Հայկական բնապահպանական ճակատը դատարանում փոխել է հայցապահանջը. «Փաստ»

«Փաստ» օրաթերթը գրում է.

Ինչպես ավելի վաղ «Փաստ»–ը տեղեկացրել է, ՀՀ վարչական դատարանում տեղի կունենա Ամուլսարի ոսկու շահագործման ծրագրի վերաբերյալ Հայկական բնապահպանական ճակատի (ՀԲՃ) հայցն ընդդեմ ՀՀ արտակարգ իրավիճակների նախարարության, որն արդեն ընդունվել է վարույթ:

Վեճի պատճառն այն է, որ 2017 թ–ի աշնանը ՀԲՃ–ն ՀՀ վարչական դատարան հայց էր ներկայացրել ԱԻՆ–ի դեմ` Ամուլսարի ոսկեբեր քվարցիտների հանքավայրի արտադրական վտանգավոր օբյեկտների նախագծային փաստաթղթերի տեխնիկական անվտանգության փորձաքննության բոլոր եզրակացությունների պատճենները չտրամադրելու համար: Հայցապահանջի համաձայն ՀԲՃ–ն ԱԻՆ–ից չէր ստացել բացահանքերին, հանքավայրի դատարկ ապարների լցակույտին, նատրիումի ցիանիդի միջոցով կույտային տարրալվացման հարթակին և ոսկու կորզման ֆաբրիկայի մասին տեղեկություն, ինչն էլ դատական վեճի պատճառ էր հանդիսացել :

Բնապահպան Լևոն Գալստյանը «Փաստ»–ի հետ զրույցում նշել էր, որ իրենց հարցումը բավականին պարզ է եղել, ուստի զարմացել են, որ ԱԻՆ–ը մերժել է պատասխանը տրամադրել: Աշխարհագրագետի կարծիքով դրանք հանրության համար պետք է բաց դրված լինեին կայքում և իր կարծիքով իրենք պետք է հաղթեն դատական վեճը և ԱԻՆ–ը ոչ միայն կտրամադրի փաստաթղթերը, այլև հետագայում նմանատիպ փաստաթղթերը, որոնք վերաբերում են բոլորին՝ բաց ռեժիմով կհրապարակի:

«Ինձ թվում է, պետական համակարգում ընդհանրապես իներցիայի ուժն է աշխատում, որը եկել է սովետական ժամանակներից և մինչև հիմա չի փոխվել՝ որքան հնարավոր է խոչընդոտենք, փակ պահենք, քիչ տրամադրենք ինֆորմացիա: Ցավոք սրտի, այս նույն տրամաբանությունն է աշխատում ամբողջ պետական համակարգում», «Փաստ»–ի հետ զրույցում նշել էր բնապահպանը:

Լ. Գալստյանի կողմից բարձրացված հարցերի պատասխանը ստանալու համար «Փաստ»–ը դիմեց նաև պատասխանող կողմին ԱԻՆ–ի լրատվական ծառայություն, պարզելու, թե իրականում ինչու գերատեսչությունը չի տրամադրել պահանջվող փաստաթղթերը:

ՀՀ արտակարգ իրավիճակների նախարարությունից «Փաստ»–ին պատասխանեցին, որ չի հրաժարվել տրամադրել Հայկական բնապահպանական ճակատի հարցմանն առնչվող տեղեկատվությունը, իսկ պատասխան գրությունում մասնավորապես ասվում է. «ՀՀ Վայոց Ձորի մարզի Ամուլսարի ոսկեբեր քվարցիտների հանքավայրի ոսկու կորզման գործարան արտադրական վտանգավոր օբյեկտի նախագծային փաստաթղթերի փորձաքննությունն իրականացվել է «Գեոթիմ» ՓԲԸ–ի և «Տեխնիկական անվտանգության ազգային կենտրոն» ՊՈԱԿ–ի միջև կնքված պայմանագրի հիման վրա, որի համաձայն տրվել է դրական եզրակացություն:

Հաշվի առնելով, որ եզրակացությունը տրամադրվել է ծառայությունների մատուցման պայմանագրի հիման վրա, ուստի եզրակացության պատճենները կտրամադրվի «Գեոթիմ» ՓԲԸ–ի համաձայնության առկայության դեպքում»:

Բացի այդ, 7.03.2018 թ–ի նախնական դատական նիստի ընթացքում ՀՀ արտակարգ իրավիճակների նախարարությունը, ունենալով «Գեոթիմ» ՓԲԸ–ի համաձայնությունը, դատարանին և հայցվոր կողմին տրամադրել է հայցի առարկա հանդիսացող արտադրական վտանգավոր օբյեկտների նախագծային փաստաթղթերի տեխնիկական անվտանգության փորձաքննության եզրակացությունների պատճենները:

ԱԻՆ–ից «Փաստ»–ին տեղեկացրեցին նաև, որ համաձայն վարչական դատավարության օրենսգրքի 96–րդ հոդվածի այդ մասով վեճն ըստ էության սպառվել է և հայցը ենթակա է եղել կարճման:

«Սակայն հայցվորի ներկայացուցիչը դատարանին ներկայացրեց հայցի առարկայի փոփոխում՝ խնդրելով բացի փորձագիտական եզրակացության պատճեններից ՀՀ արտակարգ իրավիճակների նախարարությունից պահանջել տրամադրել նաև հանքի փորձագիտական եզրակացության համար հիմք հանդիսացած փաստաթղթերը: Դատարանը, ընդունելով ՀՀ արտակարգ իրավիճակների նախարարության միջնորդությունը, որպես երրորդ անձ գործի քննությանը ներգրավել է «Լիդիան Արմենիա» ՓԲ ընկերությանը, քանի որ վերջինս է տիրապետում նոր հայցադիմումի մեջ պահանջվող փաստաթղթերին»,– ասաց ԱԻՆ տեղեկատվության և հասարակայնության հետ կապերի վարչության պետ Ֆաինա Վարդանյանը:

Ի դեպ, հաջորդ նախնական դատական նիստը նշանակված է 3.04.2018 թ.–ին և ամենայն հավանականությամբ Բնապահպանական ճակատը հնարավորություն կունենա ստանալ նաև «Լիդիան Արմենիա» ՓԲԸ–ի կողմից պահվող փաստաթղթերը:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»