Ավտոկայանատեղիների՝ sms–ով կատարվող վճարումը կթանկանա. «Փարկինգ սիթի սերվիս»–ը ֆինանսական մուտքերի պակաս ունի. «Փաստ»

«Փաստ» օրաթերթը գրում է.

Օրեր առաջ հայտնի դարձավ, որ օգոստոսի 1–ից «ՓԱՐԿԻՆԳ ՍԻԹԻ ՍԵՐՎԻՍ» ՓԲԸ–ի՝ ավտոկայանատեղիների ծառայությունների սակագների փոփոխություն կլինի: Ըստ այդմ՝ նախկինում 1 ժամ կայանելու դիմաց վարորդը 100 դրամ էր վճարում, իսկ օգոստոսի 1–ից հետո ստիպված կլինի վճարել 149 դրամ: Նույն կերպ մեկ օր կայանելու համար 500 դրամի փոխարեն՝ այսուհետև կլինի 748 դրամ, որից 124,6 դրամը միջնորդավճար է, իսկ 123,4 դրամը՝ ԱԱՀ:

Սա իհարկե վերաբերում է միայն բջջային հեռախոսով հաղորդագրությամբ վճարելու դեպքում: Մամուլում հրապարակումներ եղան, որ Երևանի քաղաքապետարանը որպես թանկացման պատճառ է բերում SMS հաղորդագրության միջոցով գանձումն ապահովող բջջային օպերատորների միջնորդավճարների և ավելացված արժեքի հարկի ավելացումը:

«Ելք» խմբակցության Երևանի ավագանու անդամ, «Վարորդի ընկեր» ԻՀԿ համահիմնադիր Սերգեյ Ղահրամանյանը «Փաստի» հետ զրույցում նշեց, որ իրենց կողմից նամակ է պատրաստվել, որը պիտի արդեն այսօրվա դրությամբ ուղարկված լինի քաղաքապետարան և պարզաբանում ստացվի, նախևառաջ՝ ինչո՞ւ կահավորված չեն քաղաքի բոլոր վարչական շրջանները տերմինալներով: Ղահրամանյանի խոսքով, մյուս կողմից էլ՝ «ՓԱՐԿԻՆԳ ՍԻԹԻ ՍԵՐՎԻՍ»–ի պետականացման ժամանակ Երևանի քաղաքապետի տեղակալ Վահե Նիկոյանը շեշտել էր, որ սա ի շահ քաղաքացիների է իրականացվում և ակնկալվում է ծառայությունների մատչելիություն:

«Բայց փաստորեն 6–7 ամիս անց լրիվ հակառակ երևույթին ենք ականատես լինում: Իմ կարծիքով սրա իմաստն այն է, որ վարորդներին ստիպեն անուղղակիորեն միանգամից մեկ տարվա կամ կես տարվա գումար վճարել (1 տարվա համար այն կազմում է 12 հազար դրամ.– խմբ.), ինչով դրամաշորթումը ավելի կլորիկ գումարներ կկազմի: Բոլորս գիտենք, որ Կենտրոնում ավտոկայանատեղիների լուրջ խնդիր կա: Վճարում ես ամբողջ տարվա համար, բայց օրինակ Աբովյան փողոցի վրա երբեք չես կարող կայանատեղի գտնել: Ստացվում է՝ ուղղակի վճարում ես, բայց ծառայությունից չես օգտվում:

Չնայած, որ քաղաքապետարանը ասում է՝ թանկացում չկա, բայց ինչպե՞ս հասկանալ, եթե մինչև հուլիսի 31–ը մեկ ժամի համար պետք է վճարեին 100 դրամ, իսկ օգոստոսի 1–ից հետո 149 դրամ: 49 դրամ գնի բարձրացումը թանկացում չհամարելը իրենք ինչպե՞ս են մեկնաբանում: Մինչ այժմ ոչ մի բանի համար վճարում էիր 100 դրամ, հիմա այդ ոչ մի բանի համար վճարելու ես 149 դրամ»,–նշեց նա:

Հարցին, թե հավելյալ 49 դրամը շատ մե՞ծ բեռ է վարորդների համար, Սերգեյ Ղահրամանյանը պատասխանեց, որ միջազգային պրակտիկայի տեսանկյունից գները նորմալ են: Սակայն կան երկրներ, որտեղ կայանման առաջին մեկ ժամը անվճար է կամ շաբաթ–կիրակի օրերին է անվճար: Միաժամանակ կան վճարովիին համարժեք անվճար կայանելու տարածքներ: Ըստ ավագանու անդամի՝ այնտեղ մարդիկ այլընտրանք ունեն, իսկ մեզ մոտ՝ ոչ, գումարած տերմինալների՝ միայն քաղաքի կենտրոնում կահավորված լինելը, իսկ օրինակ Սեբաստիա, Շինարարներ, Հալաբյան փողոցներում կամ Գայի պողոտայի վրա տերմինալներ գոյություն չունեն:

«Խնդիրը ոչ թե 49 դրամն է, այլ անհավասար պայմանները: Ինչո՞ւ պետք է տերմինալից վճարես 100, իսկ բջջային հեռախոսից՝ 150 դրամ, չէ որ նույն բանի համար ես վճարում: Մյուս աբսուրդն այն է, որ գրեթե միշտ միջնորդավճարը կայուն գումար է. sms–ի դեպքում մեկ գումար, բանկային փոխանցումների դեպքում՝ մեկ այլ: Իսկ այս դեպքում, երբ մեկ ժամի համար վճարում ես այն 24,8 դրամ է, իսկ մեկ օրվա համար՝ 128,2 դրամ: Եթե նույն միջնորդավճարն է գանձվում, ինչո՞ւ է մեկ օրվա դեպքում արդեն մոտ 5 անգամ ավելի շատ գանձվում»,– պարզաբանեց նա:

«Փարկինգ սիթի սերվիս» ՓԲԸ ղեկավար Վազգեն Հարությունյանն էլ մեզ հետ զրույցում նշեց, որ թանկացում չի եղել:

«Մենք ասել ենք, եթե ցանկանում են ավտոկայանատեղիի վճարը վճարել հեռախոսի միջոցով, ապա հարկերն ու միջնորդավճարը ևս գանձվելու են բաժանորդի հեռախոսահամարից: Նախկինում տվյալ միջնորդավճարն ու հարկերը ընկերությունը վերցրած է եղել իր վրա և ծախսերը մենք ենք հոգացել: Այսուհետ ֆինանսավորման սուղ լինելու պատճառով չենք կարողանում այդ ծախսերը հոգալ»,– պարզաբանեց նա՝ հավելելով, թե այդ ամենը ֆիքսված է պայմանագրում, և այդ թվերն իրենց տակ հիմնավորում ունեն:

«Մարդ կարող է ավտոկայանատեղիին կից կամ ցանկացած այլ վճարային համակարգով վճարել նույն 100 դրամը: Գրեթե բոլոր վարչական շրջաններում տերմինալներ կան: Միգուցե դրանք ոչ այնքան մոտ են ամեն մի կայանատեղիին, բայց յուրաքանչյուր կայանատեղու սկզբնամասում, վերջնամասում կամ մոտակա խաչմերուկում կա տեղադրված տերմինալ: Ընկերությունն ունի ֆիքսված հասույթ ամսվա կտրվածքով, որը Երևանի քաղաքապետարանի հետ կնքված պայմանագրի համաձայն ստանում է, սակայն նման ֆինանսավորման դեպքում այդ ծախսերը չենք կարողանում հոգալ»,– եզրափակեց նա:

Շարունակությունը` «Փաստ» օրաթերթի այսօրվա համարում