Դժգոհությունների նոր ալիք՝ ջրաչափի ցուցմունքը ֆիքսելու նոր եղանակի պատճառով. «Փաստ»

«Փաստ» օրաթերթը գրում է.

Քաղաքական անցուդարձին մասնակցող կուսակցությունների ու դաշինքների ներկայացուցիչների կողմից մարդկանց դռները թակողներից և իրազեկման թերթիկներ բաժանողներից հոգնած քաղաքացիների շրջանում մի նոր լարվածության ալիք է հասունացել:

Խոսքը ջրաչափի ցուցմունքի նկարը տեսուչին փոխանցելուն է վերաբերում: Շատ տեսուչներ սկսել են իրենց սպասարկման տարածքներում իրազեկման նոր թերթիկներ բաժանել, համաձայն որի այսուհետ ջրաչափի ցուցմունքը փոխանցելուց բացի անհրաժեշտ է նաև այն նկարել և վայբերի համապատասխան համարով փոխանցել տեղամասային տեսուչին:

Կապի «Վայբեր» ծառայության հնարավորություն չունեցող շատ բաժանորդներ անհանգստացած փնտրում են այն հարցի պատասխանը, որ եթե իրենց հեռախոսը այսպես ասած՝ հին սերնդի է և նման հնարավորություն չունի, ապա վաղն ինչ «աղետ» է սպասվում իրենց:

«Փաստին» դիմած քաղաքացին անհանգստացած ասում էր, որ իրենց տանը կապի նման միջոց չկա, իսկ հարևանն էլ տեղեկացրել է, որ եթե նկարը չուղարկի, ապա տույժ ու տուգանքի տակ կընկնի:

«Ամուսիններով ենք ապրում, երկուսս էլ թոշակառու ենք և նման հեռախոս երկուսս էլ չունենք: Ինչո՞ւ պետք է մեզ դրա համար տուգանեն, մենք ժամանակին և պարտաճանաչ վճարում ենք մեր ջրի վարձը: Ստացվում է, որ սա նոր սերնդի հեռախոս վաճառելու նոր ձև է՞»,– ասաց խմբագրություն այցելած տիկինը, որի անունը հասկանալի պատճառներով չենք հրապարակում:

Բողոքի հետքերով «Փաստը» զրուցեց «Վեոլիա Ջուր» ընկերության հանրային կապերի ծառայության պետ Մուրադ Սարգսյանի հետ: Նա տեղեկացրեց, որ այդպիսի հրաման չկա և չի էլ կարող լինել, որը բնակիչներին կպարտադրի նման սմարթֆոն գնել:

«Դա աբսուրդ է և գուցե ժողովուրդն է նման բան մտածել, բայց ես պաշտոնապես հայտնում եմ, որ «Վեոլիա Ջուր» ընկերության բաժանորդները կարող են միանգամայն հանգիստ լինել, քանի որ ջրաչափերի ցուցմունքների լրացման կարգի մեջ որևէ փոփոխություն չի եղել: Մեր տեսուչները պարտավոր են ժամանակ առ ժամանակ այցելել մեր բնակիչ–բաժանորդներին, ինչպես նաև իրավաբանական անձ հանդիսացող բաժանորդներին, նրանց ջրաչափերի ցուցմունքները գրի առնելու համար: Հիմնականում դա կատարվելու է սմարթֆոնների միջոցով, բայց թող մարդիկ դրանից չզարմանան, քանի որ ջրաչափի ցուցմունքը նկարելու միջոցով փոխանցվող տեղեկությունը օգնում է նաև ուսումնասիրել ջրաչափի տեխնիկական վիճակը»,– ասաց Մ. Սարգսյանը:

Նա նաև հավելեց, որ այն բաժանորդները, ովքեր ունեն սմարթֆոն տեսակի հեռախոսներ, ապա կարող են ինքնուրույն նկարել իրենց ջրաչափը և նկարը փոխանցել կա՛մ իրենց տեղամասը սպասարկող տեսուչին, կա՛մ զանգահարել 1–85 հեռախոսահամարով և հաղորդել իրենց ջրաչափի ցուցմունքը: Դրանից բացի բաժանորդները կարող են գրանցվել yerevanjur.am կայքում, ունենալ իրենց գաղտնաբառը, որի միջոցով նույնպես կարող են փոխանցել իրենց հաշվիչի ցուցմունքը: Հասարակությանը հուզող՝ հին ջրաչափերը նորով փոխարինելու հետ կապված հարցերի մասին էլ Մ. Սարգսյանը նշեց, որ ընկերությունն առաջիկայում պլանավորում է նման գործընթաց սկսել, բայց քանի որ դա բավականին ծավալուն գործընթաց է, ներկայում իրականացվում են նախապատրաստական աշխատանքներ:

«Ընկերությունը պետք է ջրաչափեր ձեռք բերի և այդ մասին մենք պատշաճ կարգով, ժամանակին կծանուցենք մեր բաժանորդներին: Այս պահի դրությամբ ջրաչափերի զանգվածային փոխարինում չի նախատեսում: Հետևաբար բաժանորդները հանգիստ կարող են օգտագործել այն ջրաչափերը, որոնք սարքին վիճակում են»,– ասաց Մ. Սարգսյանը:

Մնացած բոլոր դեպքերում, երբ ջրաչափերը պատշաճ չեն աշխատում կամ տեսուչների մոտ կասկածներ են առաջանում, ապա գործող նախկին կարգի համաձայն, հաշվիչները ուղարկվում են վերաստուգաչափման, նույն կարգով, ինչպես մինչ օրս իրականացվել է: Ընկերությունից տեղեկացնում են նաև, որ այս կարգում նույնպես առայժմ որևէ փոփոխություն չկա:

Շարունակությունը` «Փաստ» օրաթերթի այսօրվա համարում: