«Ավրորայի» հանդիսատեսին հուզած հրաշամանուկը փոքրիկ ղարաբաղցի Միշան էր

Երեկ երեկոյան Երևանի Կարեն Դեմիրճյանի անվան մարզահամերգային համալիրում տեղի է ունեցել 2017թ. «Ավրորա» մրցանակի շնորհման արարողությունը, որին ներկա են եղել համաշխարհային ճանաչում ունեցող հայեր, հյուրեր՝ տարբեր երկրներից, բարերարներ ու իրենց գործի նվիրյալ մարդիկ, ովքեր իրենց ամենօրյա աշխատանքով փորձում են աշխարհն ավելի լավը դարձնել:

Հանդիսավոր միջոցառման ընթացքում բազմաթիվ գեղեցիկ ու հանճարեղ համարներ ներկայացվեցին բեմից, որոնցից մեկն էլ «Արի, իմ սոխակ» օրորոցայինն էր: Երգի վերջում հանրահայտ օպերային կատարողներին միացած «Արցախի ձայներ» նախագծից հայտնի փոքրիկ ղարաբաղցի Միշայի ձայնն էլ այնքան հուզիչ ու խորհրդանշական էր, որ հանդիսատեսը չկարողացավ զսպել հուզմունքը:

BlogNews.am-ն այսօր զրուցել է «Արցախի ձայներ» նախագծի պրոդյուսեր Լիրա Քոչարյանի հետ ու հետաքրքրվել Միշայի մասնակցության մանրամասներից:

«Ընդամենը երկու նոտա է երգել, բայց այդ երկու նոտայի համար այնքան աշխատանք է արվել»,- ասում է Լիրա Քոչարյանը: Իսկ թե ինչպես է «Ավրորայի» կազմակերպիչների ընտրությունը հենց Միշայի վրա կանգ առել, պրոդյուսերն այսպես պատասխանեց. «Ռուբեն Վարդանյանի հետ «Արցախի ձայները» միշտ լավ հարաբերություններ է ունեցել: Պարոն Վարդանյանը սիրում ու հարգում է մեր կոլեկտիվը, Միշային էլ հինգ տարեկանից է ճանաչում: Երբ Արցախում է լինում, հանդիպում ենք, նա ներկա է լինում մեր ելույթներին, նաև հովանավորում է մեր փորձերի համար սարքավորումների համար, մի խոսքով՝ միշտ աջակցում է մեզ: Բացի այդ՝ միջոցառման հանդիսավոր մասի ռեժիսորը Ալեքսանդր Ռևզինն էր, ով Միշային ճանաչում է մանկական «Նոր ալիքից», ու քանի որ սցենարով նախատեսված էր, որ «Արի, իմ սոխակ» երգի վերջում պետք է երեխա միանա երգիչներին, թե՛ Ռևզինը, թե՛ Ռուբեն Վարդանյանը գտան, որ լավագույն թեկնածուն հենց Միշան է: Դրանից հետո Ռևզինն է կապվել ինձ հետ ու ասել, որ նման մտահղացում կա: Սկզբում կարծում էի, թե խոսքը ինչ-որ հատվածի մասին է, բայց հետո պարզվեց, որ այդ փոքրիկ կտորն է միայն: Սկսեցինք աշխատել: Ստեփանակերտից մեկ անգամ եկել ենք փորձի նվագախմբի հետ, հետո էլ արդեն ելույթից առաջ ենք երկու փորձ ունեցել»:

Լիրա Քոչարյանն ասում է, որ Միշան շատ հեշտ է հարմարվել միջավայրին, ու բոլորովին չի լարվել՝ չնայած հսկայական համերգասրահին, բազմահազարանոց հանդիսատեսին ու իր համար ոչ ստանդարտ բովանդակությամբ միջոցառմանը. «Ավրորայի կազմակերպիչների, նոմինանտների ու անցած տարվա հաղթողի հետ Միշան արդեն ծանոթ էր, որովհետև, երբ «Ավրորան» Արցախում էր, մեծ հանդիպում էր կազմակերպվել, ու «Արցախի ձայները» ելույթ է ունեցել նրանց համար: Այդ հանդիպումը շատ ջերմ ու մտերիմ է անցել, և մեր երեխաներին էլ շատ են սիրել հյուրերը, շփվել նրանց հետ:

Այդ պատճառով արդեն «Ավրորային» Միշան իրեն լավ էր զգում, չէր կաշկանդվում, որովհետև ճանաչում էր ներկաներից շատերին: Փոքրիկին մի քիչ շատ ենք չարչարել, սակայն այդ ամենը հօգուտ իրեն է: Կարող էինք չմասնակցել նվագախմբի հետ փորձին, որին հասնելու համար Միշան գիշերն է Արցախից Երևան հասել, բայց ոչ, ամեն օր չէ, որ կենդանի նվագակցությամբ նվագախմբի հետ աշխատելու հնարավորություն է լինում, այն էլ՝ այդ մակարդակի նվագախմբի հետ ու այդքան լուրջ միջոցառման համար»:

Այն, որ միջոցառման ամենահուզիչ պահերից մեկը հենց Միշայի մասնակցությամբ համարն էր, անվիճելի է: Լիրա Քոչարյանն ասում է, որ դահլիճում նստածների համար այդ հուզմունքը մի քանի անգամ ավելին էր. «Քանի որ, ըստ սցենարի, Միշայի ելույթը ոչ թե բեմից, այլ դահլիճից էր. սա ներկաներին իսկապես անակնկալի բերեց: Բոլորն ուզում էին պարզել՝ որտեղից է երգում փոքրիկը, որտեղից է հնչում նրա ձայնը: Միջոցառման վերջում բոլորը մոտենում էին Միշային, նկարվում նրա հետ, համբուրում ու նաև արտասվում, որովհետև շատ հետաքրքիր խորհուրդ ուներ Միշայի հայտնվելն այդ համարում: «Արի, իմ սոխակը» հաջորդել է Արթուր Ջանիբեկյանի ելույթին, որի մեջ նա հայ ժողովրդի ամենամեծ ձեռքբերումը Արցախը նշեց, ու Միշկայի մասնակցությունն այս առումով շատ սիմվոլիկ էր»:

Ինչպես նշեց Լիրա Քոչարյանը, առաջիկայում փոքրիկ ղարաբաղցի Միշայի պլանները շատ են. «Ավրորայից» անմիջապես հետո Միշան մեկնել է մանկական «Նոր ալիքի» միջոցառումներից մեկին մասնակցելու, իսկ արդեն հունիսի 3-ին պատրաստվում ենք Միշայի նոր տեսահոլովակի նկարահանումներին: Նոր երգ է, հետաքրքիր, տարբերվող, ու հուսամ՝ այն նոր գույն ու երանգ կտա Միշայի երգացանկին: Միանգամայն նոր ու անսովոր լուծումներով տեսահոլովակ ենք նախատեսում ստանալ»,- իր խոսքում հույս հայտնեց Լիրա Քոչարյանը:

Նյութը՝ Արմինե Հայրապետյանի

Լուսանկարները՝ Լիրա Քոչարյանի անձնական արխիվից