«Եթե կհայտնվի այնպիսի մեկը, ով ինձ նման կհասկանա և կընդունի ինձ, ես նրա հետ մեծ սիրով կշփվեմ». Աստղիկ Սաֆարյան

ShowBiz.am-ի զրուցակիցը երգչուհի Աստղիկ Սաֆարյանն է, ով անկեղծանալով պատմեց մեզ իր մանկության երանելի հիշողությունների, կարիերայի զկզբնական շրջանում իրեն հանդիպած դժվարությունների, երգարվեստը անսահման շատ սիրելու, ճանապարհորդություններից լավն ու վատը քաղելու և ապագա ծրագրերի մասին:

– Ի՞նչ հիշողություններ ունի իր մանկությունից Աստղիկ Սաֆարյանն ու ինչպիսի՞ն է հիշում այդ անհոգ տարիները:

– Հիանալի մանկություն եմ ունեցել՝ ազատ, անհոգ և ուրախ՝ շնորհիվ իմ ծնողների, քանի որ մեր այդ անհոգ և երջանիկ մանկության համար մենք պարտական ենք մեր ծնողներին։

-Ինքնամփոփ և պարփակվա՞ծ թե՞ աշխույժ ու ակտիվ. ինչպիսի՞ աշակերտ եք եղել դպրոցում:

– Դպրոցական տարիներին եղել եմ շատ աշխատասեր, չափից շատ պատասխանատու և սովորող աշակերտ, և արդեն բնավորություն դարձած այդ սովորություններս շարունակվեցին նաև ուսանողական տարիներին։ Միայն թե դպրոցում ավելի ինքնամփոփ էի, հետո ուսանողական տարիներին արդեն սկսեցի փոխվել և ավելի մարդամոտ դարձա, երբ արդեն ճանաչում ձեռք բերեցի ։

– Սեր առ երգ ու երաժշտություն. ե՞րբ բացահայտեցիք ու զգացիք Ձեր մեջ այն, ինչը հետո դառնալու էր մի մասնիկը ողջ կյանքի:

– Սեր առ երաժշտություն, երգարվեստ ինձ մոտ նկատվել է դեռ մանկուց։ Մանուկ հասակում հաճախում էի երաժշտակսն խմբակներ, որը դադարեց այն ժամանակ երբ 15 տարեկանում ընդունվեցի Պետական Տնտեսագիտական Համալսարան, իսկ մինչ այդ, հաճախում էի դաշնամուրի և կիթարի դասընթացների, բայց երկուսն էլ, ցավոք, կիսատ մնաց, քանի որ զգացի որ երաժշտական միտքս նման ինստրումենտներով լիարժեք չեմ կարողանում փոխանցել, և դա դանդաղեցնում էր իմ մուսայի տեմպը։ Հասկացա, որ պարզապես երաժշտական միտքս և հոգուցս բխած երաժշտությունը արտահայտելու ամենաարագ ուղին ինձ համար դա ձայնային ինստրումենտն է։

– Առաջին քայլեր, նոր աշխարհ. ի՞նչ զգացողություններ են այդ ժամանակ պատել Ձեզ:

– Շատ դժվար էր այդ առաջին տարիներին. իմ թիկունքին կանգնած էր միայն իմ ընտանիքը։ Ժամանակի ընթացքում աշխատասիրությանս շնորհիվ կարողացա ինքս սեփական ուժերով հասնել արդյունքների և նրան, որ ինքս դարձա իմ թե՛ երաժշտական, և թե՛ ֆինանսական պրոդյուսերը։ Ես իմ կարիերայում միշտ աշխատել եմ միայնակ, պայքարել և ստեղծել եմ իմ սեփական հեծանիվը։ Այդ ճանապարհին ինձ հանդիպել են մարդիկ, որոնց հետ աշխատելը լավ արդյունք է տվել, ինչի համար շնորհակալ եմ բոլոր նրանց։ Բայց եղել են երեք անգամ ավելի շատ մարդիկ, որոնք միայն փորձել են խոչընդոտել, խաբել և թիկունքից հարվածել, որոնք փորձել են խանգարել ինձ։ Բայց արդեն 11-րդ տարին է, ինչ ստեղծագործում և աշխատում եմ երգարվեստում և, ինչպես տեսնում եք, ես դեռ այստեղ եմ ու շարունակում եմ գործել՝ ավելի վստահ և ավելի մեծ փորձով:

– Մարդիկ անկեղծ են լինում սովորաբար մենակ լինելիս: Սիրու՞մ է արդյոք Աստղիկը մնալ ինքն իր հետ ու մտածել:

– Ես շատ հաճախ եմ մենակ լինում. ինձ համար դա ամենահաճելի վիճակն է, քանի որ ավելի լավ է լինել մենակ, քան մարդկանց հետ, ովքեր քեզ չեն հասկանում։ Ինձ հետաքրքիր է ինձ հետ, և, վերջապեսես, այն եզակի մարդկանցից եմ, ով լավ է հասկանում Աստղիկ Սաֆարյանին: Եթե կհայտնվի այնպիսի մեկը, ով ինձ նման կհասկանա և կընդունի ինձ, ես նրա հետ մեծ սիրով կշփվեմ))))):

– Այն որ մասնագիտությամբ տնտեսագետ եք, գիտենք. Բայց բացի երգարվեստից կա՞ որևէ այլ բնագավառ, որ մեծ հաճույքով կտեսնեիք Ձեզ այդտեղ:

– Տնտեսագետի մասնագիտությունը, սովորելով 5 տարի Երևանում, շարունակել եմ մասնագիտացումը Իսպանիայում՝ ստանալով 3 մագիստրական դիպլոմներ։ Բայց եթե չզբաղվեի երգով, միևնույնն է, ինչով էլ, որ զբաղվեի, իմ ներքին երազանքը լինելու էր երգով զբաղվելը))):

– Շատ եք ճանապարհորդում. կպատմե՞ք ձեր ճանապարհորդություններից, ինչե՞ր եք քաղում, հասկանում, սովորում այս ու այն երկրներ գնալ-տեսնելուց:

– Շատ բաներ ես սովորում այլ երկրներից, այլ ազգերից։ Կա թե՛ լավը, թե՛ վատը, կարևորն այն է, որ կարողանաս այդ բազմազանության մեջ պահպանել քո մաքրությունը՝ ընդօրինակելով միայն լավը և անտեսելով վատը։

– Դրսից ի՞նչը կամ ո՞ր մարդկային հատկանիշները կցանկանայիք բերել Հայաստան կամ մեր ժողովրդի մեջ:

– Մարդասիրությունն է կորել մեր հայերի մեջ, դիմացինին լավ և բարի աչքով նայելու ունակությունը: Այ դա կցանկանայի վերադարձնել բոլոր հայերի մեջ:

– Այժմ ինչո՞վ եք զբաղվում, ի՞նչ աշխատանքային գործունեություն եք ծավալում:

– Այժմ վերադարձել եմ Երևան, և աշխատում եմ, որ նորություններ ներկայացնեմ իմ լսարանին։

– Մոտ ապագայում ի՞նչ պլաններ ունեք: Երկրպագուները սպասե՞ն նոր երգի կամ տեսահոլովակի:

– Անպայման, սպասեք նորությունների, քանի որ շուտով կներկայանամ հաճելի անակնկալներով։