Տղամարդը ներկայացել է ԱԱԾ աշխատակից և անհետ կորածի մորից փորձել է հափշտակել 1.207.500 ՀՀ դրամին համարժեք 2300 ԱՄՆ դոլար
2021 թվականի մայիսի 05-ին Երևանի առաջին ատյանի ընդհանուր իրավասության դատարանում գործ է ստացվել խոշոր չափի խարդախություն կատարելու հիմքով։
2021 թվականի մայիսի 07-ին՝ Երևան քաղաքի առաջին ատյանի ընդհանուր իրավասության քրեական դատարանի դատավոր Ա. Գաբրիելյանի կողմից կայացվել է քրեական գործը վարույթ ընդունելու մասին որոշում։
Դատավոր Ա. Գաբրիելյանի լիազորությունները կասեցվելու հիմքով քրեական գործը 2025 թվականի հուլիսի 15-ին վերամակագրվել և 2025 թվականի հուլիսի 16-ին հանձնվել է դատավոր Ս. Անդրեասյանին: 2025 թվականի հուլիսի 16–ին Երևան քաղաքի առաջին ատյանի ընդհանուր իրավասության քրեական դատարանը՝ նախագահությամբ դատավոր Ս. Անդրեասյանի, որոշում է կայացրել քրեական գործն ըստ առարկայական ընդդատության ՀՀ հակակոռուպցիոն դատարան փոխանցելու մասին։
2025 թվականի օգոստոսի 08–ին քրեական գործն ստացվել է ՀՀ հակակոռուպցիոն դատարան և մակագրվել է դատավոր Վահե Դոլմազյանին։
Մեղադրական եզրակացությունը
Գ․ Ք․-ին մեղադրանք է առաջադրվել այն բանի համար, որ նա, 2020 թվականի փետրվար ամսվա սկզբներին «Ֆեյսբուք» սոցիալական կայքում Է․ Վ․-ին ներկայանալով որպես «Արման Կարապետյան» տվյալներով օգտատեր, ծանոթացել է նրա հետ, ապա, ձեռք բերելով վերջինի վստահությունը, աշխատանքի տեղավորելու պատրվակով՝ Է․ Վ․-ից ստացել է վերջինի՝ իրավունք վերապահող պաշտոնական փաստաթուղթ հանդիսացող ՀՀ քաղաքացու նույնականացման քարտի լուսանկարը, որից հետո, «Էվոկաբանկ» ՓԲԸ-ից խարդախությամբ գումար հափշտակելու ուղղակի դիտավորությամբ, հիշյալ ընկերության էլեկտրոնային հարթակում Է․ Վ․-ի նույնականացման տվյալներն օգտագործելով և ներկայանալով որպես «Է․ Վ․», լրացրել է վարկ ստանալու վերաբերյալ դիմում, որի հիման վրա 2020 թվականի փետրվարի 21-ին վերջինի անվամբ ձևակերպել է 1.010.000 ՀՀ դրամի չափով «Single Touch» տեսակի սպառողական վարկ, որից 40.400 ՀՀ դրամ գումարը բանկի կողմից պահվել է որպես վարկի ստացման միանվագ գումար, իսկ մնացած գումարը փոխանցվել է Է․ Վ․-ի անվամբ գրանցված բանկային քարտին: Մի քանի օր անց՝ 2020 թվականի փետրվարի 24-ին, Գ․ Ք․-ն կանխիկացման եղանակով խարդախությամբ հափշտակել է նշված քարտում առկա, խոշոր չափերի՝ ընդհանուր՝ 969.900 ՀՀ դրամ գումարը: Բացի այդ, Գ․ Ք․-ն , «Էվոկաբանկ» ՓԲԸ-ից խարդախությամբ գումար հափշտակելու ուղղակի դիտավորությամբ, 2019 թվականի մարտ ամսին, գտնվելով իր ծանոթ Ե․ Գ․-ի հետ, գաղտնի լուսանկարահանել է վերջինի նույնականացման քարտը, ապա, առանց նրա գիտության, «Էվոկաբանկ» ՓԲ ընկերության էլեկտրոնային հարթակում ներկայացել է որպես «Ե․ Գ․» և նշված՝ իրավունք վերապահող պաշտոնական փաստաթուղթ հանդիսացող նույնականացման քարտի տվյալները լրացնելով վարկ ստանալու վերաբերյալ դիմումի մեջ՝ 2019 թվականի մարտի 28-ին Եղիշե Գալստյանի անվամբ ձևակերպել է 1.010.000 ՀՀ դրամի չափով «Single Touch» տեսակի սպառողական վարկը, որից 50.000 ՀՀ դրամ գումարը բանկի կողմից պահվել է որպես վարկի տրամադրման միանվագ գումարը, իսկ մնացածը փոխանցվել է Ե․ Գ․-ի անվամբ գրանցված բանկային քարտին: Մի քանի օր անց՝ 2019 թվականի ապրիլի 02-ին, 04-ին, 08-ին, 10-ին և 15-ին, Գ․ Ք․-ն կանխիկացման եղանակով խարդախությամբ հափշտակել է նշված քարտում առկա, խոշոր չափերի՝ ընդհանուր՝ 950.000 ՀՀ դրամ գումարը: Բացի այդ, Գ․ Ք․-ն, «Էվոկաբանկ» ՓԲԸ-ից խարդախությամբ գումար հափշտակելու ուղղակի դիտավորությամբ, 2019 թվականի ապրիլի 18-ին, գտնվելով իր ծանոթ Վ․ Հ․-ի տանը, լուսանկարահանել է վերջինի նույնականացման քարտը, ապա, առանց նրա գիտության, «Էվոկաբանկ» ՓԲ ընկերության էլեկտրոնային հարթակում ներկայացել է որպես «Վ․ Հ» և նշված՝ իրավունք վերապահող պաշտոնական փաստաթուղթ հանդիսացող նույնականացման քարտի տվյալները լրացնելով վարկ ստանալու վերաբերյալ դիմումի մեջ՝ 2019 թվականի ապրիլի 18-ին, վերջինի անվամբ ձևակերպել է 1.010.000 ՀՀ դրամի չափով «Single Touch» տեսակի սպառողական վարկը, որից 50.000 ՀՀ դրամ գումարը բանկի կողմից պահվել է որպես վարկի տրամադրման միանվագ գումար, իսկ մնացած գումարը փոխանցվել է Վ․ Հ-ի անվամբ գրանցված բանկային քարտին: Մի քանի օր անց՝ 2019 թվականի ապրիլի 22-ին, Գ․ Ք․-ն կանխիկացման եղանակով խարդախությամբ հափշտակել է նշված քարտում առկա խոշոր չափերի՝ ընդհանուր 950.000 ՀՀ դրամ գումարին: Բացի այդ, Գ․ Ք․-ն, «Էվոկաբանկ» ՓԲԸ-ից խարդախությամբ գումար հափշտակելու ուղղակի դիտավորությամբ, գործով չպարզված հանգամանքներում և ժամանակահատվածում, ձեռք է բերել Գ․ Մ․-ի ՀՀ քաղաքացու նույնականացման քարտի անձնական տվյալները և «Էվոկաբանկ» ՓԲ ընկերության էլեկտրոնային հարթակում ներկայացել է որպես «Գ․ Մ» և նշված՝ իրավունք վերապահող պաշտոնական փաստաթուղթ հանդիսացող նույնականացման քարտի տվյալները լրացնելով վարկ ստանալու վերաբերյալ դիմումի մեջ՝ 2019 թվականի փետրվարի 19-ին, վերջինի անվամբ ձևակերպել է 1.000.000 ՀՀ դրամի չափով «Single Touch» տեսակի սպառողական վարկը, որից 50.000 ՀՀ դրամ գումարը բանկի կողմից պահվել է որպես վարկի տրամադրման միանվագ գումար, իսկ մնացած գումարը փոխանցվել է Գ․ Մ-ի անվամբ գրանցված բանկային քարտին: Մի քանի օր անց՝ 2019 թվականի փետրվարի 26-ին, Գ․ Ք․-ն կանխիկացման եղանակով խարդախությամբ հափշտակել է նշված քարտում առկա խոշոր չափերի՝ ընդհանուր 950.000 ՀՀ դրամ գումարը: Բացի այդ, Գ․ Ք․-ն, «Էվոկաբանկ» ՓԲԸ-ից խարդախությամբ գումար հափշտակելու ուղղակի դիտավորությամբ, գործով չպարզված հանգամանքներում և ժամանակահատվածում, ձեռք է բերել Ա․Հ․-ի նույնականացման քարտի անձնական տվյալները և «Էվոկաբանկ» ՓԲ ընկերության էլեկտրոնային հարթակում ներկայացել է որպես «Ա․Հ․ » և նշված՝ իրավունք վերապահող պաշտոնական փաստաթուղթ հանդիսացող նույնականացման քարտի տվյալները լրացնելով վարկ ստանալու վերաբերյալ դիմումի մեջ՝ 2020 թվականի հունիսի 26-ին, վերջինի անվամբ ձևակերպել է 962.000 ՀՀ դրամին համարժեք 2.000 ԱՄՆ դոլարի չափով «Single Touch» տեսակի սպառողական վարկը, որից 38.480 ՀՀ դրամին համարժեք 80 ԱՄՆ դոլար գումարը բանկի կողմից պահվել է որպես վարկի տրամադրման միանվագ գումար, իսկ մնացած գումարը փոխանցվել է Ա․Հ․-ի անվամբ գրանցված բանկային քարտին: Մի քանի օր անց՝ 2020 թվականի հունիսի 29-ին, Գ․ Ք․-ն կանխիկացման եղանակով խաբեությամբ հափշտակել է նշված քարտում առկա խոշոր չափերի՝ ընդհանուր 950.000 ՀՀ դրամ գումարը: Բացի այդ, Գ․ Ք․-ն, տեղեկանալով, որ Արցախի Հանրապետության քաղաքացի, ժամկետային զինծառայող Թ․ Ա․-ն, մասնակցելով 2020 թվականի սեպտեմբերի 27-ին Ադրբեջանի Հանրապետության կողմից Արցախի Հանրապետության դեմ սանձազերծված պատերազմին, անհետ կորել է, Թ․ Ա․-ի մորից խարդախությամբ խոշոր չափերի՝ 1.207.500 ՀՀ դրամնին համարժեք 2300 ԱՄՆ դոլար և 60.000 ՀՀ դրամ հափշտակելու մեկ միասնական դիտավորությամբ, վերջինի մոտ վստահություն ձեռք բերելու նպատակով ներկայացել է որպես ՀՀ ԱԱԾ աշխատակից և հայտնել, թե իբր ՌԴ անվտանգության դաշնային ծառայության համապատասխան պաշտոնատար անձանց միջոցով ճշտել է, որ նրա որդին գտնվում է Բաքու քաղաքի քրեակատարողական հիմնարկներից մեկում, և նրա համար հագուստ ձեռք բերելու պատրվակով 2021 թվականի հունվարի 14-ին անհետ կորածի մորը փոխանցման միջոցով խաբեությամբ ստացել է 60.000 դրամ գումար, իսկ Թ․ Ա․-ին Հայաստան տեղափոխելու համար նշված պաշտոնատար անձանց 4.500 ԱՄՆ դոլար կաշառք տալու պատրվակով, որպես «կարծեցյալ միջնորդ» 2021 թվականի փետրվարի 05-ին պահանջել է փոխանցել 2.300 ԱՄՆ դոլար գումար, միաժամանակ նրան մոլորեցնելու, նրա գիտակցության և կամքի վրա ազդելու նպատակով ասել, թե իբր պատրաստ է պահանջված 4.500 ԱՄՆ դոլար գումարից 2.200 ԱՄՆ դոլարը վճարել անձամբ, այդ կերպ դրդելով պաշտոնատար անձանց տալ առանձնապես խոշոր չափերով 1.115.000 ՀՀ դրամին համարժեք 2.200 ԱՄՆ դոլար գումարի կաշառք, սակայն իր կամքից անկախ հանգամանքներում հանցագործությունն ավարտին չի հասցրել, քանի որ 2021 թվականի փետրվարի 10-ին, ՀՀ ԱԱԾ աշխատակիցների հսկողության ներքո՝ Երևան քաղաքի Դավթաշեն թաղամասում գումարի փոխանցման ժամանակ Գ․ Ք․-ն, նկատելով տարածքում գտնվող անձանց և գիտակցելով բացահայտվելու իրական սպառնալիքը, նշված գումարը վերցնելու համար չի մոտեցել կնոջը։
Այսպիսով՝ Տղամարդը ներկայացել է ԱԱԾ աշխատակից և անհետ կորածի մորից փորձել է հափշտակել 1.207.500 ՀՀ դրամնին համարժեք 2300 ԱՄՆ դոլար, բացի այդ 5 տարբեր անձանցից խաբեությամբ հափշտակել է շուրջ 5 միլիոն դրամ գումար։
Մեղադրյալիի նկատմամբ որպես խափանման միջոց կիրառված է կալանքը: Գործով հաջորդ դատական նիստը կկայանա հոկտեմբերի 28-ին, ժամը 13։00, թիվ 2 նիստերի դահլիճում։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
Mher Ananyan joins Unibank's Management Board
Moody’s changes the outlook on IDBank’s ratings to positive
Ucom Supports the Launch of "Remember the Animals" Educational Game
"Urgently Confirm Your Card Details": IDBank Warns of Hotel Booking Scams
Ucom Expands International Roaming Capabilities
Results of the Junius Tournament Announced: The Next Round Ahead
Customer Appreciation Day - This Time at IDBank’s “Erebuni” Branch
Ucom and Microsoft Innovation Center’s Cybersecurity Education Program Concludes with a Mini CTF Com...
"The Power of One Dram" to "Orran" Charitable Non-Governmental Organization
