Ի հակակշիռ սակավաջրությանը՝ ստորգետնյա ջրային ռեսուրսներ կօգտագործվեն. «Փաստ»

«Փաստ» օրաթերթը գրում է.

Այս տարի արձանագրված սակավաջրությունը կարող է շատ լուրջ հետևանքներ ունենալ գյուղատնտեսության համար: Խնդրով մտահոգ կառավարությունը ճանապարհներ է փնտրում սակավաջրության հետևանքով ոռոգմանը սպառնացող խնդիրները նվազեցնելու համար: Այս նպատակով դեռևս մեկ տարբերակ է քննարկվում՝ ստորգետնյա ջրային ռեսուրսների օգտագործում:

Նախորդ շաբաթ կառավարության հերթական նիստի ընթացքում վարչապետ Կարեն Կարապետյանը հանձնարարել էր ՀՀ ջրային տնտեսության պետական կոմիտեի նախագահին 7–օրյա ժամկետում շահագրգիռ մարմինների հետ համատեղ մշակել և ֆինանսների նախարարություն ներկայացնել շարժական պոմպային սարքավորումների, խորքային պոմպերի ձեռքբերման, չշահագործվող խորքային հորերի վերականգնման, ինչպես նաև նորերի հորատման նախագծային աշխատանքների ֆինանսական հաշվարկները։ Վարչապետը հանձնարարել էր նաև ֆինանսների, տարածքային կառավարման և զարգացման, բնապահպանության նախարարներին՝ նախատեսված փաթեթը ստանալուց հետո՝ 10–օրյա ժամկետում ջրային տնտեսության պետական կոմիտեի հետ համատեղ նախաձեռնել համապատասխան գնումների և աշխատանքների մեկնարկման գործընթացը և դրանք ավարտին հասցնել մինչև ապրիլի 16–ը։

Կառավարության հաջորդ նիստը կկայանա այս հինգշաբթի՝ մարտի 29–ին: Հետաքրքիր է, այս ընթացքում պատկան մարմիններն արդեն հասցրե՞լ են վարչապետի հանձնարարականներով զբաղվել ու խնդիրների լուծման ու կարգավորման հարցում համապատասխան քաղաքականություն մշակել: Ամեն դեպքում, կարծում ենք, որ վարչապետը հաջորդ նիստին կհիշի նրանց ու գոնե ճշգրտող հարցադրումներ կհնչեցնի:

Նշենք նաև, որ ՀՀ գյուղատնտեսության, տարածքային կառավարման և զարգացման նախարարները, ջրային տնտեսության պետական կոմիտեի նախագահն ու մարզպետները 3–ամսյա ժամկետում պետք է ամփոփեն ջրային ոլորտում առկա ներդրումային ծրագրերը, որոշեն 2019 թ. առաջնահերթությունները և համապատասխան առաջարկություններ ներկայացնեն կառավարության աշխատակազմ։

Նիստի ընթացքում հանձնարարվել է նաև ոռոգման սեզոնի նախապատրաստական աշխատանքների պլանավորումն այսուհետ սկսել աշուն–ձմեռ ժամանակահատվածում:

Ըստ հիդրոմետ ծառայության տվյալների` Հայաստանի ջրամբարների լցվածությունը ցածր մակարդակի է՝ բացառությամբ Կեչուտի ջրամբարի: Ախուրյանի ջրամբարի լցվածությունը կազմում է 249 միլիոն խմ, այն դեպքում, որ ջրամբարն ունի 525 մլն խմ տարողություն: Արփի լճի լցվածությունը կազմում է 16,4 մլն խմ՝ հնարավոր 105 միլիոնի փոխարեն: 91 միլիոն խմ տարողությամբ Ապարանի ջրամբարը լցված է 21,1 միլիոն խմ–ով, 70 միլիոն տարողությամբ Ազատի ջրամբարը` 31,9 միլիոն խմ–ով, 24 միլիոն խմ տարողությամբ Մարմարիկի ջրամբարը` 5,42 միլիոն խմ–ով, իսկ 25 միլիոն տարողությամբ Կեչուտի ջրամբարը` 23,6 միլիոն խմ–ով:

Հավելենք, որ Սևանա լճի մակարդակը այս տարվա մարտի 23–ի դրությամբ կազմում է 1900,47 մ, ինչը 4 սմ–ով ցածր է նախորդ տարվա նույն օրվա ցուցանիշից:

Շարունակությունը՝ «Փաստ» օրաթերթի այսօրվա համարում

Այս թեմայով «Վարորդի ընկեր»-ը դիմել է վարչապետին՝ տույժ-տուգանքների համար համաներում կիրառելու խնդրով. «Փաստ» «Հարցերը նախարարների մակարդակով չեն կարող լուծվել. պետք է բնապահպանական քաղաքականության փոփոխություն լինի». Լևոն Գալստյան. «Փաստ» ԿԳՆ-ն փոխել է 9-րդ և 12-րդ դասարանների պետական ավարտական քննությունների օրերը. «Փաստ» Նորանշանակ գյուղնախարարը 8,5 միլիոն դրամի վարկ է վերցրել. «Փաստ» Կոռումպացված լինելու թույլտվությունն ու արատավոր շղթան. Պայքարի ուղիները՝ ըստ Վարուժան Հոկտանյանի. «Փաստ»