ՀՀ Նախագահի, ԱԺ նախագահի և վարչապետի արարողակարգային գնումները գաղտնի կլինեն

Ազգային ժողովը երրորդ ընթերցմամբ և ամբողջությամբ ընդունեց «Գնումների մասին» ՀՀ օրենքի նախագիծը: Օրենքի նախագիծը երկրորդ ընթերցմամբ ընդունելուն կողմ քվեարկեց 77, ձեռնպահ՝ 14 պատգամավոր:
Քվեարկությունից առաջ վարման կարգի վերաբերյալ ձայնի իրավունք խնդրեց ԱԺ ՀԱԿ խմբակցության քարտուղար Արամ Մանուկյանը: «Քանի որ օրենքի նախագծերն այսպես արագ բերվում են Ազգային ժողով, մենք շատ նախագծերի չենք հասցնում ծանոթանալ: Ես մամուլում տեսել եմ, որ այս նախագծով Ազգային ժողովի նախագահի, վարչապետի և նախագահի վարչական ծախսերը պետական գաղտնիք են լինելու և այլևս թափանցիկ չեն լինի: Եթե մենք սխալ ենք հասկացել, խնդրում եմ պարզաբանել, որովհետև դրանից է կախված մեր քվեարկությունը»,- նշել է Մանուկյանը:
ՀՀ ԱԺ նախագահ Գալուստ Սահակյանը պատասխանեց, որ այդ մասին տեղեկություններ չունի՝ հայտարարելով, որ ինքն էլ թերթում է կարդացել: «Բայց ես կարծում եմ, որ գոնե Ազգային ժողովի համար նման բան չկա»,- ասաց Սահակյանը:
ՀՀ ԱԺ տնտեսական հարցերի մշտական հանձնաժողովի նախագահ Վարդան Այվազյանը պարզաբանեց, որ ոչ թե վարչական ծախսերի, այլ ՀՀ Նախագահի, վարչապետի և Ազգային ժողովի նախագահի արարողակարգային գնումները փակ իրականացնելու մասին է: «Եթե մամուլին հավատում եք, հավատացեք նաև օրենքներին: Արարողակարգի ծախսերի մրցույթները այդ երեք մարմինների դեպքում գաղտնի են լինելու»,- ասաց Այվազյանը:
ՀՀ ԱԺ նախագահ Գալուստ Սահակյանն էլ հավելեց, որ գնումների մասով ճիշտ է, որ նման որոշում է կայացվել: «Եթե հետագայում ինչ-որ խնդիր լինի, ես կասեմ: Այդտեղ ես որևէ խնդիր չեմ տեսնում»,- կատակեց Գալուստ Սահակյանը և հարցը դրեց քվեարկության:
Ազգային ժողովի ՀԱԿ խմբակցության՝ նիստին ներկա պատգամավորները ձեռնպահ քվեարկեցին:

Past.am