Նոր ներդրումային ֆոնդ ՀՀ-ում․ մասնավոր հատվածի ներգրավմամբ և նորարարական ֆինանսական գործիքների կիրառմամբ Հայաստանում կզարգանա կանաչ տնտեսությունը

Shtigen Ventures-ին հաջող ընթացք մաղթելով՝ ՀՀ կենտրոնական բանկի խորհրդի անդամ Հասմիկ Ղահրամանյանը հույս հայտնեց, որ տարիներ անց կարձանագրեն Shtigen-ի վենչուրային ֆոնդի հաջողության պատմությունը։ Նա ներկայացրեց բանկային սեկտորի դերը կանաչ ֆինանսավորման գործում՝ շեշտը դնելով հավակնությունների ու առանցքային մարտահրավերների վրա․ «Ցանկանում եմ կանաչ տեխնոլոգիաների մասին խոսելիս նախևառաջ փաստել, որ ՀՀ կենտրոնական բանկը զսպում է կլիմայական փոփոխությունների պատճառով առաջացած ռիսկերը։ Այս համատեքստում ԿԲ-ն ունի մի քանի դերակատարում, որոնցից մեկը կանաչ գործիքների միջոցով ներդրումներ կատարելը խրախուսելն է, ինչը կզարգացնի թե՛ տվյալ ոլորտը, թե՛ Հայաստանի տնտեսությունը»։

Shtigen Group-ի հիմնադիր տնօրեն Հայկ Շեկյանն իր ելույթում ընդգծեց նոր մտածողություն ձևավորելու անհրաժեշտությունը, որը պետք է հիմնված լինի հին փորձի և նորը տեսնելու հնարավորության վրա։

«Մենք խիստ կարևոր ենք համարում կանաչ տնտեսության զարգացման գործում և կլիմայի փոփոխության դեմ պայքարում մասնավոր հատվածի ներգրավվածությունը։ Այդ աշխատանքի կարևորությունը բխում է նաև Shtigen Group-ի կորպորատիվ ազգային պատասխանատվության սկզբունքներից։ Մենք այդ ճանապարհը պետք է անցնենք կլիմայի հարցերով զբաղվող միջազգային առաջատար կառույցների, պետական մարմինների և փորձագետների հետ համագործակցաբար՝ կիրառելով նաև նորարարական ֆինանսական գործիքներ»,- ասաց Հայկ Շեկյանը։

ՀՀ ԿԲ ֆինանսական կայունության և կարգավորման դեպարտամենտի տնօրեն Գարեգին Գևորգյանը, անդրադառնալով կլիմայի փոփոխության դեմ պայքարին, նշեց, որ դրա մասին պետք է մտածել ամեն օր և ճիշտ քայլեր ձեռնարկել՝ «կանաչ օրակարգ» ձևավորելու և այն զարգացնելու համար։

«Իհարկե, թե՛ Կառավարությունը և թե՛ Կենտրոնական բանկը, որպես առաջին քայլ, որոշակի անելիք ունեն «կանաչ օրակարգ» հաստատելու գործում, բայց այստեղ դրոշակակիրը մասնավոր հատվածն է։ Ահա թե ինչու է այդքան ողջունելի Shtigen Group-ի՝ վենչուրային ֆոնդ հիմնելու նախաձեռնությունը, քանի որ, ըստ էության, հենց նման ֆոնդերն են լուսաբանում, ուղղություն տալիս, ինչպես նաև օրինակ ծառայում տնտեսության մնացած մասնակիցներին ճիշտ ուղղությամբ շարժվելու համար»,- ասաց Գարեգին Գևորգյանը։

Shtigen VС ներդրումային ֆոնդը հնարավորություն կտա համախմբել մասնավոր և ինստիտուցիոնալ կապիտալը՝ կանաչ նախագծերում արդյունավետ ներդրումներ կատարելու և ոլորտը զարգացնելու նպատակով։

«Ոչ միայն Shtigen VC-ի, այլև ներդրումային այլ ֆոնդերի գործունեության համար խիստ էական է հստակեցնել՝ որոնք են Հայաստանի կանաչ զարգացման ռազմավարությունների հենասյուները, դասակարգել կանաչ տնտեսության զարգացումը խթանող ֆինանսական աղբյուրները, ինչպես նաև դիտարկել միջազգային լավագույն փորձի կիրառելիությունը, քաղաքականության և կարգավորման մեխանիզմերի մշակման անհրաժեշտությունը Հայաստանում։ Այս ֆորումը հենց այդ հարցերի պատասխանները գտնելու նպատակ ունի»,- նշեց Shtigen Ventures-ի տնօրեն Հակոբ Խոցանյանը՝ ավելացնելով, որ Shtigen VC-ն ստեղծվել է ոչ միայն Shtigen Group-ի կազմում գործող, այլև ոլորտի այլ ընկերություններում ներդրումներ անելու նպատակով։

Ֆորումի շրջանակում տեղի ունեցած պանելային քննարկմանը ներկայացվեցին կանաչ էներգետիկայի զարգացման միտումները, կանաչ ֆինանսավորման մարտահրավերները, ինչպես նաև կենսաթոշակային և ներդրումային ֆոնդերի դերը դրանց հաղթահարման, մասնավոր և ինստիտուցիոնալ կապիտալի ներգրավման գործում։

Քննարկմանը մասնակցում էին Formula VC-ի գործընկեր, Sprint Crowdfunders’ ֆոնդի կառավարիչ Կարեն Վարդանյանը, Angel Investor Club of Armenia-ի փոխնախագահ Սամսոն Ավետյանը, Եվրասիական ֆոնդային բորսաների ֆեդերացիայի գլխավոր քարտուղար Կոնստանտին Սարոյանը, Environment Group-ի հիﬓադիր տնօրեն Էրիկ Գրիգորյանը, Amundi-Acba-ի փոխտնօրեն, ֆոնդերի կառավարիչ Հրայր Ասլանյանը, Կենտրոնական բանկի ֆինանսական համակարգի կայունության և կարգավորման դեպարտաﬔնտի տնօրեն Գարեգին Գևորգյանը, իսկ մոդերատորը Կլիմայական ֆինանսավորման հարցերի ﬕջազգային ավագ խորհրդատու, Shtigen VC ներդրումային ֆոնդի ռազմավարական խորհրդատու Տիգրան Սուքիասյանն էր։

«Վենչուրային ֆոնդերի ներգրավմամբ Հայաստանում հնարավոր է զարգացնել կանաչ տնտեսությունը։ Եթե մենք ունենանք կանաչ տեխնոլոգիաներ, և այդ տեխնոլոգիաները ֆինանսավորեն վենչուրային ընկերությունները, իսկ վերջիններս կարողանան մեծ ընկերություններից ֆինանսներ բերել Հայաստան, որոշակի շղթա կձևավորվի։ Այդ շղթայի բոլոր դերակատարների ակտիվ աշխատանքի արդյունքում Հայաստանում կանաչ տնտեսությունը մեկ քայլ առաջ կկատարի»,- ասաց Հայաստանի ամերիկյան համալսարանի Բիզնեսի և տնտեսագիտության քոլեջի դեկան, նախկին փոխվարչապետ Վաչե Գաբրիելյանը։

Հ․ Գ․ «Shtigen Group»-ն իր կորպորատիվ ազգային պատասխանատվության շրջանակում 2022 թ.-ի ապրիլից իրականացնում է «Արևածագ Արցախում» նախագիծը, որի նպատակն է արևային էներգիայի կիրառմամբ Արցախում հաստատել էներգետիկ անկախություն։

«Արևածագ Արցախում լինելու է»․ այս գրությամբ շապիկներով էին «Shtigen Group»-ի թիմի անդամները դիմավորում ֆորումի մասնակիցներին։ Իսկ սուրճի ընդմիջմանը քաղցրավենիքի սեղանին նաև «Արևածագ Արցախում» նախագծի բրենդինգով պատրաստված չրատուփերն էին, որի գաղափարի հիմքում մեր արևելյան հայրենիքն է՝ անառիկ ու ամբողջական։ Շոկոլադե քարտեզին Հայաստանի մարզերն ու Արցախի վարչական շրջաններն են՝ տվյալ բնակավայրին բնորոշ մրգատեսակի չրերով։