Տղեք, ինչքան էլ սազում եք իրար

Այսօր միջադեպ տեղի ունեցավ Ազգային Ժողովում: ՀՀԿ խմբակցության ղեկավար Վահրամ Բաղդասարյանը խոսելով վարչապետին ու կառավարության ծրագիրը հեգնող երիտասարդ քաղաքական գործիչների մասին, հիշեցրեց երջանկահիշատակ Վահան Հովհաննիսյանի հայտնի ելույթը պադյեզդներում ծեծ ուտելու մասին: Հովհաննիսյանը, 2013թ. այդ ելույթով, սուր քննադատել էր իշխանությանն ու նրանց զգուշացրել դալաններում ծեծվելու վտանգի մասին:

Փաշինյանին վրդովվեցրեց Բաղդասարյանի այս ձևակերպումը և նա տեղից միջամտեց ու սկսվեց լեզվակռիվ, բավական կոպիտ ձևակերպումներով: Ազգային Ժողովն իհարկե բալետ պարելու տեղ չէ ու կոպտություն միշտ կարող է լինել: Հարց է ՝ դա իր հետևում օրակարգային ու այդ պահին քննարկվող թեմայի հետ ինչ առնչություն ունի:

Պարզվեց ՝ ոչ մի: Բաղդասարյանը փորձում էր ՀՀԿ օժանդակությունը ցույց տալ վարչապետին՝ ուրիշների հաշվին: Փաշինյանն էլ, որպես քաղաքական ինտրիգների մեծ գիտակ, չկորցրեց պահը ու սրություն մտցրեց լեզվակռվի մեջ:

Վարչապետ-նախագահ հակամարտության մասին ելույթների սերիան ընդհատվեց ու Փաշինյանը հետահայաց արեց Հայաստանի պատմության մութ դրվագներից մի քանիսի վրա, այնուհետ էլ պադյեզդներում ծեծելու ակնարկ-սպառնալիքին պատասխանեց Սերժ Սարգսյանին անփառունակ վախճան ունեցող Չաուշևսկու օրինակով վախեցնելով: Նման մի ոլւտիմատում-բանավեճ էլ եղել էր Փաշինյանի ու իշխանության ներկայացուցիչների մեջ վերջերս, երբ Փաշինյանը սպառնացել էր ՝ հանրապետականների ՝ Թուրքիայի ու Ադրբեջանի մասին խոսելիս, ինքը կհիշեցնի ապրիլին կորցրած տարածքների մասին:

Իսկապես, որ: Շատ արդյունավետ քննարկում: Լեզվի գոնկա, ինչպես կասեին բակի երեխաները: Մնում է միայն արձանագրել, որ նմանատիպ փոքրիկ վերբալ պատերազմները մատնում են ոչ միայն իշխանությունների ու ընդդիմության բնույթն ու էությունը, այլև այն փաստը, թե ինչքան են երկուսն իրար սազում:

Վահրամ Փաշինյան, Lraber.info