«Վիզը սխմում էի, որ սուս մնա». Որդեգիր զավակը ձեռքերով խեղդամահ է արել տարեց հորը

1in.am\ Աջափնյակ և Դավթաշեն վարչական շրջանների ընդհանուր իրավասության դատարանում Տաթևիկ Գրիգորյանի նախագահությամբ ավարտվել է Վալերի Թումասյանի գործի դատական քննությունը:

50-ամյա Վալերի Թումասյանը մեղադրվում էր դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:

Սպանվածը Վալերիի հայրն էր՝ 80-ն անց Ալավերդի Թումասյանը:

Ըստ մեղադրանքի՝ 2016 թվականի հուլիսի 20-ին, ժամը 23-ի սահմաններում Երևանի Հալաբյան փողոցի իրենց բնակարանում Վալերին վիճել է հոր հետ, որի ընթացքում բռունցքներով մի քանի անգամ հարվածել է հոր դեմքին ու գլխին, ապա ձեռքերով «սխմել է վիզը»՝ առաջացնելով մեխանիկական շնչահեղձություն:

Դեպքից անմիջապես հետո Վալերին իրականությանը չհամապատասխանող տեղեկատվություն է տվել հոր մահվան մասին՝ ասել է, թե հայրն ընկել, վնասվածքներ է ստացել ընկնելու հետևանքով ու մահացել է:

Դեպքի հաջորդ օրը Վալերի Թումասյանը դիմում է ներկայացրել քննչական բաժին՝ պնդելով, թե ականատես է եղել՝ ինչպես է հայրը ննջասենյակում քայլելիս վայր ընկել մահճակալի վրա, գլխով բախվել է մահճակալի փայտե սուր հատվածին, սկսել է արյունահոսել, աչքն էլ կապտել է:

Սակայն հուլիսի 22-ին ստացվել է դատաբժշկի տեղեկանքը, ըստ որի՝ մահացածի մոտ ախտորոշվել է «Գլխուղեղի դիֆուզ տրավմատիկ ախտահարում: Մեխանիկական շնչահեղձություն: Գլխուղեղի և պարանոցի փակ բութ վնասվածք: Գլխի, դեմքի, պարանոցի փափուկ հյուսվածքների արյունազեղումներ, գլխուղեղի արյունազեղում, ողնուղեղի արյունազեղում, ողնաշարի կրծքային առաջին ողի կոտրվածք, ձախից՝ վահանաճառի եղջյուրի կոտրվածք՝ շրջակա փափուկ հյուսվածքների արյունազեղմամբ»:

Ակնհայտ էր, որ տուժողի մահը բռնության հետևանք է:

Վալերի Թումասյանը բերման է ենթարկվել, տվել է խոստովանական ցուցմունքներ:

Նախաքննության ժամանակ և դատարանում Վալերի Թումասյանն իրեն մեղավոր է ճանաչել:

Նախաքննության ընթացքում Վալերին հայտնել է, որ դեպքի օրը՝ 2016 թվականի հուլիսի 20-ին, ինքը Ռուսաստան մեկնող ավտոբուսի տոմս է գնել՝ պետք է մեկներ Սոչի: Այնուհետև խմել է երկու շիշ գարեջուր, բայց չի հարբել, եղել է սթափ, ադեկվատ վիճակում:

Ժամը 23-ի սահմաններում տուն է գնացել: Ռուսաստանի տոմսի հետ կապված՝ հայրը զայրացել է իր վրա, պահանջել է վերադարձնել փողի մնացորդը ու ջղայնացրել է իրեն: Ինքը չի կարողացել իրեն տիրապետել ու բռունցքով մեկ անգամ հարվածել է հոր դեմքին: Վիճաբանությունը ննջարանում է ընթացել, իր հարվածից հայրն ընկել է մահճակալին: Ինքը բռունցքով մի քանի անգամ էլ հարվածել է հոր գլխին, հետո ձեռքերով սեղմել է նրա պարանոցը: Ինքը ցանկանում էր այնպես անել, որ անընդհատ խոսող հայրը չխոսի, նրա խոսքերը, ձայնը ջղայնացնում էին իրեն: Հոր պարանոցը սեղմել է այնքան, մինչև լսել է, որ հայրը խռխռացնում է: Բաց է թողել, սակայն հայրն արդեն անգիտակից վիճակում էր: Մոր հետ փորձել է հորն ուշքի բերել, բայց չի կարողացել: Մայրը ստուգել ու համոզվել է, որ Ալավերդին մահացել է: Նա ահազանգել է շտապօգնություն:

Վալերին հայտնել է, որ վերջին շրջանում մեծ մասամբ ապրել է Պյատիգորսկում, շինարարական աշխատանքներ է կատարել: Պյատիգորսկում նաև դատվել է գողության համար, երկու տարի պատիժ է կրել: Հայաստան է եկել 2013 թվականի նոյեմբերին:

Վալերին ասել է, թե հայրն ու մայրը վատառողջ էին, հայրն ընդհանրապես դժվարանում էր քայլել, ինքն ու մայրը խնամում էին նրան:

Դեպքի պահին հոր ձայնն ու խոսքերը, նրա արտահայտություններն են իրեն սաստիկ ջղայնացրել, սկսել է հարվածել հորը, հետո սեղմել է պարանոցը, որ նա վերջապես… սուս մնա: Երբ տեսել է, որ հայրն անգիտակից է, մորն ասել է, որ ջուր բերի, բայց արդեն չի կարողացել հորն ուշքի բերել: Տեսել է, որ հոր ականջից արյուն է գալիս: Մայրն ասել է, որ նա մահացել է:

Վալերին նշել է, թե դեպքից անմիջապես հետո ինքը չի ցանկացել ճշմարտությունն ասել. «Մտածում էի՝ չեք հասկանա՝ ինչից է մահացել…»,- պարզամտորեն պատճառաբանել է Վալերին:

Նա ասել է, որ Ռուսաստան մեկնող ավտոբուսի տոմսը գնել էր մոր տված փողով: Մայրը 25 հազար դրամ էր տվել, ինքը տոմսն առել էր 20 հազար դրամով: Տոմսի արժեքի հետ կապված՝ հայրը սկսել է բորբոքվել, պահանջել է հինգ հազար դրամը ու իրեն վիրավորել է:

Վալերին հայտնել է, թե հոր մարմինը ինչպես ընկած էր մահճակալին, ինքն այդպես էլ թողել է, չի տեղաշարժել, իսկ միջանցքում եղած արնանման հետքերը չգիտի՝ ինչպես են առաջացել:

Վալերին պատմել է, որ հոր հետ պարբերաբար վիճաբանություններ ունեցել է՝ հայրն ամեն բանի վրա խոսում էր՝ լույսը վառելու, լողանալու… «Ասես անընդհատ առիթ էր փնտրում՝ իմ վրա խոսելու համար»:

Վալերին պնդել է, որ հոր պարանոցը սեղմել է՝ նրա ձայնը չլսելու համար. «Չեմ պատկերացրել, որ եթե պարանոցը սեղմեմ՝ կմահանա»: Նա ասել է, թե զղջում է կատարածի համար:

Վալերին ընդունել է, որ տանը հայտնաբերված արյան հետքերով հողաթափերն իրենն են:

Որպես մեղադրյալ հարցաքննության ժամանակ Վալերի Թումասյանն իրեն մեղավոր է ճանաչել առաջադրված մեղադրանքում՝ դիտավորյալ սպանության համար, միաժամանակ ասել է, թե դիտավորյալ չի սպանել հորը, եղել է «աֆեկտիվ վիճակում»:

Դատարանում տված ցուցմունքում Վալերին այլ ձևով է նկարագրել տեղի ունեցածը: Հայրը, որ անընդհատ իր վրա խոսում էր, սկսել է խոսել ու վիրավորել Ռուսաստան մեկնող ավտոբուսի տոմսի արժեքի հետ կապված: Դեպքը, ըստ դատաքննական ցուցմունքի, եղել է խոհանոցի ու ննջասենյակի մեջտեղում: Հայրը վիրավորական խոսքեր է ասել ու դանակով սպառնացել է մորը: Ինքը զայրացած՝ հրել է հորը, նա ընկել ու վնասել է գլուխը: Դրանից հետո ինքը մշուշոտ է հիշում կատարվածը, չի կարողանում մտաբերել՝ ինչ գործողություններ է կատարել, քանի որ չի վերահսկել դրանք: Ձեռքերով է խեղդել հորը, քանի որ զայրացած ու հոգնած էր նրա վեճերից: Հայրը միանգամից չի մահացել, մոտավորապես հինգ րոպե դեռ շնչել է…

Վալերին դատարանում իրեն մասնակիորեն է մեղավոր ճանաչել, ընդգծել է, որ արարքը կատարելիս հոգեբանական ծանր վիճակում է եղել, իր գործողությունները չի կառավարել: «Բայց դեպքը կատարվել է ու՝ իմ մեղքով է կատարվել…»,- ընդունել է նա:

Դեպքի պահին ամուսնու ձեռքին դանակ լինելու հանգամանքի մասին դատարանում հիշատակել է նաև Վալերիի մայրը… 82-ամյա կինը իր ցուցմունքներում նշել է, որ ինքը երեխա չի ունեցել, 3 տարեկան Վալերիին որդեգրել են Ռիգայում: Ամուսինն այդպես էլ չի սիրել որդեգրված երեխային, իսկ ինքը նրան շատ է սիրել: Վալերին լավ երեխա էր, հիմա էլ լավ որդի է: Նա ուսում է ստացել՝ սովորել է Պյատիգորսկում, շինարար է դարձել, միշտ հոգացել է ծնողների համար, բայց ամուսինը շատ ծանր բնավորություն ուներ, իր կյանքն «ուտում էր», ծեծում էր, Վալերիին էլ օր ու արև չէր տալիս, ամեն բանի վրա խոսում էր… Վալերին 50 տարեկան տղամարդ է, բայց հայրը ամեն բանի վրա խոսում էր՝ օրը երկու անգամ է լողանում, գիշերվա ժամը երեքին լույս է վառում, հեռուստացույց է նայում… Վալերին ընտանիք այդպես էլ չի կազմել, երեխա չունի, հոր ծանր բնավորությունն է նաև եղել պատճառը, որ հիմնականում ապրել է Ռուսաստանում…

Մեղադրող դատախազը միջնորդեց Վալերի Թումասյանին մեղավոր ճանաչել ՀՀ քրեական օրենսգրքի 104 հոդվածի 1-ին մասով և դատապարտել 12 տարի ազատազրկման:

Վալերին ու նրա շահերի պաշտպանը նշեցին, որ արարքը պետք է վերաորակել՝ որպես հոգեկան խիստ հուզմունքի վիճակում կատարված սպանություն, նշանակել մեղմ պատիժ, որպեսզի Վալերին շուտ ազատություն դուրս գա ու խնամի տարեց մորը:

Դատարանը հաստատված գնահատեց, որ Վալերի Թումասյանը կատարել է դիտավորյալ սպանություն, նա մեղավոր է ՀՀ քրեական օրենսգրքի 104 հոդվածի 1-ին մասով:

Վալերի Թումասյանը դատապարտվեց 11 տարի ազատազրկման:

Որպես դատական ծախս՝ կատարված փորձաքննությունների արժեք՝ Վալերի Թումասյանից հօգուտ պետբյուջեի կբռնագանձվի 199 հազար 874 դրամ: