատականներից ինչ կարելի է սպասել, հատկապես, երբ Հայաստանը Եվրամիության հետ համապարփակ և ընդլայնված գործընկերության մասին համաձայնագիր է ստորագրել, Աշոտ Մելիքյանը նկատեց. «Կարծում եմ՝ միջազգային կառույցների, այդ թվում նաև Եվրամիության կողմից պետք է հետևողականություն ցուցաբերվի: Կան պարտավորություններ, որոնք նախատեսված են համաձայնագրում: Պետք է պահանջել, որ նաև այդ համաձայնագրի տառին և ոգուն համապատասխան գործողություններ լինեն թե՛ Եվրամիության, թե՛ Հայաստանի Հանրապետության կողմից: Երբ համաձայնագիրը ստորագրվում էր, մենք հույսեր էինք փայփայում, որ այն կնպաստի Հայաստանում ժողովրդավարության զարգացմանը, բայց, ցավոք, առայժմ հետընթացի, ռեգրեսիվ գործընթացների ենք ականատես լինում: Ճիշտ է, այդ համաձայնագիրը դեռ ուժի մեջ չի մտել, բայց նման փաստաթուղթ ստորագրելուց հետո պետությունն ինքը պետք է նախաձեռնի քայլեր, որոնք դեպի զարգացում կտանեն: Այն, ինչ որ մենք տեսնում ենք խոսքի ազատության և տեղեկատվության ազատության ոլորտում, առայժմ հակառակի մասին է վկայում»:
«Лакмусовая бумажка» для оппозиционного поля и избирателей: «Паст»
Только стыд и позор из-за властей: «Паст»
Освещения мероприятия блока «Армения» набрали около 15 миллионов просмотров: «Паст»
От Арцаха к Еревану: следующий этап азербайджанской экспансии
Фонд развития «Керон» и фонд «Музыка во имя будущего» сотрудничают во имя молодых талантов
Сюникцы обеспокоены: ситуацией вокруг Ирана могут воспользоваться враждебные силы, создавая риски че...
Наапетян: выборы превращаются в референдум — за «кандидата Азербайджана» или против
Кто такой Марио Науфал, которому дал интервью Нарек Карапетян? «Паст»
За два месяца девять лет восполнится? «Паст»
Угроза национальной идентичности армянского народа: «Паст»
