Ֆրանսիական գրականության շունչը՝ Երևանի կենտրոնում. կանցկացվի «FRANCOFEST» փառատոնը

Երևանի «Սիրահարների այգում» սեպտեմբերի 9-ին «Newmag» հրատարակչությունը կանցկացնի «Ֆրանկոֆեստ» ֆրանսերեն գրքերի և ֆրանկոֆոն բովանդակության փառատոնը։ Այն համախմբելու է երիտասարդներին, բիզնեսի ոլորտի ներկայացուցիչներին, ընթերցասերներին ու պարզապես եվրոպական մշակույթի ու գրականության սիրահարներին: Այս փառատոնը գալիս է ոչ միայն ակտիվացնելու աշնանային գրքասեզոնը, այլև նպաստելու Հայաստանում ֆրանսերենի, ֆրանսալեզու գրականության հանրահռչակմանը։ Հրավիրված ասուլիսում  «Newmag» հրատարակչության տնօրեն Արտակ Ալեքսանյանը նշեց, որ զգալի աշխատանք է կատարվել այդ ուղղությամբ։  

«Հայ-ֆրանսիական քաղաքական, տնտեսական հարաբերությունները բավական ակտիվ են։ 1988 թվականին Ֆրանսիան առաջինն էր, որ ձեռք մեկնեց Հայաստանին, այնուհետև մեր երկրի համար կարևոր բոլոր հարցերում Ֆրանսիան մասնակցություն ունեցել է։ Բոլորովին վերջերս Փարիզի քաղաքապետն էր Հայաստանում, որը փորձում էր հումանիտար օգնություն հասցնել Արցախ։ Տնտեսական առումով ևս ակտիվություն կա, ֆրանսիական կապիտալը վաղուց է այստեղ։ Ինչ վերաբերում է մշակութային համագործակցությանը, ապա, կարծում եմ, որ մեր հաղորդակցությունը միակողմանի է եղել։ Հայաստանից չեն եղել շատ նախաձեռնություններ։ Ահա այս երկարամյա բարեկամության մեջ մենք ենք ուզում լինել նաև նախաձեռնող, փոխադարձ քայլ անող, որ ներկայացնենք ֆրանսիական բովանդակությունը, առավել ևս, որ հրատարակչական շուկայում շատ չեն ժամանակակից ֆրանսիացի գրողները»,-ասաց Արտակ Ալեքսանյանը։

«FRANCOFEST» փառատոնին «Newmag» հրատարակչությունը պատրաստել է չորս նոր գիրք։ Դրանք են՝ բելգիացի բարոնուհի Ամելի Նոտոմբի ինտելեկտուալ և հումորային գործը՝ «Կապույտ մորուքը», շվեյցարացի գրող Ժոել Դիկերի վեպը՝ «Ամբողջ ճշմարտությունը Հարի Քվեբերտի մասին», Անդրեյ Մակինի նոր վեպը՝ «Հայ ընկերը», և վաճառքի բացարձակ ռեկորդակիր, Անյես Մարտեն-Լուգանի սիրային դրաման՝ «Երջանիկներն ընթերցում են և սրճում»։ «Newmag» հրատարակչության գլխավոր խմբագիր Գնել Նալբանդյանը տեղեկացրեց, որ այդ օրը ներկայացվելու է նաև իրենց հրատարակած 150 անուն գիրք։ Գրքերի վաճառքի ժամանակ գործելու են զեղչեր։

«Մեզ համար շատ կարևոր է, որ երիտասարդ սերունդը ծանոթանա ժամանակակից ֆրանսիական գրականությանը։ Մենք և մեր ծնողները ճանաչել ենք ֆրանսիական դասական գրական հսկաներին և Ֆրանսիան գիտենք իրենց շնորհիվ։ Երիտասարդ և միջին սերունդը շատ լավ կապող օղակ կարող է լինել ֆրանսիական մշակույթը, գրականությունն ընկալելու գործում»,-ասաց Գնել Նալբանդյանը։

Փառատոնի բացման արարողությունը վստահված է «Արևիկ» մանկապատանեկան անսամբլին։ Ողջ օրվա ընթացքում կազմակերպիչները ընթերցասերների համար հագեցած ծրագիր են նախապատրաստել։  Փառատոնին ջազային համարներով կներկայանա սաքսոֆոնահար Դավ Հովհաննիսյանը։ Կլինի հեքիաթի ժամ, փոքրիկների համար ֆրանսերեն հեքիաթներ կընթերցեն «Alliance Française d'Arménie»-ի մասնագետները։ Այնուհետև կանցկացվի ֆրանսերենի բաց դաս սկսնակների համար։  Նախատեսված է թատերական ընթերցում բելգիացի բարոնուհի Ամելի Նոտոմբի «Կապույտ մորուքը» գրքից։ Երաժշտական կատարումներով հանդես կգա «Gorgeouz Beats»-ը: Հաջորդ երաժշտական անակնկալը երգի ու տեսահոլովակի պրեմիերա է։ ՀՀ վաստակավոր արտիստ Շուշան Պետրոսյանը կկատարի Շառլ Ազնավուրի «Պատերազմի մանուկները» հանրահայտ երգը հայերեն։ Երգը նվիրում է Արցախում մոտ 9 ամիս շրջափակման մեջ գտնվող 30.000 փոքրիկներին։