Գագիկ Մակարյան. «Թանկացումները շարունակվելու են». «Փաստ»

«Փաստ» օրաթերթը գրում է.

Եկող տարվանից թանկացումների նոր ալիք է սպասվում: ԵԱՏՄ պահանջներով հունվարին ուժի մեջ մտնող Հարկային օրենսգրքով սահմանվել են ակցիզային հարկի դրույքաչափերը: Արդյունքում մի շարք ապրանքների հարկման դրույքաչափը մինչև 2021 թվականն աստիճանաբար կբարձրանա: Թանկացող ապրանքների ցուցակում են ալկոհոլային խմիչքներն ու ծխախոտը: Փոփոխություններով ակցիզի թանկացման պատճառով 1 տուփ ծխախոտը կթանկանա 35 դրամով, սպիրտային խմիչքները՝ 175–ով:

2018 թվականին գնաճն անխուսափելի է, ինչը պայմանավորված է մի քանի հանգամանքներով: Տնտեսագետ Գագիկ Մակարյանը «Փաստ» օրաթերթի թղթակցի հետ զրույցում թվարկեց թանկացման պատճառները:

Տնտեսագետը հիշեցրեց՝ ԵԱՏՄ պահանջով ակցիզային հարկի դրույքաչափերն են փոխվել: Այն ուղղակի ազդեցություն է ունենալու ապրանքների վաճառքի գների վրա:

«Հայաստանը դարձել է ԵԱՏՄ անդամ և այդ ընտանիքի ցուցանիշներին պետք է մոտեցնի իր հարկերի չափը»,– մատնանշեց Գագիկ Մակարյանը:

Եվրոպական և ամերիկյան արժույթները թանկացել են: Դոլարով և եվրոյով ներմուծվող ապրանքները նույնպես կթանկանան: Տնտեսագետը հայտնեց, որ արդեն իսկ որոշ ապրանքների գները բարձրացել են:

«Թանկացումները կշարունակվեն, որովհետև արդեն տարվա վերջ է՝ նոր տարի, դա էլ իր հերթին կգումարվի»,– նկատեց նա:

Դիզվառելիքի շուկան ևս չի շրջանցի: Բարձրանալու է բենզինից գանձվող ակցիզային հարկը՝ այսօր մեկ տոննայի համար գործող 25000 դրամի փոխարեն դառնալով 40000: Կտրուկ՝ 5 անգամ թանկանալու է քսայուղերից հարկվող ակցիզային հարկը:

Գների թռիչքն այսքանով չի սահմանափակվելու: Ըստ Գագիկ Մակարյանի՝ Հայաստանում զբոսաշրջության զարգացման խթանումը ևս գնաճի առիթ է դառնում:

«Խանութների, հյուրանոցների, հյուրատների պահանջարկն ավելանում է, ինչը գնային փոփոխությունների է բերում: Բացի տեխնիկական սարքավորումներից, մնացած ապրանքների և ծառայությունների գները կբարձրանան՝ հուշանվերներ, վարձակալվող մեքենաներ և զբոսաշրջիկների հետ առնչվող մյուս ապրանքները»,– թվարկեց տնտեսագետը:

Գնողունակության շրջանում որոշակի տեղաշարժեր կան: Տնտեսագետի խոսքով՝ այս փաստը գնագոյացման հարցում ևս դեր կխաղա:

«Ռուսաստանում առողջացման պրոցեսների շնորհիվ աշխատանքային միգրանտները ավելի մեծ քանակի ռուբլի, եվրո կամ դոլար են ուղարկում: Ռուբլին արժևորվել է, հետևաբար, նրանց գնողունակությունը բարձրանում է: Սա կբերի առևտրի ծավալների փոփոխությանը»,– ընդգծեց նա:

Տնտեսագետը սպասվող թանկացումներում չի բացառում նաև սպեկուլյատիվ տարրերը: Իսկ տեղական շուկայում այս երևույթն արդեն ավանդույթ է դարձել:

«Օրինակ՝ ակցիզային հարկն ավելացավ 5%, ներմուծողն ապրանքը կթանկացնի ոչ թե 5, այլ՝ 7–8%–ով»,– ասաց նա:

Մակարյանի կարծիքով՝ ճիշտ կանոնակարգման արդյունքում կարելի է խուսափել այս ամենից:

«Տնտեսական մրցակցության պաշտպանության պետական կոմիտեն լավ կլինի արդեն նախապատրաստվի իրավիճակին, որպեսզի երբ շուկայում հայտնվեն անբարեխիղճ մրցակիցներ, կարողանա կանխարգելել»,– կարևորեց նա:

Շարունակությունը՝ «Փաստ» օրաթերթի այսօրվա համարում