2016 թվականին Հայաստանի ամենահնչեղ իրադարձությունները

2016 թվականը Հայաստանի համար լուրջ ցնցումների տարի էր: Հայաստանում, թե Հայաստանի շուրջ բազմաթիվ կարևոր իրադարձություններ տեղի ունեցան: Առանձնացրել ենք տարվա կտրվածքով առավել մեծ հնչեղություն ունեցած իրադարձությունները:

Ապրիլյան պատերազմ

Ապրիլի 2-ին ադրբեջանական զորքերը հարձակման անցան ԼՂ սահմանի հյուսիաարևելյան և հարավային ուղղությամբ: Ռազմական գործողությունները տևեցին 4 օր և ավարտվեցին Մոսկվայում կրակի դադարեցման վերաբերյալ պայմանավորվածությամբ: Քառօրյա պատերազմում հայկական կողմը 100-ից ավելի զոհ տվեց: Հակառակորդի հարձակումը հաջողվեց կասեցնել, սակայն մոտ 800 հեկտար տարածք մնաց Ադրբեջանի ձեռքում:

Հռոմի պապի այց

Հունիսի 24-ին Հայաստան այցելեց Հռոմի պապ Ֆրանցիսկոսը: Պապը եղավ Գյումրիում, Երևանում և Էջմիածնում: Հռոմի պապի Հայաստան այցի խորագիրն էր «Այց առաջին քրիստոնյա երկիր»: Պապը պատարագ մատուցեց Գյումրիում, Էջմիածնում, ելույթ ունեցավ Հանրապետության հրապարակում, որտեղ ներկա էին հազարավոր մարդիկ:

ՊՊԾ գնդի գրավում

Հուլիսի 17-ին «Սասնա ծռեր» խմբավորումը գրավեց Էրեբունու ՊՊԾ գունդը, որը շարունակվեց 2 շաբաթ: Գնդի գրավումն ուղեկցվեց բողոքի զանգվածային ակցիաներով և ոստիկանության կողմից ցուցարարների և լրագրողների նկատմամբ հատուկ միջոցների կիրառմամբ: Տարբեր օրերի հարյուրավոր մարդիկ ձերբակալվեցին և հայտնվեցին հիվանդանոցներում: Սպանվեցին 3 ոստիկաններ: Հուլիսի 31-ին խմբի՝ գնդում մնացած անդամները վայր դրեցին զենքը: «Սասնա ծռերի» գործով դատավարությունները դեռ շարունակվում են:

Օլիմպիական խաղերում ոսկե մեդալի նվաճում

Օգոստոսին Ռիո դե Ժանեյրոյում կայացած Օլիմպիական խաղերում 20 տարվա ընթացքում առաջին անգամ Հայաստանը ներկայացնող մարզիկը չեմպիոն դարձավ: Հունահռոմեական ոճի ըմբշամարտիկ Արթուր Ալեքսանյանը դարձավ օլիմպիական չեմպիոն: Հայաստանը ներկայացնող ևս 3 մարզիկ արժանացան արծաթե մեդալի:

Կառավարության փոփոխություն

Սեպտեմբերին տեղի ունեցավ կառավարության փոփոխություն: Վարչապետ նշանակվեց Կարեն Կարապետյանը՝ Երևանի նախկին քաղաքապետը և Հայռուսգազարդի նախկին տնօրենը, որը վերջին տարիներին բարձր պաշտոն էր զբաղեցնում Գազպրոմում: Վարչապետից բացի փոխվեց կառավարության կազմի կեսից ավելին:

Այլ հնչեղ իրադարձությունների շարքում են Վանաձորում և Գյումրիում ՏԻՄ ընտրությունների անցկացումը, Հայ-ռուսական համատեղ ՀՕՊ-ի ստեղծումը և միացյալ զորախմբի պայմանագրի ստորագրությունը, սեպտեմբերի 21-ի զորահանդեսին՝ «Իսկանդեր» զենիթահրթիռային համալիրի ցուցադրությունը, ֆուտբոլիստ Հենրիխ Մխիթարյանի տեղափոխությունը և խաղը Մանչեսթեր Յունայթեդում:

Դեկտեմբերի 21-ին Հայաստան ժամանեց Իրանի Իսլամական Հանրապետության նախագահ Հասան Ռոհանին

Նախագահ Ռոհանիի խոսքով` երկու ժողովուրդներն ունեն մեծ կապտալ, որը միմյանց կողքի բազմամյա բարիդրացիական հարաբերություններն են և այն ընդհանուր քաղաքակրթությունը, որն առկա է տարածաշրջանում եւ հատկապես Հայաստանի ու Իրանի միջեւ:

Հայաստան կատարած այցի շրջանակներում ԻԻն Նախագահ ՀասանՌոհանին վստահեցրեց նաև, որ Ազատ տնտեսական գոտին կարող է նպաստել երկու երկրների միջեւ հարաբերությունների ընդլայնմանը տնտեսական առումով: «Հայաստանի աշխարհագրական եւ Իրանի աշխարհագրական դիրքերը եւս չափազանց կարեւոր են, ու երկու երկրները կարող են ունենալ տարանցիկ միջանցք, հուսիս-հարավ առանցքում»,-ասաց Իրանի նախագահը` վստահեցնելով, որ երկու երկրների միջեւ հարաբերությունները խոչընդոտող ոչ մի հանգամանք չկա: