Աշխատակիցների նույն օրն ու նույն ինքնաթիռով կատարված չվերթների ավիատոմսերի արժեքները տարբեր են. «Փաստ»

«Փաստ» օրաթերթը գրում է.

Տնտեսական զարգացման և ներդրումների նախարարության պահպանման նպատակով 2016 թ. պետական բյուջեից հատկացվել է 900 միլիոն 832 հազար 600 դրամ, որի դիմաց տարվա ընթացքում կատարված ծախսերը կազմել են 885 միլիոն 971 հազար 330 դրամ, կամ առաջացել է 14 միլիոն 852 հազար 270 դրամի տնտեսում:

2016 թ. նախարարության աշխատակիցների գործուղման նպատակով պետական բյուջեից հատկացվել և ծախսվել է ընդհանուր առմամբ 42 միլիոն 534 հազար 710 դրամ: Այս մասին հայտնում են Տնտեսական զարգացման և ներդրումների նախարարությունից «Փաստի»՝ արտասահմանյան գործուղումների վերաբերյալ հարցմանն ի պատասխան:

Մեր հարցման մեջ նշված գործուղվողների տվյալների և ընդհանուր գործուղումների արժեքները նշելու փոխարեն նախարարությունից ուղղորդել են օգտվել կառավարության govtravel.am կայքից, որտեղ, սակայն, նշված չէ գործուղման ընդհանուր ծախսը, կոնկրետ գործուղման մեկնողի վերաբերյալ տեղեկություններն ու գործուղման նպատակը:

Ինչպես տեղեկանում ենք այդ կայքի 2016 թ. տարեկան հաշվետվությունից՝ նախորդ տարի Տնտեսական զարգացման և ներդրումների նախարարությունը այդ ավելի քան 42 միլիոն դրամը վճարել է ընդամենը 26 աշխատակցի գործուղման համար:

Նախարարությունը նախորդ տարվա դեկտեմբերի 12–ին գործուղել էր իր աշխատակցին դեպի Վիեննա, այնուհետև էլ՝ Բրյուսել: Էկոնոմ կարգի այդ ավիատոմսը գնվել է 262 հազար 296 դրամով: Մեկ օր անց՝ այս անգամ Մոսկվայից դեպի Բրյուսել են գործուղվել նախարարության ևս 2 աշխատակից, որոնց ավիատոմսերից յուրաքանչյուրը արժեցել է 189 հազար 669 դրամ: Հաշվետվության մեջ տեսնում ենք, որ Մոսկվայով դեպի Բրյուսել գործուղում է տեղի ունեցել նաև դեկտեմբերի 12–ին, իսկ ավիատոմսը ձեռք է բերվել 216 հազար 523 դրամով:

Նախարարության մեկ այլ աշխատակցի Ժնևից դեպի Բրյուսել ու Վիեննա, այնուհետև էլ դեպի Երևան դեկտեմբերի 14–ին տեղի ունեցած տրանզիտ չվերթի ավիատոմսը գնվել է 418 հազար 807 դրամով: Մեկ այլ աշխատակցի նույն գործուղման նպատակով նույն ինքնաթիռով ու նույն չվերթով ավիատոմսը արժեցել է մի փոքր ավելի շատ՝ 428 հազար 807 դրամ: Նշենք, որ սա նախարարության նախորդ տարվա ամենից թանկ ավիատոմսի արժեքն է:

Նախորդ տարվա դեկտեմբերի 23–ին ուղիղ չվերթով դեպի Մոսկվա ինքնաթիռի ավիատոմսը ձեռք է բերվել 162 հազար 610 դրամով: Հատկանշական է, որ այս դեպքում էլ նույն ուղղությամբ ավիատոմսը մեկ այլ աշխատակցի համար գնվել է 127 հազար 550 դրամով: Սրա հետ մեկտեղ նշենք, որ կրկին դեպի Մոսկվա այս անգամ դեկտեմբերի 20–ի համար գնված տոմսը արժեցել է ոչ ավել ոչ պակաս 216 հազար 550 դրամ: Դեկտեմբերի 20–ին նախարարության Երևան–Դոհա–Առուբա չվերթով ավիատոմսը արժեցել է 193 հազար 914 դրամ:

Ընդհանուր առմամբ նախարարությունն իր նախորդ տարվա գործուղումների նպատակով գնված ավիատոմսերի համար վճարել է 4 միլիոն 240 հազար 898 դրամ: Ստացվում է, որ նախարարության աշխատակիցների գործուղման ծախսից հանելով ավիատոմսերի գնմանն ուղված գումարը մնացորդ է մնում ավելի քան 38 միլիոն դրամ: Այստեղ փոքր–ինչ անհասկանալի է դառնում, թե այդ դեպքում ինչպես է բաշխվում այս վերջին գումարը նախարարության աշխատակիցների գործուղման վայրում իրականացրած մնացած ծախսերի առումով: Կամ թվերն են սխալ, կամ կառավարության՝ պաշտոնական կայքում տեղ գտած ավիատոմսերի 2016 թ. տարեկան հաշվետվության մեջ տվյալներ են պակասում:

 Շարունակությունը` «Փաստ» օրաթերթի այսօրվա համարում