Գյուղերի ավելի քան 40%–ում գազ չկա, «Գազպրոմին» էլ 34 միլիոն ենք պարտք. «Փաստ»

«Փաստ» օրաթերթը գրում է.

2016 թ. բնական գազ են ստացել հանրապետության քաղաքային բնակավայրերի 91,8%–ը, գյուղական բնակավայրերի` 59,8%–ը: Ընդ որում, մինչ վերագործարկման աշխատանքները սկսելը բնական գազով գազաֆիկացված չեն եղել Շամլուղ, Մեղրի, Ագարակ և Դաստակերտ քաղաքները: Այս մասին տեղեկանում ենք Ազգային վիճակագրական ծառայության՝ «ՀՀ բնակարանային ֆոնդը և կոմունալ տնտեսությունը» 2016 թ. հրապարակումից:

Գազի փողոցային գործարկված ցանցի միագիծ երկարությունն 1997–2016 թթ. ընթացքում ավելացել է յոթն անգամ: Այսպես, ըստ ուսումնասիրության՝ 1997 թ. այն կազմել է 1000 կմ–ից մի փոքր ավելի, իսկ արդեն նախորդ տարվա տվյալներով՝ գերազանցել է 7 հազար կմ–ը: Ինչը հետաքրքիր է, եթե սրանից 20 տարի առաջ գյուղական ու քաղաքային բնակավայրերի գազի փողոցային ցանցի երկարություններն իրար հավասար էին, ապա արդեն այսօր գյուղական համայնքները բավական հետ են մնացել: Ըստ այդմ, գյուղական բնակավայրերում նշված ցուցանիշը չի անցնում 5000 կմ–ը:

1997 թ. սեպտեմբերից մինչև 2017 թ. հունվարի 1–ը բնական գազով գազաֆիկացվել է 679 հազար 421 բնակարան և բնակելի տուն, որից 508 հազար 518–ը քաղաքային բնակավայրերում է, իսկ մնացած 170 հազար 903–ը՝ գյուղական:

Դիտելով գազաֆիկացված բնակարանների և բնակելի տների բաշխումն ըստ մարզերի և Երևան քաղաքի 2016 թ. տարեվերջի տվյալներով, տեսնում ենք, որ մայրաքաղաքում առավելագույնս լուծված է գազաֆիկացման խնդիրը: Այսպես, ընդհանուրի 40%–ը բաժին է ընկնում Երևանին: Մյուս մարզերում այս թիվը տատանվում է 1–10%–ի սահմաններում: Եվ ամենից տխուր պատկերը տիրում է Վայոց ձորում՝ 1,1%:

Մեկ այլ գծապատկեր ցույց է տալիս, թե անցած 20 տարիների ընթացքում ինչպիսին է եղել հայաստանյան գազաֆիկացված բնակարանների թիվն ըստ գյուղական ու քաղաքային բնակավայրերի: Ըստ գծապատկերի՝ հեռավոր 1997 թ.–ին գյուղական բնակավայրերի գազաֆիկացված բնակարանների թիվը կազմել է մոտավորապես 17–18 հազար, իսկ քաղաքայինը՝ մի քանի հազարով պակաս: Այսօր արդեն, քաղաքներում գազով ապահովված բնակարանների թիվը անցնում է 552 հազարը, իսկ գյուղերում գազաֆիկացված տների քանակը ավելի քան երեք անգամ զիջում է քաղաքայինին:

Ըստ ՀՀ կառավարությանն առընթեր պետական եկամուտների կոմիտեի տեղեկատվության՝ 2016 թ. հանրապետություն մուտք է գործել 4 միլիոն 90 հազար 900 տոննա հեղուկ գազ: Ըստ «Գազպրոմ Արմենիա» ՓԲԸ տեղեկատվության՝ 2016 թ. գազամատակարարման բաժանորդային համակարգում ընդգրկվածներին տրվել է 389,7 տոննա հեղուկ գազ:

Բնական գազի կորուստը 2016 թ. կազմել է 39 միլիոն 817 հազար խորանարդ մետր, ընդ որում նախորդ տարի կորուստ չի գրանցվել միայն Գեղարքունիքի մարզում, իսկ ամենից շատն էլ գրանցվել է Երևանում:

Հանրապետությունում իրացված բնական գազի դիմաց չվճարելու պատճառով տարիների ընթացքում կուտակված պարտքը 2017 թ. հունվարի 1–ի դրությամբ կազմել է 34 միլիոն 277 հազար 700 դրամ, որից բնակչության` 16 միլիոն 74 հազար 300 դրամ:

Շարունակությունը՝ «Փաստ» օրաթերթի այսօրվա համարում