Ո՞վ է աշխարհահռչակ գթության քույր, հայուհի Օլգան. «Փաստ»

«Փաստ» օրաթերթը գրում է.

«Այսօր ես եկել եմ ասելու ձեզ՝ օգնությունը ճանապարհին է»,– հոկտեմբերի 24–26–ը Վաշինգտոնում կայացած «Ի պաշտպանություն քրիստոնյաների» գագաթաժողովին Միացյալ Նահանգների փոխնախագահ Մայք Փենսն ազդարարել է Մերձավոր Արևելքի քրիստոնյա համայնքների նկատմամբ Վաշինգտոնի քաղաքականության արմատական փոփոխության մասին:

«Մերձավոր Արևելքի մեր քրիստոնյա բարեկամները չպետք է ապավինեն միջազգային կազմակերպություններին: Ամերիկան կարող է նրանց ուղղակի օգնել»,– հայտարարեց Փենսը:

Իր ելույթում փոխնախագահ Փենսը նաև հիշեցրել է, որ քրիստոնեությունը տարածվել է հենց Մերձավոր Արևելքից. «Սիրիայի սարերում, Լիբանանի հովիտներում, Նինվեի հարթավայրերում, Հայկական լեռնաշխարհում, Տիգրիսի և Եփրատի ափերից մինչև Նեղոսի դելտա մեր հավատքի հայրերն ու մայրերը Քրիստոնյա հավատքի սերմերն են տնկել»:

Իրաքից գագաթաժողովին ժամանած Մայր Օլգան ընդգծել է՝ Հայկական, Սիրիական և Խալդյան եկեղեցիները քրիստոնեությունն ընդունեցին դեռևս առաջին դարում առաքյալներից, հետևաբար և կոչվում են՝ Առաքելական:

«Մայրս հայ է և մինչ օրս աղոթում է միայն հայերեն, նշում Սուրբ Ծնունդը Հայ առաքելական եկեղեցու հետ, քանի որ կապված է իր արմատներին: Դա պետք է հարգել և թույլ տալ մարդկանց պահպանել կապն արմատների հետ»:

Իսկ ո՞վ է այս հայուհին:

Մայր Օլգան, Հռոմի կաթոլիկ եկեղեցու Բոստոնի թեմի «Նազարեթի Մարիամի դուստրեր» կանանց առաքելական կրոնական համայնքի հիմնադիրը և գթության քույրը, ծնվել և մեծացել է Իրաքում: Չորս պատերազմ է տեսել:

1993–ին ստեղծել է «Սիրիր հարևանիդ» շարժումը. քրիստոնյա և մահմեդական համայնքներից նա երիտասարդ տղամարդկանց և կանանց հրավիրեց` հոգալու Իրաքում ապրող աղքատների կարիքները:

Իրաքում Մայր Օլգան տարիներ շարունակ ծառայում էր բանտարկյալներին, անօթևաններին, ծերերին և հաշմանդամներին: Իրաքի կառավարությունը, բարձր գնահատելով նրա աշխատանքը, Օլգային մարդասիրական մրցանակի արժանացրեց:

Օլգան Իրաքի Էրեբի համալսարանի կենսաբանության և արյունաբանության ամբիոնի, ինչպես նաև Հռոմի Պապական Ուրբանյան համալսարանին կից Բաբելոնի քոլեջի փիլիսոփայության և աստվածաբանության մագիստրոս է:

2001–ին ուսանել է Միացյալ Նահանգներում` ստանալով Հովվական ծառայության բոստոնյան քոլեջի մագիստրոսական աստիճան: 2002–2011թթ. աշխատել է Բոստոնի համալսարանի կաթոլիկ կենտրոնի քոլեջում:

2009–ին Կարդինալ Պատրիկ ՕÿՄալլիի թույլտվությամբ Բոստոնի համալսարանում Օլգան նոր առաքելություն սկսեց. երիտասարդ կանանց աղոթքի և խոհեմության՝ «Նազարեթի տուն»:

2011–ին կարդինալը նրան իր թույլտվությունը տվեց` հիմնելու «Նազարեթի Մարիամի դուստրեր» կանանց առաքելական համայնք՝ Հռոմի կաթոլիկ եկեղեցու Բոստոնի թեմում:

Շարունակությունը՝ «Փաստ» օրաթերթի այսօրվա համարում