«Նորից հեծանիվ հորինել» ու այդ հորինածով բիզնեսմենների կյանքը դժոխքի վերածել պետք չէ. «Փաստ»

«Փաստ» օրաթերթը գրում է.

Փոքր և միջին բիզնեսի ներկայացուցիչը, ով ծնվել և մեծացել է բիզնեսի մեջ և ներկայում էլ շարունակում է իր հոր հիմնած գործը՝ զբաղվում է ապրանքների ներկրմամբ և վաճառքով, ասում է, որ եթե իշխանություններն ուզում են բյուջե լցնել, ապա դրա համար այնքան պարզ ձևեր ու մեխանիզմներ կան, որ պետք չէ «նոր հեծանիվ հորինել» ու այդ հորինածով մարդկանց կյանքը դժոխքի վերածել:

«Գնում ես հարկային գումար վճարելու, նստած են մոտ 20 աղջիկ ու բոլորը կոֆե են խմում: Ես գնացել եմ գումար վճարեմ, ասում եմ՝ եկեք գումարը ստացեք, ասում են՝ կոֆեն խմենք վերջացնենք կգանք»,– ասում է բիզնեսմենը:

Նա առաջարկում է եղած «մեկ պատուհանի» ինստիտուտն այնքան պարզեցնել ու գործուն դարձնել, որ մարդկանց համար շատ մատչելի լինի հաշվետվություն հանձնելն ու վճարում կատարելը: Բացի այդ, նրա կարծիքով այդքան աղջիկների, իր խոսքով՝ իրար գլխի լցնելու ու նրանց աշխատավարձ տալու փոխարեն, լավ կլինի էլեկտրոնային համակարգերը ակտիվանան: Մարդիկ կոֆե խմող հարկայինի աշխատակիցներից ու հերթերից կազատվեն ու կկարողանան բավականին ժամանակ խնայել: Բացի այդ, նա առաջարկում է վճարվելիք բոլոր հարկերը դարձնել հստակ ու կանխատեսելի, այսինքն՝ հաստատագրված, իսկ դրանից հետո բիզնեսմենը տակ կտա, թե օգուտով կաշխատի, պետությունը դրա մեջ որևէ մեղք չի ունենա:

«Բոլոր պետություններում ամեն ինչ շատ պարզ է և բիզնեսմենը կարողանում է նախապես հաշվարկել իր օգուտն ու վնասը: Բայց մեզ մոտ ոչ միայն դա կանխատեսելի չէ, այլև շատ այլ հարցեր կան, որոնք գումարվում ու դժոխքի դուռն են հասցնում տնտեսվարողներին»,– ասաց մեր զրուցակիցը:

Նրա հաջորդ օրինակը վերաբերում էր Չինաստանից ներկրված ոսկեգույն նյութով պատված բեռի անվտանգության չափանիշներին համապատասխանելու մասին լաբորատոր զննությանը:

«Ապրանքից փորձանմուշ են վերցրել, որ տանեն լաբորատոր զննության ենթարկեն: Նախ ամեն ապրանքից մեկ օրինակ տարել են ջարդել, այսինքն՝ փչացրել: Դրա պատճառով երկու օր ներկրված բեռը մնացել է բեռնափոխադրող ընկերության պահեստում: Յուրաքանչյուր օրվա համար վճարել եմ 45000 դրամ: Երկրորդ օրը լաբորատորիայից ինձ թույլտվություն տալու փոխարեն, կանչել են ասում են՝ մեկ այլ անալիզ էլ ենք ուզում անել, որը 800 դրամ արժե: Ասում եմ՝ արեք, սա էլ ձեր փողը: Ինձ ասում են՝ վաղը արի պատասխանը տար: Փաստորեն, այդ 800 դրամանոց լաբորատոր ստուգման պատճառով ապրանքս պահեստում մեկ օր ավել մնաց, որի համար ես լրացուցիչ 45000 դրամ վճարեցի: Մինչդեռ կարելի էր այդ ստուգումն առանց հարցնելու անել, հետո ասել 800 դրամ էլ վճարի, քանի որ մի ստուգում ավել ենք կատարել, վճարի՝ պատասխանները վերցրու, գնա: Այդ դեպքում ես ոչ մի օր, ոչ նյարդեր և ոչ էլ 45000 դրամ ավելորդ չէի կորցնի: Սրանք այնքան պարզ բաներ են, որը ոչ մի երկրում չեք հանդիպի, բայց մեզ մոտ ցավոք սրտի դարձել է օրինաչափություն և ոչ մեկը չի մտածում այդ շղթան ճիշտ աշխատեցնելու մասին»,– ասում է բիզնեսմենը:

Նա հավաստիացնում է, որ ներկրողների 99%–ը համաձայն է, որ լաբորատոր ստուգման գումարները չվճարելու դեպքում իրենց բեռը պլոմբեն, առգրավվեն, բայց նման ձևերով, այսինքն մարդկանց նյարդերը սղոցելուն ու բիզնեսմեններին՝ նման ձևերով ֆինանսական վնաս պատճառելու մեխանիզմներին վերջ տրվի:

Ամենայն հավանականությամբ տվյալ լաբորատորիան, որը ապրանքի մաքսազերծման թույլտվություն տալու սխեմատիկ շղթայի մի օղակն է, մտածում է, որ ներկրողի համար նման «ֆորս մաժորային» իրավիճակներ ստեղծելու դեպքում շատերը գուցե կառաջարկեն այդ վնասը կիսելու «գնով» նույն օրը լաբորատոր փորձաքննության «պատասխանները» ստանալ:

Անկեղծ ասած այսօրինակ մանր թվացող դիպվածները, սարսափելի հիասթափեցնող երևույթներ են և ուղղակիորեն կապված են իշխանությունների հանդեպ չարությամբ լցվելուն: Եվ նման մարդուն ինչքան էլ բացատրես, որ հարկայինի պետը մեկ այլ հիմնարկի միջինից ցածր պաշտոնյայի կամայականության հետ կապ չունի, միևնույն է նա կասի՝ «խնդիրները համակարգային են, քանի որ ամեն տեղ էլ նույն մոտեցումն է»:

  Շարունակությունը` «Փաստ» օրաթերթի այսօրվա համարում