Կարկուտը ծեծած տեղն է ծեծում. «Փաստ»

«Փաստ» օրաթերթը գրում է.

Երկու օր առաջ տեղացած ուժգին կարկուտը մեծ չափերի վնաս է հասցրել Արմավիրի մարզի մի շարք համայնքների: Ըստ Արմավիրի մարզպետարանի Գյուղատնտեսության և բնապահպանության վարչության պետ Արթուր Այվազյանի՝ մարզում ամենից շատ տուժել են Արագած, Այգեշատ, Աղավնատուն, Ամբերդ, Դողս, Շահումյան և Դաշտ համայնքները:

«Փաստի» հետ զրույցում Այվազյանը տեղեկացրեց, որ իրենք մարզպետի գլխավորությամբ եղել են այդ բոլոր գյուղերում և մարզպետը հանձնարարել է համայնքների ղեկավարներին արագ կերպով հանձնաժողովներ ստեղծել՝ վնասի չափերը հաշվարկելու և մարզպետարան ներկայացնելու նպատակով:

«Վնասը եղել է 40–100%, կախված գյուղից: Պետք է բոլոր համայնքները իրենց կրած վնասները հաշվառեն, որպեսզի իմանանք, թե քանի հա–ի վրա է վնաս հասցրել և այնտեղ ինչ կուլտուրաներ կան: Սակայն նախնական տվյալներով հայտնի է, որ բոլոր տեսակի մշակաբույսեր էլ եղել են այդ տարածքներում: Տուժել են և՛ խաղողի ու պտղատու այգիներ, և՛ բանջարաբոստանային կուլտուրաներ ու կարտոֆիլ»,– ասաց նա:

Նշենք, որ նման տեսակի կարկուտ տեղացել էր նաև նախորդ տարի: Եվ այն ժամանակ փոխհատուցվել էր գյուղացիների ջրի վարձը: Այվազյանի խոսքով՝ այս տարի ամփոփելուց հետո իրենք տվյալները կներկայացնեն կառավարությանը և կառավարությունը կորոշի՝ աջակցությունն ինչպիսին կլինի:

Դաշտ համայնքի գյուղապետ Հրանտ Պետրոսյանը «Փաստի» հետ զրույցում նշեց, որ կարկուտի արդյունքում իրենց գյուղում 150 ընտանիք է տուժել, այդ թվում նաև իր, որոնց մեծամասնությունը գյուղատնտեսական աշխատանքներ իրականացնելու համար տարբեր բանկերից և կազմակերպություններից վարկեր էին վերցրել: «Բանջարաբոստանային կուլտուրաներն ու խաղողը տուժել են 100%–ով, պտուղը՝ մի 50–60%–ի չափով»,– ասաց գյուղապետը:

Հարցին, թե մնացած 40%–ը պիտանի՞ է վաճառքի համար, Պետրոսյանը պատասխանեց, որ ոչ թե պիտանի են վաճառքի, այլ այն դարձել է տեխնիկական, այսինքն՝ ինքնարժեքը մի քանի անգամ ընկել է և արտադրամասին հանձնելու ապրանք է դարձել:

Գյուղապետը նաև պատմեց, թե օրեր անց գյուղացիները պատրաստվում էին բերքը հավաքել. «Լոբին գյուղացիների մի մասը արդեն հավաքել էր, մյուսները նոր պիտի առաջին բերքը հավաքեին, վարունգը առաջիկա 1–2 օրվա մեջ պիտի հավաքվեր, պոմիդորը 10–15 օրից: Անցած տարվա կրկնակի կարկուտից, այս տարվա ցրտահարությունից ու կարկուտից հետո, բնականաբար, գյուղացին արդեն հիասթափված է»: Հարցին, թե գյուղացիները օգնության ակնկալիք ունե՞ն, պատասխանեց, որ ավելի շատ գուշակություն կարելի է անել:

«Նախորդ տարվա կարկուտից հետո գյուղացիները ոռոգման ջրի համար փոխհատուցվեցին, երկու հակակարկտային կայան հատկացվեց մեր գյուղին, տանիքներ կային, որ ամբողջությամբ վնասվել էին և դրանց համար հատուցում արվեց: Սպասելիքների հետ կապված կարող եմ ասել, որ առավոտ կանուխ մարզպետը, գյուղնախարարի տեղակալը, գյուղվարչության պետի տեղակալները եկել–նայել են: Եղել են նաև հարևան գյուղերում: Մենք էլ մեր տեղական հանձնաժողովներն ենք ստեղծել: Թե արդյունքը ի՞նչ կլինի, առաջ ընկած չեմ կարող ասել»,– ասաց գյուղապետը:

Ստացվում է, որ նախորդ տարվա կարկուտից հետո գյուղում տեղադրված հակակարկտային կայանները, դրանց կառուցման համար ծախսված գումարները արդյունք չեն ունեցել, և կայանները, միևնույն է, ոչնչով չեն օգնել: Պատկերը նույնն է և համեմատելի է նախորդ տարի ստեղծված իրավիճակի հետ:

Շարունակությունը` «Փաստ» օրաթերթի այսօրվա համարում