Մատակարարողների միջև մրցույթները ձևական են, համակարգը՝ խայտառակ վիճակում. «Փաստ»

«Փաստ» օրաթերթը գրում է.

Դպրոցական սննդից թունավորվելու վերջին դեպքը Գորիսում էր: Թիվ 3 հիմնական դպրոցի 27 աշակերտներ «աղիքային վարակ» նախնական ախտորոշմամբ Գորիսի բժշկական կենտրոն էին դիմել: ԿԳ նախարարի մակարդակով հայտարարվեց, որ սնունդ առաքողը դիզենտերիայով հիվանդ է եղել:

«Սպառողների խորհրդատվության կենտրոն» ՀԿ նախագահ Կարեն Չիլինգարյանի կարծիքով՝ դպրոցներում սննդի անվտանգությունն ապահովելու հետ կապված խնդիր կա:

«Խորհրդային տարիներին դպրոցական ճաշարաններում հստակ վերահսկողություն կար: Այդ տարիներին նման խնդիր գրեթե չի եղել: Իսկ հետխորհրդային ժամանակներում՝ մանավանդ վերջին շրջանում, խնդիրներ են առաջանում: Պետք է նկատենք, որ մի քանի տարի առաջ մեր երկրում ավելի վատ էր իրավիճակը, քան այսօր է, բայց դա չի նշանակում, որ խնդիր այլևս չկա:

Տարիներ առաջ ինչպես ցանկանում էին, այնպես էլ մատակարարում էին սնունդը: Պայմանավորվում էին տնօրենի հետ ու իրականացնում այդ գործառույթը: Խնդիրը չվերացավ, որովհետև մեր երկրում մատակարարողների միջև մրցույթները ձևական բնույթ են կրում: Առավելությունը ծանոթներին ու բարեկամներին է տրվում: Այդ գործելաոճը հիմա էլ կա: Համոզված եմ՝ նույն առաքիչներն ինչ–որ մեկի կամ կոնկրետ ԿԳՆ–ից որևէ մեկի ծանոթն են: Համենայն դեպս՝ խնդիրներ կան, որոնք չեն լուծվում»,–«Փաստ»–ի հետ զրույցում ասաց Կարեն Չիլինգարյանը:

Խոսելով պետական վերահսկողության մասին, Կարեն Չիլինգարյանը նկատեց.

«Միևնույն է, եթե անգամ Սննդի անվտանգության պետական ծառայությունն իր գործունեությունը պատշաճ ձևով իրականացնի, չեմ կարծում՝ հնարավոր լինի ամբողջ համակարգը վերահսկել:

Հնարավոր չէ ամբողջական վերահսկողություն կատարել, երբ ամբողջ համակարգն առողջ չէ: ՍԱՊԾ–ի վերահսկողությունը բավական չէ, եթե նույնիսկ իդեալական աշխատեն: Բացի այդ, դժվար թե այնքան մասնագետներ ունենան, որ ամբողջական վերահսկողություն իրականացնեն:

Ամեն ինչ փոխկապակցված պետք է լինի, համակարգն է խայտառակ վիճակում»:

Դիտարկմանը, թե գործ ունենք երեխաներին մատակարարվող սննդի հետ, և հարցին, թե ի՞նչ քայլեր են պետք նման խնդիրներից խուսափելու համար, մեր զրուցակիցը պատասխանեց.

«Եթե ՍԱՊԾ–ն վերահսկի գոնե մատակարարներին, գուցե այդպիսի խնդիրներ չլինեն կամ հասնեն նվազագույնի: Չի բացառվում, որ ամեն ինչ իդեալական լինի, արտադրամասն էլ նորմալ աշխատի, բայց մեկ այլ պատճառով անորակ սնունդ մատակարարվի: Հնարավոր է նաև, որ մի քանի օր առաջ ստուգեն ու ոչ մի խախտում չհայտնաբերեն: Բայց անգամ այդ հանգամանքը հարյուր տոկոսանոց երաշխիք չի տալիս, որ մի քանի օր հետո խնդիր չի առաջանա: Ճիշտ կլիներ, որ ոչ միայն ՍԱՊԾ–ն, այլև Առողջապահության նախարարությունը վերահսկեր ու դիտարկումներ անցկացներ այն արտադրամասերում, որոնք դպրոցներին և մանկապարտեզներին սնունդ են մատակարարում»:

Ինչ վերաբերում է նման դեպքերից դասեր քաղելու պրակտիկային, Կարեն Չիլինգարյանը նշեց, որ դեպքերից հետո սկսում են աշխատել, ստուգումներ անցկացնել, բայց էլի դրանք կրկնվում են:

«Ամբողջ համակարգով մեկ պետք է աշխատանք տարվի: Մեկ ոլորտով խնդիր լուծելը դժվար է»,– եզրափակեց Կարեն Չիլինգարյանը:

Շարունակությունը՝ «Փաստ» օրաթերթի այսօրվա համարում