Իրանի նախագահը գալու է Հայաստան՝ պատասխանների ետևից

Իրանի նախագահ Մասուդ Փեզեշքիանը պաշտոնական այց կկատարի Հայաստան առաջիկա երկու շաբաթների ընթացքում։ Այդ մասին հայտարարել է Իրանի արտաքին գործերի նախարար Աբբաս Արաղչին։ Նախարարը հիշեցրել է, որ նախագահ Մասուդ Փեզեշքիանը նախկինում այցելել է Իրաք, Պակիստան, Ադրբեջան և Կատար։ Իհարկե, իրանական կողմը չի նշում, բայց Փեզեշքիանի այս հանկարծակի որոշումը՝ Հայաստան այցելելու մասին, բնականաբար, կապված է տարածաշրջանային հաղորդակցությունների շուրջ ԱՄՆ-ի ակտիվացմամբ, Վաշինգտոնում արդեն այսօր կայանալիք բանակցություններով և դրանց հնարավոր հետևանքներով թե՛ Հայաստանի, թե՛ տարածաշրջանի վրա։

Իրանն բազմիցս հայտարարել է, որ օտարերկրյա պետություններին տարածաշրջանային խնդիրների կարգավորմանը ներգրավելը անթույլատրելի է, առավել ևս՝ Միացյալ Նահանգներինը, որի հետ Իրանը ունի թշնամական հարաբերություններ։ Եվ այժմ, Սյունիքով անցնող ճանապարհը ամերիկյան վերահսկողությանը տասնամյակներով հանձնելով՝ Փաշինյանը սպառնում է վերջնականապես փչացնել հայ-իրանական հարաբերությունները։

Ըստ երևույթին՝ Փեզեշքիանն անձամբ գալիս է Հայաստանում հարցեր բարձրացնելու, Փաշինյանից ստանալու այդ հարցերի պատասխանները, դրանից հետո իրենց քաղաքականությունը ճշտելու նպատակով։ Փաստացի, Հայաստանին և Իրանին դարձնելով թշնամի՝ Նիկոլ Փաշինյանը հերթական հարվածն է հասցնում հենց առաջին հերթին Հայաստանի Հանրապետությանը։

Տաթև Աղաբեկյան