Արայիկ Պապիկյան. «Նոր վարչապետի դեպքում քաղբանտարկյալների ազատ արձակումը մեկ–երկու օրվա հարց է». «Փաստ»

«Փաստ» օրաթերթը գրում է.

Սերժ Սարգսյանի վարչապետության և ՀՀԿ–ի հետագա իշխանավորման դեմ պայքարի առաջին իսկ օրվանից բարձրացվում է նաև քաղբանտարկյալներին անհապաղ ազատելու հարցը: Ս. Սարգսյանի վարչապետության հարցն արդեն անցյալ է, երկրորդ նպատակը՝ ընթացքի մեջ:

Փաստաբան Արայիկ Պապիկյանի խոսքով՝ քաղբանտարկյալների անհապաղ ազատ արձակման հարցը պետք է լինի օրինականության սահմաններում:

«Մեր օրենսդրությունը այդ բոլոր մեխանիզմներն ունի: Սահմանադրությունը և Քրեական դատավարության օրենսգիրքը ամբողջ ծավալով պետք է կիրառվեն ՀՀ դատախազության կամ դատարանների կողմից: Իհարկե, անթույլատրելի կլինի, որ ուղղակի բացեն բանտախցի դուռն ու ասեն՝ տուն գնացե՛ք: Իսկ թե ե՞րբ կարող է տեղի ունենալ նրանց ազատ արձակումը, իրատես լինելով հանդերձ, հասկանում եմ, որ ՀՀԿ–ի, այսպես ասած, մնացորդները դա կամովի չեն իրականացնելու: Ես հույս ունեմ, որ մայիսի 1–ին կունենանք ժողովրդի կողմից ընտրված վարչապետ, ով հնարավորություն կունենա այս հարցով իր իրավասությունների սահմաններում իրավապահ համապատասխան մարմինների հետ աշխատանքներ տանել: Նոր վարչապետ ունենալու դեպքում, կարծում եմ, նրանց ազատ արձակումը մեկ–երկու օրվա հարց պետք է լինի»»,–«Փաստ»–ի հետ զրույցում ասաց փաստաբանը՝ հավելելով, որ Նիկոլ Փաշինյանն արդեն հայտարարել է, որ օր առաջ նրանք պետք է ազատ արձակվեն:

«Իսկ քանի որ հասարակությունը կասկած չունի, թե ով է լինելու նոր վարչապետը, այդ հիմքով, կարծում եմ, բոլորիս կողմից բարձրացված հարցը հավանաբար մայիսի առաջին օրերին լուծում կստանա»,–շեշտեց Ա. Պապիկյանը:

Փաստաբանը նշեց, որ հստակ տվյալներ չունի, թե Հայաստանում քանի քաղբանտարկյալ կա: Այդուհանդերձ, նա այդ համատեքստում թվարկեց մի շարք հայտնի գործեր. ««Շանթ Հարությունյան և ընկերներ»՝ ակնհայտ քաղաքական հետապնդում: Հայկ Կյուրեղյան: Հաջորդը Գևորգ Սաֆարյանի գործն է, որը ցինիզմ էր: Հետո՝ «Ժիրայր Սեֆիլյան և ընկերներ»՝ գործ` պատվիրված անձամբ Սերժ Սարգսյանի կողմից: Անդրիաս Ղուկասյան, Կարո Եղնուկյան: «Սասնա Ծռեր», որոնց անձնական վրեժխնդրության մասին Ս.Սարգսյանը հայտարարեց նախագահական նստավայրում: Մյուսն էլ Սամվել Բաբայանի գործն է: Այս գործերից յուրաքանչյուրի հետևում Սերժ Սարգսյանն է կանգնած: Կոնկրետ Ժիրայր Սեֆիլյանի դեպքը աղետ էր ամբողջ իրավապահ մարմինների համար: Բոլոր կառույցներն ավելի քան երկու տարի աշխատել են, և շատ փնթի ձևով սարքել են Ժիրայր Սեֆիլյանի գործն ու բերել դատարան: 10,5 տարվա պատիժ: Բառեր չեմ գտնում ասելու, թե ինչ է նշանակում քաղաքական պատվերով ընդդիմադիր գործչին մեկուսացնելու համար պետական ամբողջ ապարատի միջոցները վատնել: Ս. Սարգսյանը կարողացավ ժամանակավոր մեկուսացնել անձերի: Ժողովուրդը, սակայն, ցույց տվեց, որ թեև անձերին առանձին մեկուսացնելն ինչ–որ փուլի հաջողվեց ՀՀԿ–ին, բայց այլևս չի կարող հանդուրժել այդ իրավիճակը»:

Ինչ վերաբերում է անկախ դատական համակարգ ունենալու տեսլականին ու հնարավոր ճանապարհներին, փաստաբանը ընդգծեց. «Կարծում եմ՝այդ հարցի լուծման համար երկու ճանապարհ կա: Առաջինը իրավական ճանապարհն է: Այսինքն՝ անխուսափելիորեն մենք նոր Սահմանադրություն պետք է ընդունենք: Եթե դա չանենք, ապա հեղափոխությունը լիարժեք չի լինի: Նոր Սահմանադրությամբ պետք է սահմանվեն դատական իշխանության անկախության մեխանիզմները: Դատավորների առնվազն մի մասը և հատկապես քրեական գործեր քննող դատավորները մշտապես և ամենօրյա ռեժիմով կատարել են ՀՀԿ–ի, Ս. Սարգսյանի հրահանգներն ու ցուցումները: Անգամ եթե հրահանգ չեն կատարել, ապա այնպիսի դատական ակտեր են կայացրել, որ հաճոյանան իշխանությանը, ցույց տան, որ ծառայում են Ս. Սարգսյանին կամ նրա կառույցներին: Այդ մարդիկ ժամ առաջ պետք է սեփական կամքով իրենց լիազորությունները ցած դնեն: Ես դեմ եմ, որ կադրային ջարդ լինի, բայց եթե այդ մարդիկ իրենց կամքով լիազորությունները ցած չդնեն, ապա նոր իշխանությունը պետք է միջոցներ ձեռնարկի: Այն բոլոր դատավորները, դատախազներն ու քննիչները, ովքեր պատվիրված գործեր են արել, պետք է պատասխանատվության ենթարկվեն: Օրենքի երկիր պետք է կառուցվի: Բոլոր այն դատավորները, ովքեր հանցանքներ չեն գործել, սակայն պաշտոնի բերումով թերացել են իրենց պարտականություններում, օրինական ճանապարհով պետք է հեռացվեն զբաղեցրած պաշտոններից: Հավաստիացնում եմ, որ ավելի գրագետ ու ավելի նվիրյալ հարյուրավոր մարդիկ կան, ովքեր կարող են զբաղեցնել այդ պաշտոնները: Բայց հենց այս պահին այդ մարդիկ պետք է մտածեն պաշտոնից կամովի հրաժարվելու մասին՝ հասկանալով, որ ընդամենը ժամեր կամ մի քանի օր հետո իրենց պետք է հեռացնեն աշխատանքից»:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»