Արցախից բռնի տեղահանված շուրջ 5000 ընտանիք «Գալաքսի» ընկերությունների խմբի կողմից ստացել է 100 տոննա օգնություն
«Միասնական և հոգատար». այս խոսքերը միավորել են «Գալաքսի» ընկերությունների խմբի աշխատակիցներին, որոնք ավելի քան երկու ամիս տևած աշխատանքների շրջանակում պատրաստել ու Արցախից բռնի տեղահանված 5000 ընտանիքների են փոխանցել իրենց ջերմությունն ու, իհարկե, առաջնային պարենային մթերքների արկղերը` ձմռան այս դժվար ամիսներին դիմակայելու համար: Շահառուների ընտրությունն ու աշխատանքի համակարգումը հնարավոր է եղել Հայկական կարմիր խաչի ընկերության անմիջական աջակցությամբ` կողմերի միջև ձևավորված գործընկերության շրջանակում: Պարենային մթերքների ընտրությունից մինչև տուփերի մեջ հատ-հատ տեղավորում, ապա որակի ստուգում. «Գալաքսին» պատասխանատվությամբ է մոտեցել աշխատանքին` արժանապատվությամբ ու նրբանկատությամբ այն շահառուներին փոխանցելու:
«Մեր ժողովրդին պատուհասած այս աղետի ժամանակ մարդկային հատկությունները պահպանելը, ուշադիր, սոցիալապես պատասխանատու լինելն այն կարևոր արժեքներն են, որին մենք և’ դավանել ենք, և’ շարունակելու ենք դավանել: Մենք գործով, ոչ թե խոսքով պիտի ցույց տանք, որ նման իրավիճակներում մարդ լինելը, թերևս, մեր ամենամեծ պարտականությունն է»,- ասել է «Գալաքսի» ընկերությունների խմբի համահիմնադիր, գլխավոր տնօրեն Արամ Խաչատրյանը:
«Միասնական և հոգատար» նախաձեռնությունը «Գալաքսիի» հիմնադիրների, խմբի կազմում հանդես եկող ընկերությունների և աշխատակիցների ջանքերի արդյունքն է, որտեղ և’ ֆինանսական, և’ կամավորական մեծ ներուժ է հավաքվել: Երևանում տեղավորելուց հետո, շուրջ 100 տոննա ընդհանուր ծավալով պարենամթերքը 20կգ կշռող արկղերի միջոցով տեղափոխվել են Լոռիում, Կոտայքում, Վայոց ձորում, Շիրակում, Գեղարքունիքում գտնվող Հայկական կարմիր խաչի կենտրոնակայաններ, ապա բաշխվել մարզերում բնակություն հաստատած 5000 արցախցի ընտանիքների: Սա իր տեսակով ամենախոշոր մարդասիրական նախաձեռնություններից է կորպորատիվ ոլորտի ընկերությունների շրջանում, որն իրականացվել է հոկտեմբերից հունվար ամիսների ընթացքում:
«Մենք երախտապարտ ենք «Գալաքսի» համայնքին` ցուցաբերած նախաձեռնողականության և պատասխանատու մոտեցման համար: Այս աղետի մասշտաբները շատ մեծ են և դեռևս ամբողջապես հասկացված չեն։ Այդ պատճառով յուրաքանչյուրիս ուշադրությունը շատ կարևոր է այդ մարդկանց կողքին կանգնելու համար: «Գալաքսի» ընկերությունների խումբն այդ առումով բացառիկ օրինակ է, թե ինչպես կարող է մասնավորը սոցիալական պատասխանատվություն դրսևորել։
Կորպորատիվ սոցիալական պատասխանատվությունը հումանիտար բնագավառում շատ կարևորվում ու գնահատվում է: 5000 ընտանիքների պարենային փաթեթների տրամադրման գործում մեծ էր կամավորական աշխատանքի հատվածը, առանց որի դժվար կլիներ իրականացնել այս ամենը: «Գալաքսի» ընկերությունների խումբը փայլեց նաև այդ հարցում: Հայկական կարմիր խաչը այս համագործակցությունը համարում է ստացված և շնորհակալություն է հայտնում «Գալաքսի» ընկերությունների խմբին՝ նախևառաջ նախաձեռնողականության և գործն ավարտին հասցնելու հետևողականության համար: Սա իրականում օրինակելի համագործակցություն է»,- նշել է Հայկական կարմիր խաչի գործադիր տնօրեն Աննա Եղիազարյանը:
«Միասնական և հոգատար» սոցիալական պատասխանատվության ծրագիրն իրականացվել է «Գալաքսի» ընկերությունների խմբում հանդես եկող «Այ Յու Նեթվորքս», «Խրոնոգրաֆ», «Գեյթ2», «Մեգաֆուդ», «Փոլ Հայաստան», «Սանտաֆե», «Տերյան5», «Թայմ», «Յուքոմ», «Երևան մոլ» ընկերությունների հետ միասին՝ հիմնադիրների զգալի ֆինանսական աջակցությամբ: Նախաձեռնության կազմակերպչական աշխատանքները իրականացվել են «ԱքսելՄոնդրիան և գործընկերներ» ընկերության կողմից: Աշխատանքների համակարգման համար կամավորագրված 300 աշխատակիցներ և նրանց ընտանիքի անդամները ցերեկային ու երեկոյան հերթափոխով փաթեթավորել են արկղերը, որպեսզի դրանք ապահով հասնեն շահառուներին, և այդ հարցում իր մեծ ավանդն ունի նախաձեռնության կազմակերպչական կոմիտեն և Խմբի մարդկային ռեսուրսների կառավարման տնօրինությունը:
«Արցախցի մեր հայրենակիցները պիտի զգան, որ մենակ չեն, որ միասնական ենք ստեղծված իրավիճակից դուրս գալու հարցում: Նրանք զրկվել են տարիներ շարունակ ստեղծած ու փայփայած տնից, ապրուստից, երաշխիքներից, ու մենք պիտի միասնական լինենք, ձեռք մեկնենք` իրավիճակից ելքեր գտնելու համար: Ինքս էլ ընտանիքիս հետ եմ ամբողջ աշխատանքները համակարգել․ սա ոչ միայն Խաչատրյան ընտանիքի ֆինանսական նվիրաբերությունն է, այլև մեր ընտանիքի ու մեր համայնքի հոգատարությունը մեր քույրերին ու եղբայրներին»,- նշել է «Գալաքսի» ընկերությունների խմբի համահիմնադիր և կառավարման խորհրդի համանախագահ Արտյոմ Խաչատրյանը:
«Մեգաֆուդ» ընկերության գլխավոր տնօրեն Արմինե Ենգիբարյանը, նկարագրելով ընկերության պահեստներում իրականացվող գրեթե շուրջօրյա աշխատանքները, նշում է․ «Այս բարեգործական նախաձեռնության կարևոր օղակներից մեկը մեր ընկերությունում ապրանքների պահեստավորման ու փաթեթավորման գործընթացի ճիշտ կարգավորումն էր: Մենք դա իրականացրել ենք պատասխանատվության բարձր զգացումով, քանի որ համոզված էինք, որ այն ապահովելու է բազմաթիվ ընտանիքների նվազագույն կարիքները»:
«Այս կարևոր նախաձեռնության բոլոր փուլերին մենք մասնակցել ենք պատասխանատվության բարձր գիտակցումով ու մեր հայրենիքի նկատմամբ ունեցած նվիրումով: Սա միայն բարեգործություն չէ, սա մթության մեջ լույս է, որ մենք վառել ենք: Մենք համատեղ ուժերով փորձել ենք նվազեցնել արցախցի հայրենակիցների սոցիալ-հոգեբանական բեռը»,- նշել է «Յուքոմ» ընկերության գլխավոր տնօրեն Ռալֆ Յիրիկյանը:
«Թայմ ընկերության ողջ անձնակազմը մեծ սիրով է մասնակցել այս գործընթացին: Մենք մեր բաժին պատասխանատվությունն ու նվիրումն ենք ցուցաբերել Արցախից բռնի տեղահանված մեր հայրենակիցների նկատմամբ. յուրաքանչյուր արկղում, բացի պարենային ապրանքներից, նրանց սեր ու քաջալերանք ենք հաղորդել: Համոզմունք ունենք, որ այդ էմոցիոնալ դաշտը փոխանցվել է այն ընտանիքներին, ովքեր եղել են այս նախաձեռնության շահառուները»,- նշել է «Թայմ» ընկերության գլխավոր տնօրեն Արսեն Մնացականյանը:
«Մենք փորձեցինք առաջնային պարենային արկղերի հետ միասին հոգատարություն ու ջերմություն փոխանցել մեր հայրենակիցներին, որի կարիքը, վստահ եմ, նրանք ունեն: Սա հայերի միասնականության ու միմյանց ձեռք մեկնելու հրաշալի օրինակ է»,- նշել է «Երևան մոլ»-ի գլխավոր տնօրեն Վազրիկ Սեկոյանը:
«Գալաքսի» համայնքն իր բոլոր ընկերություններով և Հայկական կարմիր խաչի ընկերությունը նախագծի այս փուլի ավարտից հետո փոխանակվել են թափանցիկության և հաշվետվության նյութերով, ինչպես նաև քննարկել հնարավոր նախագծերը` արցախցիների բեռը թեթևացնելու համար:
***
«Գալաքսի» ընկերությունների խումբը, հիմնադրված Արամ Խաչատրյանի, Գուրգեն Խաչատրյանի և Արտյոմ Խաչատրյանի կողմից, հայկական հոլդինգային ընկերություն է, որը ներկայացնում է 15 ընկերություն 3 երկրում։ Ընկերությունը ջանքեր ու միջոցներ է ուղղում Հայաստանում սոցիալական պատասխանատվության ծրագրերի իրականացմանը կրթության, սոցիալական զարգացման և արվեստի ոլորտներում, Հայաստանում մտքի առաջնորդության և մտավոր կապիտալի զարգացման համար։ Միայն վերջին տարիներին «Գալաքսին» իրականացրել է 64 մասշտաբային ԿՍՊ նախագծեր, որի շահառուներ են դարձել 10,000-ից ավելի մարդիկ։
Հայկական կարմիր խաչի ընկերությունը (ՀԿԽԸ), լինելով Կարմիր խաչի և Կարմիր մահիկի միջազգային շարժման լիիրավ անդամ, առաջնորդվում է Շարժման հիմնարար սկզբունքներով` Մարդասիրություն, Անկողմնակալություն, Չեզոքություն, Անկախություն, Կամավորություն, Եզակիություն, Համընդհանրություն։ Հանդիսանալով կառավարությանն աջակցող կառույց՝ մարդասիրական ոլորտում, ՀԿԽԸ-ն արդեն 104 տարի է գործունեություն է ծավալում հանրապետության ամբողջ տարածքում հետևյալ ռազմավարական ուղղություններով՝ աղետների կառավարում, բնակչության տեղաշարժ, սոցիալ – առողջապահություն, առաջին օգնություն, երիտասարդների հիմնախնդիրներին արձագանք, մարդասիրական արժեքների տարածում և այլն: ՀԿԽԸ առաքելությունն է նվազեցնել բնակչության խոցելիությունը` մարդասիրության ուժի մոբիլիզացմամբ, նախապատրաստվել դիմակայելու այն իրավիճակներին, որոնք կարող են բնակչության խոցելիության պատճառ դառնալ, ցուցաբերել անհրաժեշտ օգնություն` սատարելով սոցիալ-տնտեսական ծանր պայմաններում գտնվող մարդկանց:
Даст ли ход «папкам», или удовлетворится увольнением? «Паст»
Программа «Здоровая Евразия» вызвала большой интерес на MedMeet 2024
Очередная «шустрость» свалить на других собственные ошибки: «Паст»
Находясь ниже плинтуса говорят о «плинтусном» рейтинге: «Паст»
Как не разориться в Черную пятницу: 5 полезных советов
Арпине Саркисян будет назначена главой МВД РА
Армения – лидер среди стран СНГ по дороговизне услуг заведений общепита
Уголовное преследование в отношении предпринимателей продолжается: «Паст»
В Ереване подведены итоги 19-й ежегодной Международной олимпиады по микроэлектронике
Компания Ucom запустила сеть 5G в еще 11 городах
