Ոստիկանությունը ավտոմեքենաների վերանորոգման ծառայությունների համար 42 միլիոն դրամ կվճարի. «Փաստ»

«Փաստ» օրաթերթը գրում է.

Ոստիկանությունը պայմանագիր է կնքել «Տոյոտա Երևան» ընկերության հետ, որով ընկերությունը պարտավոր է Ոստիկանությանը պատկանող 225 միավոր «Տոյոտա» մակնիշի ավտոմեքենաների տեխզննման, տեխնիկական սպասարկման ու վերանորոգման ծառայություն իրականացնել: Ընդ որում՝ պայմանագրի պարտադիր պայման է համարվում փոփոխվող պահեստամասերի՝ նոր, չօգտագործված ու «Տոյոտա» ֆիրմայի արտադրության լինելու հանգամանքը:

Այն, որ պահեստամասերը պետք է լինեն հենց այս ընկերության, պարզից էլ պարզ է, բայց, գուցե, պահեստամասերից որոշը օգտագործվածով փոխարինելը պետական բյուջեի վրա ավելի քիչ արժենար: Վարորդների մեծ մասը հենց այդպես է վարվում, և դժգոհություններ շատ չկան: Իհարկե բնական է, որ բոլորը կձգտեին նորի ձեռքբերմանը, եթե իրենց ծախսերը նույնպես պետությունը հոգար:

Ինչևէ, ըստ պայմանագրի՝ ընկերությունը կսպասարկի և կամ կվերանորոգի Ոստիկանությանը պատկանող 225 ավտոմեքենա, որոնց մեծ մասը՝ 211–ը, «Տոյոտա Կարոլլա» մակնիշի են, 4–ը՝ «Տոյոտա Պրադո», 8–ը՝ «Տոյոտա Յարիս» և 2–ը՝ «Տոյոտա Հայս»: Ըստ պայմանագրի՝ ծառայության մատուցման ժամկետ է նշված մինչև դեկտեմբերի 15–ը:

Դիտելով պայմանագրի՝ Ոստիկանության ավտոմեքենաների համար անհրաժեշտ սպասարկման և վերանորոգման ծառայությունների աղյուսակը, կարելի է մտածել, թե այդ մեքենաների բոլոր մասերն են փոխում. մատուցվելիք ծառայությունների աղյուսակը մոտ տասը էջ տարածք է զբաղեցրել: Իսկ առաջարկվող գները տատանվում են մի քանի հազարից մինչև մի քանի միլիոն դրամ:

Ամենից թանկ ծառայությունը փոխանցման տուփի արժեքն է: «Կորոլլա» մակնիշի ավտոմեքենայի փոխանցման տուփի նորով փոխարինումը կարժենա 2 միլիոն 200 հազար դրամ, իսկ «Տոյոտա Քեմրիինը»՝ 4 միլիոն դրամ: Համեմատաբար մատչելի է շարժիչի վերանորոգումը՝ 300–450 հազար դրամի սահմաններում: Ըստ աղյուսակի՝ ամենից էժանը սառեցման հեղուկն է, որը կազմել է ընդամենը 4 հազար դրամ:

Շարունակությունը՝ «Փաստ» օրաթերթի այսօրվա համարում