Ալյոշա Աբրահամյան. «Ֆուտբոլի մեջ ազնվություն պետք է լինի». «Փաստ»

«Փաստ» օրաթերթը գրում է.

Մեր հյուրն է ԽՍՀՄ չեմպիոն, «Արարատ–73»–ի դարպասապահ Ալյոշա Աբրահամյանը

Ֆուտբոլի Հայաստանի հավաքականը հոկտեմբերի 5–ին հերթական պարտությունը կրեց աշխարհի 2018 թ. առաջնության ընտրական փուլի եվրոպական գոտու մրցաշարում: 9–րդ տուրում Արթուր Պետրոսյանի գլխավորած թիմը Լեհաստանի հավաքականի հետ խաղում պարտվեց 1:6 հաշվով: Բացի երկրպագուներից՝ խաղը խայտառակ պարտություն որակվեց նաև հավաքականի ֆուտբոլիստների ու մարզչի կողմից:

– Պարո՛ն Աբրահամյան, երեկվա խաղից եմ ուզում սկսենք: Ի՞նչ խաղ ցուցադրվեց:

– Նախ՝ պետք է հաշվի առնենք, որ խաղացողների մի մասը վնասվածքներ ուներ:

Նման խաղի պատճառներից մեկը կարող էր և այդ հանգամանքը լինել: Առաջին գոլը խփելուց հետո դժվարություններ եղան:

– Իսկ շարունակական անհաջողությունների պատճառը ո՞րն է:

– Իհարկե, ես չեմ որոշողը, բայց առաջինը դիտարկենք. դրսից եկածներից ո՞վ պետք է գլուխ ցավեցնի: Եթե հրավիրում են՝ պիտի գաս, նամուսով ու մարդավարի ֆուտբոլ խաղաս, իսկ եթե չես ուզում՝ ուղղակի մի արի: Եթե չես ուզում՝ պիտի ուղղակի դիմում գրես՝ «չեմ ուզում խաղալ հավաքականում»:

– Ֆուտբոլիստների մոտ դաշտում այդ հոգեբանությո՞ւնն եք նկատել:

– Առհասարակ յուրաքանչյուր ֆուտբոլիստ, հավաքական մտնելով, աշխատում է այսպես ասած՝ զուտ անուն հանել, գլուխն այստեղ կամ այնտեղ գովալ: Բայց հավաքականում խաղալն այդքան էլ հեշտ չէ: Մանավանդ, երբ խաղում են այնպիսի թիմերի հետ՝ ինչպիսին Ռումինիան է, Լեհաստանը կամ Դանիան: Նրանք, իհարկե, ուժեղ թիմեր են՝ փարձառու տղերք են, որոնք խաղում են Եվրոպայի ամենալավ թիմերում: Իսկ մեզ մոտ մեծամասնությունը կամ Հայաստանում է խաղում, կամ էլ՝ դրսում, բայց չգիտես էլ ո՞ր լիգայում են խաղում, կամ առհասարակ խաղո՞ւմ են, թե՝ ոչ:

– ՀՀՖ–ի աշխատանքն ինչպե՞ս կգնահատեք: Ֆուտբոլիստներին ներգրավելու առումով ի՞նչ աշխատանք է տարվում:

–ՀՖՖ–ն ամեն ինչ անում է ֆուտբոլը լավը դարձնելու համար: Ինչքան հնարավոր է՝ անում է և առաջարկում: Հիմա մեր խաղացողների հնարավորությունը դա է:

– Միգուցե ճիշտ ընտրություն պետք է արվի:

– Այո, նվիրյալ տղերք պետք է լինեն հավաքականում:

– Կար մի ժամանակ, երբ ֆուտբոլն առաջընթաց ապրեց: Համենայն դեպս՝ խաղ կար, մինչ հայտնի սկանդալները, մի շարք ֆուտբոլիստների հեռացումը հավաքականից: Ինչպե՞ս պետք է ազատվել ճգնաժամից:

– Այո: Տղաներն, իհարկե, շատ պետք կգային հավաքականին: Ձեր նշած այդ ժամանակահատվածում թիմը մերվել էր, կարող էր խաղալ, օգուտ բերել: Չեմ կարող ասել, թե լավ արդյունք կար՝ բայց թիմն, այո, խաղում էր: Իսկ ճգնաժամից դուրս գալու համար հարկավոր է, որ մեր առաջնությունում շատ թիմեր լինեն: Ամենաքիչը տասը թիմ պետք է լինի, որ պայքարեն միմյանց հետ: Բացի այդ, ֆուտբոլի մեջ պետք է ազնվություն լինի: Դա այն մոտիվացիան կլինի, որը կօգնի թիմերին պայքարել եռյակ ընդգրկվելու, գավաթին հասնելու համար: Այդ ամենը կբերի նրան, որ իրենք կկարողանան դրսևորել իրենց: Ամենակարևորն այն է, որ մենք դարպասապահների պակաս ունենք:

Նշված խնդիրները հաղթահարելու դեպքում առաջխաղաղացում կլինի:

Շարունակությունը՝ «Փաստ» օրաթերթի այսօրվա համարում