Գեորգի Ավետիսյան. «Իշխանություններին ավելի հարմար է կառավարելի կիսագրագետների հետ աշխատել, քան մասնագետների». «Փաստ»

«Փաստ» օրաթերթը գրում է.

«Փաստ» օրաթերթն իր հուլիսի 18–ի համարում անդրադառնալով ՍԱՊԾ հանրապետական անասնաբուժասանիտարական և բուսասանիտարական լաբորատոր ծառայությունների կենտրոն ՊՈԱԿ–ի լաբորատոր գործունեության և հասարակայնության հետ կապերի գծով նախկին փոխտնօրեն Գեորգի Ավետիսյանի գործին, տեղեկացրել էր, որ անցյալ տարվա դեկտեմբերին ՍԱՊԾ նոր պետ՝ Իշխան Կարապետյանի նշանակումից հետո, ստիպված էր եղել աշխատանքից ազատվելու դիմում գրել, սակայն դիմումը ետ կանչելու իրավունքից օգտվելու ժամանակ պարզել է, որ ազատվել էր աշխատանքից իր դիմումի համաձայն:

«Փաստի» հետ զրույցում Գ. Ավետիսյանն ասել էր, որ ՍԱՊԾ ղեկավարությունն այնքան էր «շտապել» իրեն աշխատանքից ազատելու հարցում, որ նույնիսկ չէր սպասել, որ օրենքով սահմանված ժամկետները լրանան, նոր ազատման դիմումին ընթացք տան: Այս քայլը նա մեկնաբանում է որպես նոր ղեկավարության օրենքի չիմացության արդյունք:

Իր իրավունքները վերականգնելու և փոխհատուցում ստանալու նպատակով նա դիմել է դատարան և հաղթել: Առաջին ատյանի դատարանը բավարարել է Գ. Ավետիսյանի դիմումը, իսկ ՍԱՊԾ–ն այն բողոքարկել է Վերաքննիչ դատարանում:

«Կասկած չկա, որ ես այդ փուլում նույնպես կհաղթեմ»,– համոզված է լաբորատորիայի նախկին փոխտնօրենը:

Նա տեղեկացրել էր նաև, որ վերականգնվելուց հետո աշխատակիցների հետ զեկուցագրերի լեզվով է խոսելու: Բայց միայն աշխատանքի վերականգնվելու հարցը չի հուզում Գ. Ավետիսյանին: Նա անհանգստացած է անասնապահության ոլորտով նույնպես, քանի որ այդ ոլորտը ներկայում մահամերձ վիճակում է:

«Դեռևս Սովետական միության տարիներից տարբեր ձևերով նվաստացրել են անասնապահության ոլորտը, իսկ այսօրվա դրությամբ Հայաստանում ստեղծվել է մի իրավիճակ, երբ անասնաբույժի ինստիտուտը եթե չասենք մահացել է, ապա մահամերձ վիճակում է»,– ասաց մասնագետը:

Ավելի անհանգստացնող է այն, որ մի կողմից մասնագետներ չկան, մյուս կողմից էլ ոլորտի ղեկավարները չեն ուզում, որ կրթված անասնաբույժ–մասնագետներ ունենանք: Եվ այդ է պատճառը, որ ներկայում անասնաբույժների համար բավականին նվաստացուցիչ պայմաններ են ստեղծվել, որը թույլ չի տալիս որ կենդանիները պատշաճ պատվաստվեն, բուժզննում անցնեն ու բուժվեն: Գյուղատնտեսության նախարարության «Անասնաբուժասանիտարիայի և բուսասանիտարիայի ծառայությունների կենտրոն» ՊՈԱԿ–ը, որտեղ պայամանագիր են կնքում անասնաբույժների հետ, պայմանագրով նախատեսված այնպիսի ծիծաղելի գումարներ են վճարում անասնաբույժներին, որ այն չի բավարարում անգամ մեկ ներարկիչ ձեռք բերելու համար:

«Այստեղ էլ խնդիր կա: Մենք այստեղ պահում ենք 600–ից ավելի «անասնաբույժ», որոնցից քչերն ունեն անասնաբույժի կրթություն, այն դեպքում, երբ Վրաստանում, որը մի քանի անգամ գերազանցում է Հայաստանի տարածքը, ընդամենը 350 անասնաբույժ ունի և պետպատվերի շրջանակներում կարողանում է նախատեսված բոլոր միջոցառումներն իրականացնել: Շատ վատ մենեջմենտ է իրականացվում ոլորտում և չեն թողնում, որ ոլորտը զարգանա: Լավագույն մասնագետները երկրից արտագաղթել են արդեն, մի քանիսն էլ այլ ծրագրերում են աշխատում: Բայց այսպես չի կարող անվերջ շարունակվել: Մի օր հարկավոր է սրան վերջ տալ: Մինչև ոլորտի մասնագետները ներգրավված չլինեն պետական կառավարման ոլորտում, վիճակը չի շտկվի: Երկրորդ հերթին սեփական «ես»–ի խնդիր ունեցող պետեր չպետք է նշանակեն, քանի որ ոլորտի այն ղեկավարները, որոնք ինքնահաստատման խնդիր ունեն և առաջին հերթին փորձում են ազատվել մասնագետներից: Նախորդը Արմեն Հայրապետյանն էր, հիմա էլ Իշխան Կարապետյանը: Բայց չի կարելի նման կերպ վարվել մի ոլորտի հետ, որից ողջ բնակչության առողջությունն է կախված»,– համոզված է մասնագետը:

Գ. Ավետիսյանն ասում է, որ մասնագետներին երբեք էլ թույլ չեն տվել, որ նորմալ աշխատեն: Նրանք երբեք որևէ պետական պատասխանատու պաշտոն զբաղեցնելու հնարավորություն էլ չեն ունեցել: Ու դժվար էլ մի օր թողնեն, քանի որ իշխանություններին ավելի հարմար է կառավարելի կիսագրագետների հետ աշխատել, որ ինչպես ցանկանան, այնպես էլ «աշխատեցնեն»:

«Շատ դեպքերում նաև հիվանդություններ են թաքցնում` պատճառաբանելով, որ եթե հայտարարեն այդ մասին, ապա արտահանման ժամանակ խնդիրներ կունենան: Մինչդեռ կան հիվանդություններ, որոնք արտահանման հետ ընդհանրապես որևէ կապ չունեն, բայց այդ հիվանդություններն էլ չեն հայտարարում, որը լուրջ տնտեսական վնաս է հասցնում առաջին հերթին գյուղացուն, հետո երկրին»,– ասաց Գ. Ավետիսյանը:

Շարունակությունը` «Փաստ» օրաթերթի այսօրվա համարում