Ա՞ջ, թե ձախ. այս է խնդիրը...«Փաստ»

«Փաստ» օրաթերթը գրում է.

Տրանսպորտի, կապի և տեղեկատվական տեխնոլոգիաների նախարարությունը մտադիր է սահմանափակումներ մտցնել աջ ղեկ ունեցող ավտոմեքենաների նկատմամբ: Սակայն, թե այդ սահմանափակումներն ինչպիսի տեսք կունենան և ինչպես կկոչվեն, դեռևս չգիտեն անգամ նախարարությունում:

Տրանսպորտի, կապի և տեղեկատվական տեխնոլոգիաների նախարարի մամուլի քարտուղար Անահիտ Առաքելյանը «Փաստի» հետ զրույցում նշեց, որ սրա հետ կապված որևէ բան դեռևս որոշված չէ, ամեն ինչ քննարկումների մակարդակում է, և չեն կարող ասել, թե ինչ որոշման են հանգել.«Որևէ փաստաթուղթ չկա, քննարկումների և մշակելու փուլում ենք գտնվում: Այն, ինչ հրապարակման էր ենթակա, նախարարը հայտարարել է: Տարբերակներ շատ կարող են լինել, թե որին կհանգենք, դեռ պարզ չէ»,– նկատեց նախարարի մամլո քարտուղարը:

Որպես աջ ղեկով մեքենաների արգելքի առաջին նախապայման էր նշվում դրանց՝ վտանգավոր ու վթարների պատճառ դառնալու հանգամանքը: Իսկ արդյո՞ք որպես սրա ապացույց որևէ վիճակագրություն կա:

Այս հարցի պատասխանը, թերևս, շուտով կունենա Ոստիկանությունը: Ոստիկանության հասարակայնության հետ կապի և լրատվության վարչության պետ Աշոտ Ահարոնյանը «Փաստին» տեղեկացրեց, որ թեև Ճանապարհային ոստիկանությունում աջ ղեկային համակարգով տրանսպորտային միջոցների մասնակցությամբ ճանապարհատրանսպորտային պատահարների առանձին վիճակագրություն վերջին 10 տարում չի տարվել, սակայն վերջին շրջանում որոշակի վերլուծություն է կատարվել միայն 2017 թ. նշված տրանսպորտային միջոցներով տեղի ունեցած ճանապարհատրանսպորտային պատահարների մասով: Եվ այդ արդյունքների տրամադրումը տեղի կունենա վերջնական պատկեր ունենալու դեպքում:

Հայաստանում ավտոմեքենաներ ներկրող խոշոր ընկերությունները հիմնականում ներկրում են ձախակողմյան ղեկ ունեցող մեքենաներ: Բայց քիչ չեն և նրանք, որ մեծամասամբ աջակողմյան ղեկով մեքենաներ են ներկրում: «Ավտոիմպորտ Արմենիա» ընկերությունն իր ավտոմեքենաները ներկրում է Ճապոնիայից և Նահանգներից, որոնց 99%–ը աջ ղեկով են:

Ընկերությունից մեզ ասացին, թե վստահ են՝ նման արգելք չի լինելու, քանի որ նման օրենքը մեկ օրում չի ընդունվում, իսկ ղեկ փոխել ստիպելը շատ կոպիտ սխալ կլինի:

«Իրենք էլ կհասկանան, որ հնարավոր չէ: Կան մեքենաներ, որ պարզապես չի լինում փոխել: Ուրեմն թող պետությունը գնի այդ մեքենան իրենցից և փոխարենը ձախ ղեկով մեքենա տրամադրի»,– նշեց նա:

Ոչ մեկի համար հստակ գաղտնիք չէ այն, որ աջակողմյան ղեկով մեքենաները ավելի մատչելի են, ինչն էլ հենց դրդում է մարդկանց թեկուզ և փոքր–ինչ նեղվել, բայց սովորել այդպիսի ավտոմեքենա վարել:

Ինչպես մեզ տեղեկացրին «Ավտոիմպորտ Արմենիա»–ից, այդ ավտոմեքենաների գները կրկնակի տարբերություն են տալիս. «Եթե նույն մակնիշի մեքենան դիտարկենք, նույն տարեթիվն ու կարգավիճակը, ապա տարբերությունը կրկնակիից ավելի է. աջ ղեկով մեքենան 3 հազար ԱՄՆ դոլար է կազմում, իսկ ձախը՝ 6–7: Ղեկի փոխարինումն էլ միջինում 800–1000 դոլար է կազմում, բայց հետագայում արդեն խնդիրներ են առաջանում մեքենայի հետ՝ անսարքություններ են լինում: Եթե պետությունը մտածում է ավտովթարների քանակի մասին աջակողմյան ղեկի առկայության դեպքում, ապա այս դեպքում վթարներ ավելի շատ են լինելու, քանի որ մեքենաները տեխնիկապես խնդիրներ կունենան»,– նշեց մեր զրուցակիցը:

«Ավտովարորդների պաշտպանության» լիգայի նախագահ Տիգրան Հովհաննիսյանն էլ հաստատեց, որ շատ քիչ են աջ ղեկով վթարները: Հենց միայն դիտարկելով Գագիկ Շամշյանի հաղորդումը, որտեղ առ այսօր գեթ մեկ օրինակ չի եղել աջ ղեկով մեքենայի վթարի մասին:

Ըստ Հովհաննիսյանի՝ Ոստիկանության վթարների վիճակագրության հաշվարկները կեզրահանգեն նրան, որ աջ ղեկով մեքենաների մասնակցությամբ վթարները կկազմեն 10–20%: Այն էլ դեռ պետք է պարզել՝ այդ վթարները աջ ղեկով մեքենաների վարորդների պատճառով են եղել, թե ոչ: Հովհաննիսյանը աջ ղեկով մեքենաների արգելման երկու վարկած է տեսնում. «Կամ ուզում են բոլոր աջ ղեկով մեքենաների ղեկերը փոխել բիզնես նպատակով, կամ էլ խոշոր ներկրողները ցանկանում են արգելել աջ ղեկով մեքենաների ներկրումը, որպեսզի իրենց մեքենաները վաճառվեն: Ահա այստեղ է թաղված շան գլուխը: Ոստիկանները թող մտածեն երթևեկությունը կանոնակարգելու մասին և ոչ թե աջ ղեկով ավտոմեքենաները պատճառաբանեն»:

Հովհաննիսյանը նաև առաջարկում է բեռնաթափել Երևանը՝ կենտրոնական հատվածներից տեղափոխելով առևտրի մոլերը, ինստիտուտները, ու սկսեն ճանապարհներ կառուցել, ներդրումներ անել՝ փրկելու երթևեկությունը:

«Այս տարի 100%–ով գերազանցել ենք մեքենաների ներկրման քանակը, ինչի արդյունքում մենք կոլապսի առաջ ենք կանգնելու»,– նշեց նա: Լիգայի նախագահը հավաստիացրեց՝ որպես լուծում պատրաստվում են ավելի քան 1000 վարորդներով հավաքվել ու գնալ Բաղրամյան 26, սակայն, ըստ նրա ՊՊԾ–ի գնդի պես չեն կործանվելու. «Գնում ենք գործ անենք, փրկենք երթևեկությունը»:

 Շարունակությունը՝ «Փաստ» օրաթերթի այսօրվա համարում