Հայաստանի Ազգային հերոս Վահագն Ասատրյանի ծննդյան օրն է

Այսօր հետմահու Հայաստանի ազգային հերոսի կոչմանն արժանացած ԶՈւ գնդապետ Վահագն Աստարյանի ծննդյան օրն է։ Փորձառու, զինվորների կողմից սիրված զինվորականը կդառնար 44 տարեկան։

23 տարիների անբասիր ծառայության ընթացքում գնդապետ Վահագն Ասատրյանի ղեկավարած ստորաբաժանումները մշտապես եղել են լավագույնների շարքում։

Նա զինվորների հետ զրույցում, նրանց դիմելիս միշտ մեջբերում էր Մոնթեին։

«Եթե ուզում եք զինվորը ենթարկվի, զինվորը հարգի հրամանատարին, պետք է հրամանատարը լինի գրագետ, պետք է սպան լինի կարդացած։ Դու դրանով դառնալու ես առաջնորդ, դրանով ստեղծելու ես հարգանքդ, շրջապատդ, թիմդ, որով վաղը կարողանալու ես հաղթել հակառակորդիդ»,- նշում էր սրտացավ,  անմիջական զինվորականը։

Վահագն Աստարյանին ճանաչողները նրան նկարագրում են հզոր ու մարդկային բարձր որակներ ունեցող մարդ, հոգատար հայր, հերոս ծնված զինվորական, առաջնորդ, որի հետևից գնում էր ողջ անձնակազմը։

Հոկտեմբերի 12-ին Հադրութում զոհված Վահագն Աստարյանի մարմինն ամփոփված է Եռաբլուր զինվորական Պանթեոնում՝ Մոնթեի, Սպարապետ Վազգեն Սարգսյանի շիրիմներից քիչ այն կողմ, մորեղբոր՝ Աստվածատուր Պետրոսյանի շիրիմի դիմաց։