Տարեսկզբից «1000 դրամների» հիմնադրամից հատուցում է ստացել 13 զինվորի ընտանիք՝ 133 միլիոն 900 հազար դրամի չափով. «Փաստ»

«Փաստ» օրաթերթը գրում է.

Այս տարվա հունվարից մինչ օրս «Զինծառայողների ապահովագրության» հիմնադրամը հատուցումներ է տրամադրել 12 զոհված զինվորի ընտանիքի և մեկ հաշմանդամության առաջին խումբ ունեցող նախկին զինծառայողի: Նշվածից 12–ի ընտանիքին տրվել է միանվագ 10 միլիոն դրամ և ամսական 200–300 հազարական դրամ գումար, իսկ մեկին՝ 5 միլիոն դրամ միանվագ և 100 հազար դրամ ամսական:

Հիշեցնենք, որ նախորդ տարվա դեկտեմբերին 84 կողմ, 4 դեմ և 1 ձեռնպահ ձայների հարաբերակցությամբ Ազգային Ժողովն ընդունեց «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» օրինագիծը:

Համաձայն այս օրենքի՝ 2017թ հունվարի 1–ից յուրաքանչյուր աշխատող ֆիզիկական անձ ամսական 1000 դրամ է վճարում այս հիմնադրամին: Սրա հետ մեկտեղ հիմնադրամի գումարները առաջանում են նաև նվիրաբերություններից:

Այս տարվա հունվարից մինչ օրս հիմնադրամում հավաքագրվել է 1 միլիարդ 910 միլիոն 519 հազար դրամ, որից 133 միլիոն 900 հազար դրամի հատուցում արդեն իսկ արվել է: Ըստ հիմնադրամի www.1000plus.am կայքի՝ «Զինծառայողների ապահովագրության» համար նվիրաբերություն են կատարել 10 երկրների քաղաքացիներ, այդ թվում Հայաստանի, Ռուսաստանի, Գերմանիայի, Քաթարի, Օմանի, ԱՄՆ–ի, Ռումինիայի և Շվեդիայի: Հունվարի 1–ից մինչև մայիսի 24–ն ընկած ժամանակահատվածում հիմնադրամին կատարվել է ավելի քան 29 միլիոն դրամի նվիրաբերություն՝ 29 միլիոն 766 հազար դրամին համարժեք: Մեծ մասը կատարել են հայաստանաբնակները՝ 24 միլիոն 165 հազար դրամ, այնուհետև Ռուսաստանը՝ 2 միլիոն 736 հազար դրամին համարժեք գումար և Ռումինիան՝ 1 միլիոն 86 հազար դրամի չափով: Վերջերս նվիրաբերություն էր կատարել կիպրահայ բարերար Հարություն Անմահունին, ով Վիգեն Սարգսյանի Կիպրոս կատարած այցի ընթացքում 10 հազար ԱՄՆ դոլար էր նվիրաբերել հիմնադրամին:

Կայքից տեղեկանում ենք, որ հատուցումը տրվում է յուրաքանչյուր զինծառայողին կամ իր ընտանիքին, ով 2017թ.–ի հունվարի 1–ից հետո պատճառված վնասի արդյունքում ճանաչվել է I կամ II խմբի հաշմանդամ և կամ 2017 թ.–ի հունվարի 1–ից հետո ճանաչվել է զոհված կամ անհայտ բացակայող:

Հիմնադրամի ակտիվների և պարտավորությունների կառավարման հանձնաժողովը հունիսի 9–ին որոշում էր կայացրել սահմանված կարգով կատարել հատուցումներ ևս 2 զոհված զինծառայողների ընտանիքների և մեկ 1–ին խմբի հաշմանդամ զինծառայողի: Այդպիսով, ժամկետային պարտադիր զինծառայող, շարքային Գուրգեն Սարգսյանի, Մհեր Արզումանյանի ընտանիքներին և ժամկետային պարտադիր զինծառայող, շարքային Կորյուն Կիրակոսյանին կփոխանցվի միանվագ 10–ական միլիոն դրամ և 20 տարվա ընթացքում կտրամադրվի ամսական 200 հազար դրամ:

Գումարի ամբողջ չափից 10 միլիոն դրամը տրամադրվում է միանվագ, իսկ մնացածը՝ ամսական հավասար վճարներով՝ 20 տարվա ընթացքում: Բացի այս զինծառայողը կամ նրա ընտանիքի անդամներն ունեն լրացուցիչ ամսական 100 հազար դրամ ստանալու իրավունք, եթե հատուցման դեպքը տեղի ունենալու օրվա դրությամբ զինծառայողն ունի երեք կամ ավելի՝ 18 տարին չլրացած երեխաներ, 23 տարին չլրացած առկա ցերեկային ուսուցմամբ սովորող զավակներ և կամ 18 տարեկան կամ դրանից բարձր տարիքի հաշմանդամ զավակներ, եթե նրանք հաշմանդամ են ճանաչվել մինչև 18 տարին լրանալ:

Նշենք, որ ըստ օրենքի՝ զինծառայողի մահվան և առաջին կարգի հաշմանդամության դեպքում միանվագ վճարվում է 10 միլիոն դրամ, երկրորդ կարգի հաշմանդամության դեպքում` 5 միլիոն դրամ, հետագա 20 տարիների ընթացքում տրվում է ապահովագրական վճար` սպայական անձնակազմին` 300 հազար դրամ, ենթասպաներին` 250 հազար դրամ, իսկ շարքային անձնակազմին` 200 հազար դրամ:

  Շարունակությունը` «Փաստ» օրաթերթի այսօրվա համարում