Գյուղնախարարությանը փող է պետք երինջների ձեռքբերման համար. երևի նախկինները նախկինում կերած փողերը «մարսել» են. «Փաստ»

«Փաստ» օրաթերթը գրում է.

Հայաստանում կաթի և մսի արտադրության աճ ապահովելու և կաթնային տավարաբուծությունը զարգացնելու նպատակով Գյուղատնտեսության նախարարությունը տավարաբուծության զարգացմանը նպաստող նախագիծ է առաջ քաշել: Այս մասին որոշման նախագիծը օրերս հայտնվել է Իրավական ակտերի նախագծերի հրապարակման միասնական կայքում:

Ըստ նախարարության՝ 2017–2022 թթ. տավարաբուծության զարգացման ծրագիրը հաստատելու մասին կառավարության որոշման նախագծի ընդունումը կնպաստի հանրապետությունում տոհմային տավարաբուծության զարգացմանը, հանրապետությունում բուծվող ցեղերի կատարելագործմանը, կաթի արտադրության ծավալների ավելացմանը, տոհմասելեկցիոն աշխատանքների բարելավման միջոցով տոհմային մատղաշների աճեցմանը և այլն:

Որոշման նախագծի ընդունումը պայմանավորված է Հայաստանի Հանրապետությունում տավարաբուծության զարգացումն ապահովելու նպատակով հանրապետությունում 2017–2022 թթ. տոհմային կենդանիների գլխաքանակն ավելացնելու և դրանցից ստացվող բարձր մթերատու և տոհմային արժեք ունեցող սերունդները ֆերմերային տնտեսություններին մատակարարելու անհրաժեշտությամբ:

Նշենք, որ Գյուղատնտեսության նախարարությունը տավարաբուծության զարգացման ծրագրի շրջանակներում 2007–2015 թթ. Ավստրիայի, Չեխիայի, Լիտվայի Հանրապետություններից և Գերմանիայի Դաշնությունից հանրապետություն են ներկրել 2506 գլուխ բարձրարժեք տոհմային երինջներ, որից հոլշտին ցեղի՝ 981 գլուխ, շվից ցեղի 932 գլուխ, սիմենթալ ցեղի՝ 593 գլուխ:

Ներկրված տոհմային երինջների բազայի վրա հանրապետությունում ձևավորվել են բարձր մթերատու նախիրներ, բացի այդ, սեփական վերարտադրության հաշվին ստացված և տեղում աճեցված տոհմային կենդանիները վաճառվել են ինչպես հանրապետության գյուղացիական տնտեսություններին, այնպես էլ հանրապետությունից դուրս:

Որոշման նախագծի նպատակը 2017–2022 թթ. տոհմային երինջների ձեռքբերման գործընթացի իրականացման համար անհրաժեշտ ֆինանսական միջոցների հատկացումն է: Այդ նպատակով նախատեսվում է օգտագործել Ֆինանսների նախարարության գանձապետական հատուկ հաշվին տոհմային երինջների արժեքների կուտակումից գոյացած գումարները:

Խմբագրության կողմից. Հիշեցնենք, որ հոկտեմբերի 19–ին «Փաստը» իր թիվ 168 համարում գրել էր «Սերգո Կարապետյանի ժամանակ 1,5 միլիոն դոլարի վնաս է հասցվել պետությանը. նոր քրեական գործ» վերնագրով նյութը, որում, մասնավորապես ասված էր. «ՀՀ քննչական կոմիտեի հատկապես կարևոր գործերի քննության գլխավոր վարչության վարույթում` ՀՀ գյուղատնտեսության նախարարության պաշտոնատար անձանց կողմից պաշտոնեական անփութություն կատարելու դեպքի առթիվ քննված քրեական գործով կատարված քննությամբ մի շարք խնդիրներ ու բացթողումներ են հայտնաբերվել «Հայաստանի Հանրապետությունում 2007–2015 թվականների ընթացքում տավարաբուծության զարգացման» ծրագրի իրականացման ժամանակ:

Մասնավորապես՝ քրեական գործով կատարված բազմակողմանի, օբյեկտիվ և լրիվ քննության արդյունքում պարզվել է, որ «Հայաստանի Հանրապետությունում 2007–2015 թվականների ընթացքում տավարաբուծության զարգացման» ծրագրի շրջանակներում ներկրված և տարաժամկետ վճարման պայմանով առքուվաճառքի պայմանագրերի հիման վրա տոհմային երինջների իրացման գործընթացը, ըստ էության, չի ապահովել հիշյալ ծրագրի արդյունավետ իրականացումը, որի հետևանքով գոյացել է պետության հանդեպ չկատարված ավելի քան 600 մլն դրամ պարտավորություն»։

Վերոշարադրյալը քաղվածք է ՀՀ քննչական կոմիտեի պաշտոնական գրությունից: Երբ գյուղնախարար էր Սերգո Կարապետյանը (2010–2016), բոլորին է հայտնի (բայց բոլորը լռում են), որ եվրոպաներից «բարձր սորտի» երինջների անվան տակ ՀՀ էին բերում ստերջ, հիվանդ, միայն կաշին ու ոսկորը վրան երինջներ և «սաղացնում էին» խեղճ գյուղացիների ու ֆերմերների վրա: Միլիոններ էին աշխատում այն սրիկաները, ովքեր խեղճ գյուղացուն ստիպում էին բանկերից վարկ վերցնել ու գնել այդ «ոջլոտ» կովերը: Կոմիտեն ընդամենը 1,5 միլիոն դոլարի վնաս է տեսել:

Ուրեմն մնացածը փաստաթղթերով «լղոզել են»: Եթե ստուգեն` նույն պատմությունն է լինելու նաև կարտոֆիլի և սելիտրայի ներկրման ոլորտում»

Շարունակությունը՝ «Փաստ» օրաթերթի այսօրվա համարում