Քվեարկություն հօգուտ մարտի 1–ի նախագծի, թե՞ իրավապահ համակարգի ազդեցիկ ներկայացուցիչներից ազատվելու ճանապարհ. «Փաստ»

«Փաստ» օրաթերթը գրում է.

Երեկ Ազգային ժողովի նիստի ընթացքում «Ելք» խմբակցության ղեկավար Նիկոլ Փաշինյանը օրենսդիրներին ներկայացրեց իրենց կողմից հեղինակած «2008 թվականի մարտի 1–2–ի իրադարձությունների վերաբերյալ» նախագիծը ԱԺ օրակարգ ընդգրկելու մասին հարցը: Խորհրդարանն այն միաձայն ընդունեց: Չեղավ ո՛չ դեմ, ո՛չ ձեռնպահ քվեարկություն: Անգամ ընդդիմադիր ուժի ղեկավար Նիկոլ Փաշինյանին այդ միաձայն քվեարկությունը տարօրինակ թվաց, ինչի մասին նա նշել էր իր ֆեյսբուքյան էջում:

Քաղտեխնոլոգ Արմեն Բադալյանը, սակայն, այս ամենի մեջ ոչ մի տարօրինակ բան չի տեսնում: Վերջինս պատասխանել է «Փաստ»–ի մի քանի հարցերին:

– Օրինագծին կողմ քվեարկեց նաև ՀՀԿ–ն: Ինչո՞վ է պայմանավորված նման քվեարկությունը:

– Դա երկու պատճառ կարող է ունենալ: Առաջինը՝ մարտի 1–ն այլևս ակտուալ չէ: Իհարկե մարտի 1–ի զոհերի ժառանգների, իրավահաջորդների կամ նրանց շահերի պաշտպանների համար խիստ ակտուալ է, բայց երբ վերցնում ենք հասարակության ընդհանուր իրավիճակը, այն մթնոլորտը, որ տիրում է այսօր երկրում, տեսնում ենք, որ մեծ մասամբ հետաքրքրություն չի ներկայացնում, բացի հարազատների նեղ շրջանակից:

Նա չունի այն ակտուալությունը, որ կար 10 կամ 5 տարի առաջ, որովհետև հասարակության մեջ արդեն մտածելակերպ ու մենթալիտետ է փոխվել, հասարակության համար ուրիշ խնդիրներն են ավելի կարևոր՝ սոցիալ–տնտեսական, արտագաղթի ու դեղերի: Դա այլևս ակտուալ չէ, 10 տարի է անցել: Այդ իրադարձությունների հետևանքով բազմաթիվ տուժածներ և զոհերի որոշ հարազատներ արտագաղթել են Հայաստանից:

Այն իր կարևորությամբ առաջին տեղում չի գտնվում, և ընդդիմությունը դա օգտագործելով՝ չի կարող իշխանափոխություն անել կամ ինչ–որ դիվիդենտներ շահել, ինչպես ՀԱԿ–ն էր այն օգտագործում 2008 թ. հետո: Հիմա ընդդիմությունը չի կարող մարտի 1–ն օգտագործել իր համար ցանկալի արդյունք ստանալու համար:

Եվ երկրորդ՝ մարտի 1–ի գործը այնպիսի գործ է, որ կարելի է սլաքներ ուղղել ում նկատմամբ, որ ցանկանաս՝ և՛ ընդդիմության, և՛ նախկին նախագահի, և՛ իշխանության մեջ եղած, և՛ չեղած մարդկանց նկատմամբ, ովքեր այսօր ազդեցիկ են: Ցանկացած դեպքում բոլորի կողմ էլ կարելի է սլաքն ուղղել, իսկ այդ ուղղորդողը, բնականաբար, լինելու է գործող նախագահը, որովհետև իրավապահ համակարգը նրան է պատկանում:

– Նման քվեարկությունը իշխանության կողմից ինչ–որ մութ բաներ ձեռնարկելու կասկածներ չի՞ տալիս:

– Հակառակը՝ լուսավոր, և այս հարցը կարող է օգտագործվել ցանկացած քաղաքական գործչի կամ ուժի դեմ: Կամ այդ հարցը կարելի է քննարկել՝ պատճառ բերելով, որ ժամանակին այդ հարցը լավ ուղղությամբ չեն տարել կամ լավ չեն քննարկել՝ իրավապահ համակարգի որոշ ազդեցիկ ներկայացուցիչներից ազատվելու համար:

Դա կարող է գործող նախագահն ու իշխող քաղաքական ուժն անել: Բնականաբար, գործող նախագահը ցանկացած ձևով դա կարող է իր համար օգտագործել:

– Ըստ Ձեզ, նախագծի քննարկումներն ԱԺ–ում ինչպիսի՞ ընթացք կունենան:

– Դա կախված կլինի, թե ինչպես կորոշի հանրապետության նախագահը, թե ինչ լուծում է նա այդ հարցին ուզում տալ: Կարող են պարզապես ձևական քննարկել`, ցույց տալով, թե մենք ժողովրդավարական երկիր ենք, քննարկում ենք այդ հարցը, իսկ հետագայում որոշում չընդունեն կամ ընդունեն այնպիսի հայտարարություն, որը կենացի մակարդակի լինի:

Շարունակությունը՝ «Փաստ» օրաթերթի այսօրվա համարում