Ինչպես են աշխատում ԱԺ պատգամավորները. «Փաստ»

«Փաստ» օրաթերթը գրում է.

ՀՀԿ–ական Ռուբեն Հովսեփյանը, «Բարգավաճ Հայաստան» կուսակցության անդամներ Հարություն Ղարագյոզյանը, Վահագն Մախսուդյանն ու Աբրահամ Մանուկյանն այսօր հայտնվել են «Փաստ» օրաթերթի՝ պատգամավորների աշխատանքը վերլուծող, այսօրվա համարի հոդվածում:
Այս պատգամավորներից ամենից շատ կողմ և ամենից քիչ դեմ քվեարկած պատգամավորը ՀՀԿ–ական Ռուբեն Հովսեփյանն է: Նա հօգուտ օրենսդրական նախաձեռնությունների 943 անգամ է քվեարկել, իսկ դեմ՝ 6 անգամ: Բացակայել է շատ քիչ՝ չորս տարվա մեջ 7 անգամ միայն, բայց դրա հետ միասին հարցեր և ելույթներ երբևէ չի ունեցել:
ԲՀԿ–ական պատգամավորները, ի տարբերություն իրենց ՀՀԿ–ական գործընկերոջ, ավելի շատ դեմ են քվեարկել, քան կողմ: Այսպես, Վահագն Մախսուդյանը կողմ է քվեարկել 502, Հարություն Ղարագյոզյանը 442 և Աբրահամ Մանուկյանն էլ՝ 244 անգամ: Այս երեքից ամենից շատ դեմ է քվեարկել Վահագն Մախսուդյանը՝ 71 անգամ: Նա նաև այս բոլորից ամենից շատ ձեռնպահ մնացած պատգամավորն է՝ դեմ կամ կողմ քվեարկելուց խուսափել է 165 անգամ: Այս երեք ԲՀԿ–ական պատգամավորներից ամենից շատ հարցուպատասխանի մասնակցել և ելույթներ է ունեցել Աբրահամ Մանուկյանը՝ համապատասխանաբար 10 և 14 անգամ: Վահագն Մախսուդյանը հարցուպատասխանի է մասնակցել 20 անգամ, իսկ ելույթ ունեցել՝ միայն մեկ անգամ: Նրանց երրորդ կուսակիցը՝ Հարություն Ղարագյոզյանը, պատգամավորական մանդատը ստանալուց հետո ո՛չ հարց է ունեցել, ո՛չ էլ՝ ելույթ: Բացի այդ, այս երեք ԲՀԿ–ականներից ամենից շատ թվով բացականեր ունի Աբրահամ Մանուկյանը, ով նախորդ չորս տարիների ընթացքում ԱԺ նիստերից բացակայել է 465 անգամ: Իր կուսակիցներ Վահագն Մախսուդյանն ու Հարություն Ղարագյոզյանը բացակայել են համապատասխանաբար 118 և 259 նիստից:
Ռուբեն Հովսեփյանը նախաձեռնություններ չունի, սակայն փոխարենը բավական շատ դրամական միջոցներ ունի, ըստ 2015 թ. հայտարարագրի՝ նա 59 միլիոն 761 հազար դրամ ունի:
Հարություն Ղարագյոզյանը նույնպես օրենսդրական նախաձեռնություններ չունի, նախորդ պատգամավորի պես նա էլ գրեթե նույնքան գումար է հայտարարագրել, ավելի կոնկրետ՝ 58 միլիոն 606 հազար դրամ:
Վահագն Մախսուդյանը նախաձեռնություններ չունի, ըստ www.parliamentmonitoring.am կայքի՝ վերջին շրջանում քննարկվող օրինագծերից դեմ է քվեարկել 2017 թ. բյուջեին: Դրամական միջոցները 2012 և 2015 թթ. փոքր–ինչ տարբեր են: Եթե պատգամավոր ընտրվելու տարում նա հայտարարագրել էր 14 միլիոն դրամ, ապա նախորդ տարվա տվյալներով՝ նա ունի արդեն 8 միլիոն 200 հազար դրամ:
Նշված պատգամավորներից Աբրահամ Մանուկյանը միակն է, ով անցած չորս տարիների ընթացքում գոնե մեկ նախաձեռնություն է բերել Ազգային ժողով: Նա վերարտադրողական առողջության վերաբերյալ օրենսդրական նախաձեռնության համահեղինակ է: ԲՀԿ–ական այս պատգամավորը իր մյուս գործընկերներից տարբերվում է նաև նրանով, որ նրանցից ամենահարուստն է: Նրա դրամական միջոցները, ըստ 2015 թ. Հայտարարագրի, կազմել են 464 միլիոն 552 հազար դրամ:

Շարունակությունը` «Փաստ» օրաթերթի այսօրվա համարում: