Ադրբեջանի «խավիարային դիվանագիտության» հերթական տապալումը. «Փաստ»

«Փաստ» օրաթերթը գրում է.

Առաջիկայում Իտալիայում կսկսվեն դատական լսումներ, որոնք վերաբերելու են փողերի լվացմանը: Գլխավոր գործող անձը Քրիստոնեադեմոկրատական կուսակցության նախկին պատգամավոր, ԵԽԽՎ–ում Եվրոպայի ժողովրդական կուսակցության խմբակցության նախկին ղեկավար Լուկա Վոլոնտեն է, ում մեղադրում են Ադրբեջանի իշխանությունների կողմից 2,39 մլն եվրո ստանալու մեջ:

Գործի քննությունն սկսվել էր դեռ անցած տարի: Միլանի դատախազությունը բացահայտել էր բանկային կասկածելի գործառնությունների մի բարդ սխեմա, որի արդյունքում պատգամավորի բանկային հաշիվները պարբերաբար ավելանում էին խոշոր գումարներով այն դեպքում, երբ Վոլոնտեն լուրջ բիզնես չուներ: Դատախազությունը նրան մեղադրել է կոռուպցիայի և հանցավոր ճանապարհով ստացված փողերի լվացման մեջ:

Գործի նյութերի համաձայն` Վոլոնտեն կաշառք է ստացել բրիտանական և օֆշորային ընկերությունների միջոցով: Ֆինանսավորման մեծ մասն ստացվել է բրիտանական «Hilux Services LLP»–ի և ադրբեջանական «Baktelekom MMC» ընկերությունների միջոցով: Հայտնի է, որ վերջին ընկերությունը սերտ կապեր ունի Ադրբեջանի նախագահի ընտանիքի հետ:

Օրերս ամերիկյան «BuzzFeed News»–ին տված հարցազրույցում Վոլոնտեն հայտնել է, որ ֆինանսավորել է սոցիալ–պահպանողական խմբերի ԱՄՆ–ում և Եվրոպայում, նրանց հաշվին է փոխանցել ավելի քան 200000 եվրո, որն իրեն է փոխանցել ԵԽԽՎ–ում Ադրբեջանի պատվիրակության նախկին անդամ Էլխան Սուլեյմանովը:

Վոլոնտեի փաստաբանները պնդում են, թե այդ ֆինանսավորումը եղել է օրինական, սակայն Իտալիայի դատախազության տվյալներով, այդ գործարքը եղել է ընդհանուր առմամբ մոտ 2.4 մլն եվրո փոխանցումների սխեմայի մաս, իսկ այդ գումարը Ադրբեջանի կառավարությունը 2012–2014 թթ. փոխանցել է Վոլոնտեի հիմնադրամներին ու ձեռնարկություններին:

Միլանի դատախազության պնդմամբ` այս վճարումները կատարվել են Եվրոպայի խորհրդում քաղաքական աջակցության դիմաց: Մասնավորապես, նշվում է, որ Ադրբեջանի ղեկավարությունը «գնել էր» Վոլոնտեին, որպեսզի վերջինս կարողանա տապալել 2013 թ. բանաձևը, որը դատապարտում էր Ադրբեջանի իշխանություններին երկրում ավելի քան 80 քաղբանտարկյալ ունենալու համար: Եվ իսկապես, 2013 թ. ԵԽԽՎ–ն 128 «դեմ», «79» կողմ ձայնով մերժել է բանաձևի քննարկումը` «մեղադրանքները չեն համապատասխանում իրականությանը» ձևակերպումով:

Ամերիկյան «BuzzFeed News»–ին տված այդ հարցազրույցում Վոլոնտեն նաև նշել է, որ Սուլեյմանովը խոստացել է 10 տարի շարունակ ամեն տարի «Novae Terrae» հիմնադրամի հաշվին փոխանցել 1 մլն եվրո: Սակայն իտալացի քաղաքական գործչին պատկանող այդ հիմնադրամին խոստացված գումարը փոխանցվել է միայն մինչև 2014 թ., քանի որ Սուլեյմանովը հայտարարել է, որ իր երկրում տնտեսական դժվարություններ կան և գումարը փոխանցել այլևս չի կարող: Թերևս պատճառն այն է եղել, որ քաղբանտարկյալների մասին բանաձևը տապալելուց հետո Վոլոնտեի «կարիքն» այլևս չի զգացվել:

Ի դեպ, այս գործով անցնում է նաև ԵԽԽՎ գործող ղեկավար Պեդրո Ագրամունտը: Արդյո՞ք նրա դեմ նույնպես պաշտոնական մեղադրանք կառաջադրվի, թե ոչ, կերևա առաջիկայում:

Իսկ Վոլոնտեի գործը դեռ շատ բան ջրի երես կհանի: Սպասենք դատական լսումների մեկնարկին:

Շարունակությունը` «Փաստ» օրաթերթի այսօրվա համարում