«Արցախն ապրում է» մշակութային փառատոնի շրջանակում Արցախում առաջին անգամ էկրան բարձրացավ «Օլիմպիկոս» ֆիլմը

Genesis Armenia-ի նախաձեռնած «Արցախն ապրում է» փառատոնի շրջանակում Արցախում առաջին անգամ էկրան բարձրացավ Դավիթ և Հայկ Սահակյանցների «Օլիմպիկոս» մուլտֆիլմը։

Մեծ Հայքի արքա Վարազդատ Արշակունու կյանքի ու հաղթանակների մասին պատմող ֆիլմն այնքան էր տպավորել Ստեփանակերտի հանդիսատեսին, որ այսօր՝ մայիսի 23-ին, ցուցադրվեց երկրորդ անգամ․ նախօրեին ցուցադրվել էր Ֆրանկոֆոնիայի կենտրոնում՝ լեփ-լեցուն դահլիճում։

«Մուլտֆիլմը Երևանում առաջին անգամ ցուցադրվել է 2021թ. մայիսիին: Դեռ այն ժամանակ էինք ուզում բերել Արցախ, բայց ոչ մի կերպ չէր ստացվում։ Երբ Genesis Armenia-ից առաջարկ ստացանք, միանգամից մեր հավանությունը տվեցինք և վերջապես կարողացանք ցուցադրել»,- նշեց ֆիլմի ռեժիսոր Դավիթ Սահակյանցը։

Այսօրվա հանդիսատեսը Շուշիի տեխնոլոգիական համալսարանի սաներն էին՝ խորհրդանշական շապիկներով։ Ֆիլմին հաջորդեց քննարկում հանդիսատեսի և ռեժիսորների հետ։

«Հատկապես հիմա շատ կարևոր է մեր պատմության հաղթական դրվագների մասին հիշեցնելը: Չեմ կարծում, թե պատերազմն ավարտվել է ու ավարտվել է մեր պարտությամբ։ Պատերազմը դեռ շարունակվում է, այն երբեք չի դադարել: Ես վստահ եմ, որ նորից ունենալու ենք հաղթանակներ: Իսկ այս միջոցառումներն այն խորհուրդն ունեն, որ միասին ենք, որ Արցախը մենակ չէ, և մայր Հայաստանը, Սփյուռքը միշտ Արցախի կողքին է»,- ասաց Դավիթ Սահակյանցը։

Ռեժիսորը պատմեց ֆիմի ստեղծման՝ 5-6 տարվա ստեղծագործական ընթացքի, դժվարությունների, տեխնիկական բարձրակարգ լուծումների ու հնարքների մասին։ Իսկ երիտասարդ հանդիսատեսը դահլիճից դուրս եկավ հավատով, որ հայոց արքայի հաղթանակների մասին պատմող ֆիլմը ոչ հեռու ապագայում կցուցադրվի նաև Շուշիում։

«Պատերազմից հետո առաջին անգամ կտրվեցինք իրականությունից։ Սահակյանցների գործերի մասին գիտենք բոլորս, շատ տպավորված ենք. այս ֆիլմն ուղղակի ժպիտ նկարեց արցախցիների դեմքին։ Դահլիճից դուրս ենք եկել փշաքաղված, գլխներումս մի միտք՝ այս ֆիլմը դեռ պիտի Շուշիում դիտենք»,- ասաց Շուշիի տեխնոլոգիական համալսարանի աշխատակցուհի Մարինա Զաքարյանը։

Փառատոնի շրջանակում այսօր՝ մայիսի 23-ին, ժամը 19։00-ին, Ստեփանակերտի մշակույթի և երիտասարդության պալատի բեմում կլինի Համազգային թատրոնի «44 աստիճանի վրա» ներկայացումը։ Իսկ մայիսի 24-ին Genesis Armenia-ի ու թատրոնի թիմերը կլինեն Աղավնոյում, որտեղ դերասանները կխաղան մանկական «Գծավորը» ներկայացումը։