Գևորգ Մարտիրոսյանի նոր՝ «Քաջ զինվոր» երգի տեսահոլովակը՝ Ժաննա Բուտուլյանի, Կարեն Ասլանյանի և այլ հայտնիների մասնակցությամբ

Գևորգ Մարտիրոսյանի կատարմամբ նոր՝ «Քաջ զինվոր» երգի տեսահոլովակը շատ շուտով հեռուստադիտողը հնարավորություն կունենա վայելելու: Նկարահանման աշխատանքները տարվել են երեկ առավորյան`ժամը 7:00-ից. անտառային տեսարաններում աշխատել է մի ողջ անձնակազմ: Երգի ու տեսահոլովակի չափազանց նուրբ ու կարևոր լինելը պատասխանատվության մեծ զգացումով է պատել և՛ երգի հեղինակ Ռաֆֆի Ալթունյանին, և՛ տեսահոլովակի ռեժիսոր Խաչիկ Եղոյանին, և՛, իհարկե, երգիչ Գևորգ Մարտիրոսյանին ու նրա պրոդյուսեր Սամվել Ղազարյանին: ShowBiz.am-ը ներկա է եղել տեսահոլովակի նկարահանման աշխատանքներին և ձեզ է ներկայացնում աշխատանքի ընթացքը, դերասանների տպավորություններն ու ապրումները և, իհարկե, հետաքրքիր կադրերը:

Գևորգ Մարտիրոսյանը, ում վստահել են այս պատասխանատու աշխատանքի ամենամեծ հատվածը՝ երգի կատարումը, վստահեցնում է, որ չնայած չափազանց շատ պատասխանատվության զգացում ունենալուն, անչափ ոգևորված է և ուրախ. «Սա ինձ համար հերթական աշխատանք չէ. շատ կարևոր նշանակություն ունի՝ ներկայացնելով մեր հայ զինվորների կյնաքը, ապրումները, մայրերի կարոտն ու թախիծը. էմոցիոնալ առումով շատ հուզիչ է»: Երգիչը նկարահանումների ժամանակ վերապրում է իր կյանքի բանակային 2 տարիները: Այս ամենն իրեն շատ հոգեհարազատ է և, ինչպես ինքն է նշում, աչք փակելով փոքրիկ հանդիպող դժվարություններին՝ փորձում են ստանալ մնայուն տեսահոլովակ:

Երգչի պրոդյուսեր Սամվել Ղազարյանի խոսքով՝ երգը լսելուն պես շատ է հավանել և միանգամից ցանկացել է, որ այն Գևորգը կատարի. «Րաֆֆին այս երգը գրել էր իր համար, սակայն ես շատ հավանեցի և խնդրեցի, որ Գևորգը կատարի: Նվիրվելու է Ապրիլյան քառօրյա պատերազմին: Տեսահոլովակում Գևորգն ու իր զինակից ընկերները, որոնց մենք ենք նորից ընտրել, հավաքվել են մի փոքր հանգստանալու համար»:

Երգի խոսքերի և երաժշտության հեղինակ Րաֆֆի Ալթունյանն առաջին անգամը չէ, որ այս թեմայով է ստեղծագործել: Նրա՝ Քրիստինե Պեպելյանի կատարմամաբ «Հայ զինվոր» երգը բոլորին է հայտնի. «Երգը գրել եմ ինձ համար, ոչ մի հատուկ նշանակություն չի ունեցեցել, պարզապես ծագեց գաղափարը և ընկերներիս՝ Սամվելի ու Գևորգի հետ որոշեցինք, որ կատարի Գևորգը»: Երգը գրելիս երգահանը ոգեշնչվել է մեր դիրքերը պահող զինվորներից, ովքեր կյանքի գնով պահում են իրենց ընտանիքն ու հայրենիքը:

Ռեժիսոր Խաչիկ Եղոյանն առաջարկը ստացել է Սամվել Ղազարյանից և շատ հավանել գաղափարը. «Ինձ շատ դուր եկավ, որովհետև շատ կարևոր թեմա է: Հայրենիք, զինվոր, մայր. և հենց դրա համար էլ, չափազանց մեծ պատասխանատվություն կրող թեմատիկայից ելնելով, երբեմն հրաժարվում եմ նման գործերից: Թեման այսօրվա է, մեր ամեն օրվա կյանքն է՝ սահմանը, զինվորները: Տեսահոլովակում զինվորները գնում են մի տեղ հանգստանալու, սակայն ավարտը տխուր է լինելու»:

Տեսահոլովակում նկարահանվում են մերօրյա հեռուստասերիալներից հայտնի դերասաններ, որոնք իրենց կարծիքով և տպավորություններով կիսվեցին մեզ հետ.

Ժաննա Բուտուլյան

«Առաջարկը ստացել եմ Ղազարյան Սամվելից, ում, արդեն երկար ժամանակ է, ճանաչում եմ, մտերիմ ենք: Շատ եմ ուրախացել, որ հենց այս թեմատիկայով տեսահոլովակում եմ լինելու: Կերպարային առումով՝ առաջին բուժօգնություն եմ ցույց տալիս զինվորներին: Գևորգին թե՛ որպես մարդու, թե՛ որպես երգչի շատ եմ հավանում: Արդեն իսկ շատ լավ է անցնում ընթացքը նկարահանման, վստահ եմ՝ արդյունքներն էլ լինելու են շատ լավը»:

Կարեն Ասլանյան

«Առաջարկը ստացա ընկերներիցս՝ Գևորգից և Սամվելից: Ինձ համար մեծ պատիվ է խաղալ զինվորի կերպար: Պետք է փորձենք բարձր և ճիշտ ներկայացնել մեր հայ զինվորին: Երգը շատ լավն է, ընկերներով հավաքվել ենք, լավ գործ ենք անում: Առաջնայինը ինձ համար, եթե ներկայացնում ես զինվորի, պետք է լինես հոգով և ամեն ինչով պատրաստ: Շատ հաճելի է և պատվաբեր ինձ համար կրել զինվորականի համազգեստը»:

ShowBiz.am-ը ներկայացնում է տեսահոլովակի նկարահանման հետաքրքիր պահերն ու տեսարանները: