Երևանում 3 զավակների մայրը չորրորդին վաճառել է $3 հազարով, իսկ չբեր ուսուցչուհին նորածնին գնել է 6500 դոլարով

1in.am\ Աջափնյակ և Դավթաշեն վարչական շրջանների ընդհանուր իրավասության դատարանում Տաթևիկ Գրիգորյանի նախագահությամբ ավարտվել է նորածին երեխայի առուվաճառքի վերաբերյալ գործի քննությունը:

Այս գործով ամբաստանյալի աթոռին էին ՀՀ ԱՆ «Վերարտադրողական առողջության, պերինատալոգիայի, մանկաբարձության և գինեկոլոգիայի հանրապետական ինստիտուտ» ՓԲԸ մանկաբարձ-գինեկոլոգ Կարինե Անտոնյանը, ՀՀ ԱՆ «Արամյանց» բժշկական կենտրոնի բուժքույր Գոհարիկ Խաչատրյանը, նորածնի կենսաբանական մայր Ալլա Կ.-ն և երեխայի խնամքը հանցավոր ճանապարհով ստանձնած Քրիստինե Կ.-ն:

Ըստ մեղադրանքի՝ մանկաբարձ-գինեկոլոգ Կարինե Անտոնյանը պաշտոնական փաստաթղթերի կեղծմամբ այլ անձի՝ բուժքույր Գոհարիկ Խաչատրյանի նախաձեռնությամբ կազմակերպել է խնամքը ստանձնելու նպատակով երեխայի առք և ստանձնողի խնամքին հանձնելու նպատակով երեխայի վաճառք:

2016 թվականի փետրվարի 22-ին բժիշկ Կարինե Անտոնյանը, ըստ մեղադրանքի, համաձայնել է բուժքույր Գոհարիկ Խաչատրյանի առաջարկին ու կազմակերպել է հղի, 36-ամյա Ալլա Կ.-ի կողմից ծննդաբերելուց հետո երեխայի՝ ստանձնողի խնամքին հանձնելու նպատակով վաճառքը և խնամքը ստանձնելու նպատակով 37-ամյա Քրիստինե Կ.-ի կողմից երեխայի առքը, ինչի համար բժշկուհին պահանջել է 1500 դոլար:

Ըստ մեղադրանքի՝ Կարինե Անտոնյանը Գոհարիկ Խաչատրյանի դրդմամբ պաշտոնական փաստաթուղթ հանդիսացող՝ «Հղիի և ծննդկանի անհատական քարտում» ակնհայտ կեղծ տվյալներ է մտցրել, իրական հղի Ալլա Կ.-ին ոչ հղի Քրիստինե Կ.-ի անձնագրային տվյալներով որպես հղի ընդունել է բժշկական կենտրոն: Նա հղիի նախածննդյան բոլոր հետազոտությունները և բժշկական հաշվառումները գրանցել է Քրիստինե Կ.-ի անունով: 2016 թվականի ապրիլի 9-ին Ալլա Կ.-ն ծննդաբերել է:

Կարինե Անտոնյանը բժշկական կենտրոնի փաստաթղթերում, այդ թվում՝ «Բժշկական քարտում», ինչպես նաև զագսում նորածին երեխային ծննդյան վկայական տրամադրելու համար հիմք հանդիսացող պաշտոնական փաստաթղթերում ակնհայտ կեղծ տվյալներ է մտցրել, իբր՝ երեխային ծննդաբերել է Քրիստինե Կ.-ն, ինչի հիման վրա Քրիստինե Կ.-ն զագսում գրանցվել է որպես նորածին աղջնակի մայր, նրա ամուսինը՝ որպես հայր, երեխային տրվել է ծննդյան վկայական:

Քրիստինե Կ.-ն 2016 թվականի ապրիլի 9-ին «Վերարտադրողական առողջության, պերինատալոգիայի, մանկաբարձության և գինեկոլոգիայի հանրապետական ինստիտուտ» ՓԲԸ տարածքում բժշկուհի Կարինե Անտոնյանին վճարել է նրա պահանջած 1500 դոլարը:

2016 թվականի ապրիլի 12-ին Քրիստինե Կ.-ն բուժքույր Գոհարիկ Խաչատրյանին վճարել է նրա պահանջած 2000 դոլարը: Միաժամանակ, երեխային ծննդաբերած Ալլա Կ.-ին նա վճարել է 3000 դոլար:

Ըստ մեղադրանքի՝ երեխայի կենսաբանական մայր Ալլա Կ.-ն դեռևս հղիության 5-րդ ամսում՝ 2015 թվականի դեկտեմբերին էր «Արամյանց» բժշկական կենտրոնի բուժքույր Գոհարիկ Խաչատրյանի միջոցով պայմանավորվել երեխայի խնամքը ստանձնելու նպատակով «գնորդի»՝ Քրիստինե Կ.-ի հետ՝ առուվաճառքի պայմանների վերաբերյալ:

Նորածնին առուվաճառքի առարկա դարձրած կանայք ընդհանուր իրավասության դատարանում իրենց մեղավոր են ճանաչել և միջնորդել են գործը քննել արագացված ընթացակարգով:

Դատարանը հաշվի է առել, որ բուժքույր Գոհարիկ Խաչատրյանը վատառողջ է: Միաժամանակ դատարանն արձանագրել է, որ հենց Գոհարիկ Խաչատրյանն է իրեն վերագրվող հանցագործության մեջ ունեցել առանձնապես ակտիվ դեր: Նա է առաջարկել հղի Ալլա Կ.-ին՝ նորածնին վաճառել այլ անձի: Ստանալով Ալլա Կ.-ի համաձայնությունը՝ նա է ձեռնամուխ եղել երեխայի վաճառքի գործընթացի կազմակերպմանը, դրա մասին տեղյակ է պահել Քրիստինե Կ.-ին: Գոհարիկ Խաչատրյանն է կազմակերպել Ալլայի ու Քրիստինեի հանդիպումը: Նա է առաջարկել երեխայի ձեռքբերման գործընթացը կազմակերպել ոչ օրինական կարգով: Եվ վերջապես, դատարանը հաշվի է առել, որ Գոհարիկ Խաչատրյանն է դիմել բժշկուհի Կարինե Անտոնյանին ու ձեռք է բերել նրա համաձայնությունը՝ երեխայի առուվաճառքը կազմակերպելու հարցում: Գոհարիկ Խաչատրյանը երեխայի «գնորդ» Քրիստինե Կ.-ից ստացել է 2000 դոլար, իսկ բժշկուհի Կարինե Անտոնյանից՝ 500 դոլար:

Դատարանը հաշվի է առել, որ բժշկուհի Կարինե Անտոնյանը զղջացել է կատարածի համար, խոստովանական ցուցմունքներով աջակցել է հանցագործության բացահայտմանը, նրա խնամքին է անչափահաս երեխան, և նա սպասում է երկրորդ երեխայի ծնունդին:

Դատարանը հաշվի է առել, որ երեխայի կենսաբանական մայր Ալլա Կ.-ի խնամքին երեք անչափահաս երեխաներ կան՝ 12, 10 և 8 տարեկան, Ալլա Կ.-ն մտավոր առողջության հետ կապված թեթև խնդիր ունի, իրեն վերագրվող արարքը կատարել է «կյանքի ծանր հանգամանքների զուգորդման՝ նյութական ծանր վիճակում գտնվելու հետևանքով», նա զղջացել է, տվել է խոստովանական ցուցմունքներ:

Դատարանը հաշվի է առել, որ Քրիստինե Կ.-ն բարձրագույն կրթություն ունի, ուսուցչուհի է, տվել է խոստովանական ցուցմունքներ, զղջացել է, իրեն վերագրվող արարքը կատարել է «ֆիզիոլոգիական առանձնահատկությունների պատճառով» երեխա ունենալ չկարողանալու հետևանքով:

Դատարանը Գոհարիկ Խաչատրյանին մեղավոր է ճանաչել ՀՀ քրեական օրենսգրքի 38-168 հոդվածի 1-ին և 38-325 հոդվածի 1-ին մասերով: Նրա նկատմամբ վերջնական պատիժ է սահմանվել 1 տարի 9 ամիս 19 օր ազատազրկում և տուգանք՝ 400 հազար դրամի չափով:

Պատժի սկիզբը կհաշվվի Գոհարիկ Խաչատրյանին փաստացի արգելանքի տակ առնելու օրից, երբ դատավճիռն օրինական ուժ ստանա:

Կարինե Անտոնյանը մեղավոր է ճանաչվել 38-168 հոդվածի 1-ին և 325 հոդվածի 1-ին մասերով, վերջին հաշվով դատապարտվել է 1 տարի 11 ամիս ազատազրկման և 400 հազար դրամ տուգանքի: Նրա նկատմամբ պայմանական դատապարտություն է կիրառվել՝ ազատազրկման ձևով պատիժը պայմանականորեն չի կիրառվի, կսահմանվի 2 տարի փորձաշրջան:

Ալլա Կ.-ն և Քրիստինե Կ.-ն մեղավոր են ճանաչվել ՀՀ քրեական օրենսգրքի 168 հոդվածի 1-ին մասով:

Ալլա Կ.-ն դատապարտվել է 1 տարի 11 ամիս 29 օր, իսկ Քրիստինե Կ.-ն՝ 2 տարի ազատազրկման: Նրանց երկուսի նկատմամբ էլ պայմանական դատապարտություն է կիրառվել, յուրաքանչյուրի համար սահմանվել է 2 տարի փորձաշրջան:

Այս դատավճիռը բողոքարկել է միայն Գոհարիկ Խաչատրյանի շահերի պաշտպանը՝ խնդրելով իր պաշտպանյալի նկատմամբ նույնպես կիրառել պայմանական դատապարտություն, նրան իրական ազատազրկման չդատապարտել, սահմանել փորձաշրջան, ինչպես նաև 200 հազար դրամի չափով նվազեցնել տուգանքի ձևով նշանակված պատիժը: