«Մայր Հայաստան» դաշինքը` հակաիշխանական բևեռ. Սպասելիքներ քարոզարշավի տպավորիչ մեկնարկից

Երևանի ավագանու ընտրությունների քարոզարշավի պաշտոնական մեկնարկն առավել տպավորիչ սկսեց «Մայր Հայաստան» դաշինքը` Անդրանիկ Թևանյանի գլխավորությամբ, ով քարոզարշավն սկսեց Հաղթանակի զբոսայգուց՝ Մայր Հայաստան արձանի մոտից: «Գտնում ենք, որ այս իշխանությունը հայտնվել է օրենքից դուրս կարգավիճակում, չունի լեգիտիմություն, ինքն Արցախը համարել է ադրբեջակական, դրանով խախտել է, և՛ այսօրվա Անկախության հռչակագիրը, որի ընդունման օրը մենք որպես տոն ենք նշում, և՛ Հայաստանի Սահմանադրությունը, և՛ իր իսկ նախընտրական ծրագիրը»,-լրագրողների հետ զրույցում ասաց Անդրանիկ Թևանյանը:

Թևանյանը նաև այս քարոզարշավին առանձնացավ «Մայր Հայաստանի» երաժշտական հոլովակով, որի հայերեն տեքստի հեղինակը հենց ինքն էր` Թևանյանը։ Երգի բառերի միջոցով մարդկանց հորդորում է ոտքի ելնել ու միանալ հանուն Արցախի, հանուն Հայաստանի գոյության մղվող պայքարի: «Մայր Հայաստանի» ներկայացուցիչները Երևանի փողոցներում բավականին տպավորիչ երթ արեցին, և շարժումը իսկապես տպավորիչ հակաիշխանական ձևավորվող ուժի տպավորություն թողեց։

 

Այստեղ կարևոր է նկատել, որ հենց մեկնարկում ուրվագծվեց հակաիշխանական հստակ բևեռ, որը հստակորեն առաջադրել է Հայաստանում ամբողջական իշխանափոխության հասնելու նպատակ: Այս առումով այս ընտրությունները Հայաստանի պատմության մեջ եզակի դեր կարող են կատարել, հաշվի առնելով դրանց անցկացման` երկրի համար դրամատիկ ժամանակաշրջանը։