Մշակույթը՝ սահմանին. Նոյեմբերյանի «Սինկոպա» վոկալ համույթը ճանապարհեց առաջին շրջանավարտներին

Նոյեմբերյանի Քաղաքային գրադարանում այսօր տոնական մթնոլորտ էր. «Սինկոպա» վոկալ համույթը դեպի մեծ բեմեր ճանապարհեց առաջին շրջանավարտներին՝ Արփի Ապրիկյանին և Արեն Վերանյանին:

«Սինկոպա»-ն Նոյեմբերյանի Մշակույթի կենտրոնում սկսել է գործել 2018 թվականից.

«Քանի որ Նոյեմբերյանի երաժշտական դպրոցում համայնքի երեխաները էստրադային բաժնում սովորելու հնարավորություն չունեին, մենք որոշեցինք կենտրոնում ստեղծել խումբ, որտեղ բացի դասական և հայկական ժողովրդական ժանրերից երեխաները կարող են նաև այլ ժանրեր ուսումնասիրել: 

Վոկալ խմբի ստեղծումից մի քանի ամիս անց՝ երգի միջազգային օրը, մեր կենտրոնում հյուրընկալել էինք էստրադային երգչուհի Լիդուշիկին, և հենց համերգի ընթացքում էլ ծնվեց խմբի անունը՝ «Սինկոպա», որը երաժշտական ռիթմիկ պատկեր է»,- 1or.am-ի հետ զրույցում պատմում է Նոյեմբերյանի Մշակույթի կենտրոնի տնօրեն Սոնյա Զուրաբյանը:

Վոկալ համույթը ղեկավարում է Սոնա Ղարդյանը, ով իր աշխատանքն սկսեց 4 սաների հետ և ընդամենը 1-2 ամսում ընդլայնեց խումբը՝ սաների թիվը հասցնելով 24-ի.

«Այս շրջանավարտներն արդեն 9-10 տարի ինձ հետ են, կարելի է ասել՝ իմ կարիերայի առաջին օրվանից ինձ հետ են՝ մինչ օրս: Իրար հետ շատ երկար ճանապարհ ենք անցել, շատ բաների ենք հասել, երգել ենք Հայաստանի տարբեր բեմերում, արժանացել ենք բազմաթիվ մրցանակների: Այս պահին էլ իրենց հետ մրցույթի ենք մասնակցում: Երկու շրջանավարտներն էլ որոշել են ուսումն այս ուղղությամբ շարունակել, զբաղվել երգով, և ինձ համար շատ կարևոր է, որ իմ սաներն ուզում են նմանվել ինձ»,- մեզ հետ զրույցում նշեց Սոնա Ղարդյանը:

Շրջանավարտներից Արփին իր ապագան այլ կերպ չի պատկերացնում, հաստատ որոշել է՝ երգչուհի է դառնալու.

«Երգի խումբն, իրականում, ինձ շատ բան է տվել: Ես մանկուց երազել եմ այս բնագավառում հայտնվելու մասին, փոքրուց երգում եմ: Ուզում եմ ուսումս շարունակել Երևանում՝ Մանկավարժական համալսարանում: Չգիտեմ՝ համալսարանն ավարտելուց հետո ինչ առաջընթաց կունենամ, բայց երգի խմբում ձեռք բերած փորձն ու գիտելիքները հաստատ ամբողջ կյանքի համար են»: 

Մարիամ Նալբանդյան