Սոցիալական աջակցության տարածքային գործակալությունները 63 միլիոն դրամի խախտումներ են արել. «Փաստ»

«Փաստ» օրաթերթը գրում է.

Ինչպես արդեն տեղեկացրել էինք ՀՀ վերահսկիչ պալատը հրապարկել է 2016 թ. գործունեության տարեկան հաշվետվությունը, որի արդյունքում պարզ է դարձել, թե նախորդ տարի ո՞ր պետական կառույցներն են չարաշահումներ արել:

Պարզ է դառնում, որ իր աշխատանքում թերացումներ են ունեցել նաև մի շարք սոցիալական ծառայության տարածքային գործակալություններ (ՍԱՏԳ): Այսպես, վերահսկողությունն իրականացվել է պետական բյուջեով նախատեսված ընտանեկան և սոցիալական նպաստների, հրատապ դրամական օգնության և մինչև երկու տարեկան երեխայի խնամքի նպաստի նշանակման գործընթացների նկատմամբ: Վերահսկողության ընթացքում ուսումնասիրվել են վերահսկվող օբյեկտներից ստացված փաստաթղթերը և տվյալները, կիրառվել են ընտրանքի, տարբեր աղբյուրներից ստացված տվյալների համադրման և համեմատման մեթոդներ:

Ըստ հաշվետվության՝ սոցիալական աջակցության խորհուրդների առաջարկությունները հիմնականում կատարվել են առանց հանգամանքների ուսումնասիրության, բացակայում են տնային այցելության արձանագրությունները: Խորհրդի նիստերում քննարկվում են միանգամից մի քանի տասնյակ հարցեր: Խորհուրդների գործունեությունը կրում է ձևական բնույթ` հաստատելով ՍԱՏԳ տեսուչների բոլոր գործողություններն առանց բացառության:

Վերահսկիչ պալատը արձանագրել է «Պետական նպաստների մասին» ՀՀ օրենքի մի շարք դրույթների խախտումներ: Ընդհանուր առմամբ Սյունիքի, Վայոց Ձորի, Շիրակի, Գեղարքունիքի և Տավուշի մարզպետարանների ենթակայության թվով 20 Սոցիալական աջակցության տարածքային գործակալությունների և Ջերմուկի քաղաքային համայնքի ենթակայության Ջերմուկի Սոցիալական աջակցության տարածքային բաժնի վերահսկողության արդյունքում հայտնաբերվել են 539 դեպքով 63 միլիոն 618 հազար դրամ գումարի չափով տարբեր բնույթի խախտումներ: Մասնավորապես, Աշխատանքի և սոցիալական հարցերի նախարարության «Նորք» տեղեկատվավերլուծական կենտրոնի կողմից հարակից բազաներով ՍԱՏԳ–ներին տրամադրված տեղեկատվության իրացման վերահսկողության արդյունքում հայտնաբերված 283 դեպքերով խախտումների գումարը կազմել է ընդհանուր 29 միլիոն 652 հազար դրամ, որը տրամադրված տեղեկատվությունը ժամանակին և ամբողջությամբ համակարգ չմուտքագրելու և սահմանված կարգով նպաստի վճարումը չդադարեցնելու հետևանք է:

Նշված խախտումների մեջ կան դեպքեր, որտեղ գործատուի տեղեկանքում աշխատավարձի չափը չի համընկել «Նորք» ՏՎԿ–ի կողմից տրված աշխատավարձի չափի մասին տեղեկատվությանը: ՍԱՏԳ–ները հիմք չեն ընդունել «Նորք» ՏՎԿ–ի կողմից տրված տեղեկատվությունը: Այդ մասով արձանագրվել է 28 դեպք՝ 1 միլիոն 935 հազար դրամ գումարի: Իսկ մի դեպքում նպաստառուն իր հայտարարության համաձայն չի աշխատել, սակայն «Նորք» ՏՎԿ–ի տեղեկատվության համաձայն՝ աշխատել է «ԻՄԻՋ Մ.Գ» ՍՊԸ–ում և ստացել է աշխատավարձ:

Նպաստառու ընտանիքների կազմի, բնակարանային պայմանների, բնակության վայրի ճշտության ստուգման արդյունքում հայտնաբերվել է 90 խախտում՝ ընդհանուր 13 միլիոն 804 հազար դրամի: Բնակության վայրի հաշվառման և այդ տվյալների համակարգ մուտքագրման ճշտության ստուգման արդյունքում՝ արձանագրվել է 26 խախտում՝ ընդհանուր 6 միլիոն 111 հազար դրամի չափով: Իրենց ընտանիքների անդամների մասին տեղեկանքների հավաստիության և այդ տվյալների համակարգ մուտքագրման ճշտության ստուգման արդյունքում հայտնաբերվել է 33 խախտում՝ ընդհանուր 4 միլիոն 143 հազար դրամի:

Բացի այս, հարակից բազաների ստացման ժամանակացույցի ճշտության ստուգման արդյունքում էլ պարզվել է, որ հաճախ են դեպքերը, երբ ՍԱՏԳ–ները տեղեկատվությունները ստանում են 1–ից 7 ամիս ուշացումով, որի արդյունքում էլ նպաստառուները ավել են ստանում շուրջ 7 ամսվա նպաստ և ավելի ստացած նպաստը հետգանձելու խնդիր է առաջանում:

Շարունակությունը` «Փաստ» օրաթերթի այսօրվա համարում