Ռուբեն Վարդանյանն ընդդեմ Տիգրան Ավինյանի

Թեև ամիսներ շարունակ նշվում էր, թե Երևան քաղաքի ավագանու ընտրություններին մասնակցելու է նաև նորաստեղծ «Ապրելու երկիր» կուսակցությունը՝ Մանե Թանդիլյանի գլխավորությամբ, սակայն երեկ մամուլում տեղեկություն տարածվեց, որ փոխվել է կուսակցության առաջին համարը՝ քաղաքապետի թեկնածուն կլինի ռուսաստանաբնակ հայ գործարար Ռուբեն Վարդանյանը։ 

Թվում է, թե Վարդանյանի մասշտաբի գործչին պետք է բավարարեին բացառապես վարչապետական ամբիցիաները, և իր դեմքով ավագանու ընտրությանը մասնակցելը տարօրինակ է: Բանն այն է, որ երևանյան ընտրությունների տապալումը կարող է ճակատագրական լինել Վարդանյանի կարիերայի համար, հետևաբար ընտրվել է ամենածայրահեղ՝ իր դեմքով մասնակցելու տարբերակը: 

Բանն այն է, որ «Քաղաքացիական պայմանագիր» կուսակցությունը ընտրական մարաթոնի է գործուղել իր «գորշ կարդինալին»՝ Տիգրան Ավինյանին։ Փաշինյանը շատ լավ հասկանում է, որ մայրաքաղաքը կորցնելու դեպքում կորցնելու է ամեն ինչ։ Այս իշխանության ընդդիմախոսները ևս հասկանում են, որ Երևան քաղաքի ավագանու ընտրությունները կենաց և մահու կռիվ են ոչ միայն «Քաղաքացիական պայմանագրի», այլև իրենց համար և ստիպված են լինելու մասնակցել ընտրություններին ոչ թե խամաճիկ թեկնածուների միջոցով, այլ բացառապես առաջին դեմքերի մակարդակով, որպեսզի կարողանան հակակշռել Ավինյանին և պահպանել իրենց տեղը քաղաքական դաշտում։