ԼՂ բանակցային գործընթացը մտնում է նոր փո՞ւլ. «Փաստ»
«Փաստ» օրաթերթը գրում է.
Աստիճանաբար տպավորություն է ստեղծվում, որ ԼՂ հակամարտության կարգավորման գործընթացն սկսում է շարժվել մեռյալ կետից: Երևանում կայացած մամուլի ասուլիսի ընթացքում ԵԱՀԿ Մինսկի խմբի համանախագահ Ռիչարդ Հոգլանդը հանդես եկավ կարևոր հայտարարությամբ: Մասնավորապես նա նշել էր, որ «կա ծրագիր, որը քննարկում ենք և որը բաղկացած է երեք մասից»: Ընդ որում, նա ընդգծել է, որ այդ փաստաթուղթը ԱՄՆ–ի դիրքորոշումը չէ, այլ արտահայտում է ԵԱՀԿ Մինսկի խմբի ընդհանուր մոտեցումը: Երկրորդ` դա, այսպես կոչված, «Լավրովի պլանը» չէ:
Այլ մանրամասներ համանախագահը չի հայտնել: «Տեղին չէ, որ ես դրա մասին մանրամասներ ներկայացնեմ։ Երկու կողմերը, որոնք բանակցում են դրա շուրջ, պետք է առանձին հարցերի շուրջ դեռևս աշխատեն: Եվ դիվանագիտության մեջ, ինչպես թղթախաղ խաղալիս, չես կարող բոլոր խաղաքարտերը սեղանին դնել: Հնարավոր է` ծրագրի ինչ–որ մի մաս փոփոխություն կրի, այդ իսկ պատճառով մենք մանրամասների մասին չենք խոսում»,– ասել է նա:
Ուշագրավ է, որ նա խոսել է նաև նախագահների հնարավոր հանդիպման մասին:
«Հուսով ենք, որ մոտ ապագայում, բայց ոչ մեկ ամիս հետո, երկու արտգործնախարարները կհանդիպեն` նախագահների հանդիպում պատրաստելու համար: Դիվանագիտական գործընթացներն այս պահին ընթանում են»,– ասել է նա: Եթե նախագահների հանդիպումը կայանա, այն կլինի առաջինը Սանկտ–Պետերբուրգից հետո: Իսկ Պետերբուրգում կայացած հանդիպումից հետո հատկապես հայկական կողմը բավականին կոշտացրել էր դիրքորոշումը` նշելով, որ եթե Ադրբեջանը չի կատարում ստանձնած պարտավորությունները, մասնավորապես չի կատարում Վիեննայի ու Սանկտ–Պետերբուրգի համաձայնությունները, բանակցելն անիմաստ է: Ուստի երկու կողմն էլ խոստովանել է, որ բանակցություններ չկան: Բայց դա ամենևին չի նշանակում, թե կողմերը չեն հանդիպում համանախագահողների կամ համանախագահ երկրների ղեկավարների հետ: Այդ առումով բանակցություններ, իհարկե, կան: Սրան հավելենք այն, որ միայն այս ամսվա ընթացքում ՀՀ և Ադրբեջանի նախագահները հանդիպել են թե Ֆրանսիայի, թե Ռուսաստանի նախագահների հետ: Օրակարգում, իհարկե, եղել է ԼՂ հակամարտության հարցը:
Ու եթե հիմա նախապատրաստվում է նախագահների հանդիպում, նշանակում է, գործընթացը մեռյալ կետից շարժվում է:
Ուշագրավ է, որ Հոգլանդի ասուլիսի նախօրեին հայտարարությամբ հանդես եկավ Ֆրանսիայի արտգործնախարար Ժան–Մարկ Էյրոն և նշեց, որ Փարիզը պատրաստ է կազմակերպել նախագահների հանդիպում: Ընդ որում, նա նաև ընդգծեց, որ դա տեղի կունենա այն դեպքում, «եթե կողմները ցանկանան շարունակել բանակցությունները և ստորագրեն խաղաղության համաձայնագիր»:
Արդյո՞ք կողմերը մոտ են խաղաղության համաձայնագրի կնքմանը: Դեռ մեկ ամիս առաջ ՌԴ արտգործնախարար Լավրովը հայտարարեց, որ կողմերը համաձայնեցրել են բոլոր կետերը, մնում է 1–2 կարևոր հարց: Նույնը հայտարարել էր ամերիկյան կողմը: Ըստ էության, այդ մասին նաև ասել է հայկական կողմը: Իհարկե, ոչ իշխանությունների միջոցով: Հ1–ին տված իր հարցազրույցում այդ մասին հայտարարեց առաջին նախագահ Լևոն Տեր–Պետրոսյանը`ընդգծելով, որ ինքը գիտի, թե ինչ 1–2 կետի մասին է խոսքը, սակայն իրեն լիազորություն չի վերապահում այդ մասին բարձրաձայնել:
Վերը նշված այս ամբողջ գործընթացի համապատկերում ուշագրավ է դառնում երկու կարևոր հանգամանք, որոնք արտաքուստ այս պրոցեսի հետ որևէ կապ չունեն: Առաջինը տեղի է ունենում Հայաստանում: Մեզանում ընթացող նախընտրական քարոզարշավում իր որդեգրած դիրքորոշմամբ առանձնանում է Կոնգրես–ՀԺԿ դաշինքը, ավելի ճիշտ` Կոնգրեսը (տվյալ դեպքում ՀԺԿ–ն ավելի շատ կցորդի դեր է խաղում): Իր նախընտրական քարոզարշավի մեխը Կոնգրեսը հռչակել է ԼՂ հակամարտության կարգավորումը` «խաղաղություն, բարիդրացիություն, հաշտություն» սկզբունքով: Այսինքն, բանակցային սեղանին եղած փաստաթղթի իրագործում: Կոնգրեսականները շրջում են մարզերում և մարդկանց քարոզում այն միտքը, որ ԼՂ հարցը պետք է հնարավորինս արագ լուծվի եղած տարբերակով (դա լավ է, թե վատ, այլ խոսակցության թեմա է): Կոնգրեսի առաջնորդ, առաջին նախագահ Լևոն Տեր–Պետրոսյանը 1–ժամանոց հարցազրույցներ է տալիս Հանրային, «Կենտրոն» հեռուստաընկերություններին, որոնց ընթացքում խոսում է բացառապես այդ թեմայի շուրջ: Արդյո՞ք այս ամենը պատահական է: Արդյո՞ք այստեղ չկա հասարակությանը ԼՂ հարցով առաջիկայում սպասվող զարգացումներին նախապատրաստելու նպատակ:
Երկրորդ հանգամանքը վերաբերում է Ադրբեջանին: Այդ երկրի ղեկավարությունը տասնյակ տարիներ լվացել է իր քաղաքացիների ուղեղը, թե հետ ենք վերցնելու Ղարաբաղը, Երևանն էլ հետը: Ու ամեն անգամ ներքին խնդիրներից իր հանրության ուշադրությունը շեղելու նպատակով առաջին պլան է բերել ԼՂ հարցը, սրել վիճակը սահմանին: Բայց Ալիևն ինքը համաձայնություն է տվել նույն այդ Մադրիդյան կոչվող սկզբունքների վրա այսօր սեղանին դրված փաստաթղթին, որի 1–2 կետերն են մնացել, որ պետք է համաձայնեցվեն: Իսկ այդ փաստաթղթով նախատեսվում է Ղարաբաղի ինքնորոշման իրավունքի իրացում` կամարտահայտության միջոցով: Այսինքն, թեև տարածքների մի մասը նրանք հետ կստանան, բայց Ղարաբաղը կանկախանա: Ու հիմա ինչպե՞ս Ալիևը դա բացատրի իր ժողովրդին, ում տարիներ շարունակ այլ բան է կերակրել:
Գուցե պատահակա՞ն չէ, որ այժմ Ադրբեջանում շրջանառության մեջ է դրվել երկրի նախագահին վիրավորող, վարկաբեկող նյութերի հրապարակումը կամ նրա հասցեին վատ խոսք հնչեցնելը դատապարտող օրենքը խստացնելու մասին այդ երկրի գլխավոր դատախազության առաջարկած օրինագիծը: Ի վերջո, չմոռանանք Ալիևի հայտնի դժգոհությունն առ այն, թե միջազգային հանրությունն իր վրա ճնշում է գործադրում` ճանաչելու Արցախի անկախությունը:
Շարունակությունը` «Փաստ» օրաթերթի այսօրվա համարում:
Какой армянский деятель стал членом комиссии при президенте РФ? «Паст»
Завершился международный шахматный турнир, организованный при поддержке IDBank
Актриса Джульетта Степанян удостоена премии «Белый слон»
Чья кандидатура будет выдвинута на пост президента Союза армян России? «Паст»
Ваге Овеян разгромил соперника и стал чемпионом Европы по греко-римской борьбе
Властям содержание не нужно: «Паст»
Европейские обещания на фоне закрытых дверей: «Паст»
На Евразийском экономическом форуме в Астане ожидается рекордное число участников
Великая Победа и великий подвиг армянского народа. Арман Варданян
Здание семинарии было возвращено армянской епархии при поддержке Самвела Карапетяна: «Паст»
