Աղավնաձորցիները ստորագրահավաք են կազմակերպել. «Փաստ»

«Փաստ» օրաթերթը գրում է.

Վայոց ձորի մարզում բողոքի ալիք է հասունանում: Մարզի Աղավնաձոր համայնքում խոշորացման դեմ ստորագրահավաք է սկսվել: Արդեն մեկ շաբաթ է՝ աղավնաձորցիները Արենի համայնքին միավորվելու իրենց կարծիքն են հայտնում:

Սմբատ Ղազարյանը մեկն է նրանցից, ով իր ստորագրությամբ հաստատել է, որ չի ուզում հարազատ գյուղն այլ համայնքի կազմի մեջ տեսնել:

«Բոլորն էլ միակարծիք ասում են, որ գյուղը կայացած գյուղ է, պետք չի, որ տանեն ու միացնեն այլ գյուղերի հետ: Մենք արդեն իսկ մեծ գյուղ ենք, էս գյուղն իր անունն ունի, ոչ մեկ գյուղում չի ուզում խոշորացման մեջ մտնի»,– «Փաստ»–ի հետ զրույցում բողոքեց աղավնաձորցին:

Աղավնաձորի բնակիչները մտահոգված են իրենց համայնքի ճակատագրով:

«Անորոշ է լինելու մեր գյուղի ճակատագիրը: Ուզում են գյուղը զարգացնել, թող ձեռնարկություն բացեն ու մարդիկ աշխատեն, ոչ թե թողնեն Ռուսաստան գնան, մենակ գյուղերը իրար միացնելով չի»,–սրտնեղեց մեր զրուցակիցը:

Համայնքների խոշորացման ծրագրով պայմանավորված՝ Վայոց ձորի 6 համայնքներ` Ռինդ, Ելփին, Չիվա, Աղավնաձոր, Արենի, Խաչիկ համայնքները մեկ համայնք են դառնալու: Խոշորացված համայնքի կենտրոնը Արենին է լինելու: Նոյեմբերի 5–ին էլ այստեղ արդեն համայնքի ղեկավարի ընտրություն է կայանալու:

Աղավնաձոր համայնքի մակերսը` 10,71 կմ է կազմում: Այն գտնվում է Արփա գետի միջին հոսանքից հյուսիս: Համայնքն ունի 545 առկա տնտեսություն` 2062 բնակչությամբ։ Տեղի բնակչությունը գյուղատնտեսության միջոցով է ապրուստ վաստակում: Այստեղ զարգացած է հատկապես խաղողագործությունը:

Շարունակությունը՝ «Փաստ» օրաթերթի այսօրվա համարում