Պաշտոնյաները դրսում իրենց լավ են նայում. թո՛ղ աչքը կարոտ չմնա. «Փաստ»

«Փաստ» օրաթերթը գրում է.

Գյուղատնտեսության նախարարության աշխատակիցների 2016 թ. արտասահմանյան պաշտոնական գործուղումները ֆինանսավորվել են ՀՀ պետական բյուջեի հաշվին` վարչապետի որոշումների հիման վրա: Այդ նպատակով 2016 թ. պետական բյուջեով հատկացվել և ծախսվել է 8 միլիոն 975 հազար 200 դրամ: Այս մասին տեղեկացնում են նախարարությունից «Փաստի»՝ արտասահմանյան գործուղումների վերաբերյալ հարցմանն ի պատասխան:

Ըստ նախարարության կողմից ներկայացված պատասխանի՝ նախորդ տարի իրենք ունեցել են 10 արտասահմանյան գործուղում, որին մասնակցել է նախարարության 6 պաշտոնյա: Նախարար Իգնատի Առաքելյանը 2016 թ. ընթացքույմ միայն մեկ արտասահմանյան գործուղում է ունեցել՝ նա նոյեմբերի 5–6–ը եղել է Մոսկվայում Հայաստանից Ռուսաստան ալկոհոլային խմիչքների արտահանման հետ կապված բանակցություններ վարելու նպատակով: Նախարարի այդ գործուղման ավիատոմսը գնվել է 191 հազար 220 դրամով, իսկ ընդհանուր առմամբ գործուղումն արժեցել է 453 հազար 801 դրամ:

Ի դեպ, արդարության համար նշենք, որ սա նախարարության՝ 2016 թ. ամենից էժան գործուղումն է: Մյուս 9–ը գործուղումների արժեքները տատանվել են 650 հազարից մինչև 1 միլիոն 807 հազար դրամի սահմաններում:

Նախարարությունից 2016 թ. ընթացքում երկու անգամ գործուղման մեկնած Արտաքին կապերի վարչության պետ Անդրանիկ Պետրոսյանը հունվարին մեկնել էր Բաղդադ՝ Տնտեսական համագործակցության հարցերով հայ–իրաքյան միջկառավարական համատեղ հանձնաժողովի երրորդ նիստին մասնակցելու նպատակով: Այդ գործուղման ծախսը կազմել է 961 հազար 266 դրամ, որից 409 հազարը ուղղվել է ավիատոմս գնելուն: Երկրորդ անգամ նա գործուղվել էր Աստանա՝ Հայաստանի և Ղազախստանի միջև տնտեսական համագործակցության միջկառավարական հանձնաժողովի 6–րդ նիստին մասնակցելու նպատակով: Այս գործուղման ավիատոմսը արժեցել էր մի փոքր ավելի՝ 430 հազար դրամ, իսկ ընդհանուր գործուղումը՝ 723 հազար 881 դրամ:

Նախկին նախարար Սերգո Կարապետյանի փետրվարին դեպի Նյու Դելի գործուղումը արժեցել է 925 հազար 378 դրամ, որից ավիատոմսը կազմել է 498 հազար դրամ: Վերջինս մեկնել էր Հնդկաստան գյուղատնտեսության բնագավառում հայ–հնդկական համագործակցության ընդլայնման հարցերը քննարկելու նպատակով: Այս գործուղումը ևս մեկ մասնակից է ունեցել՝ նախկին նախարարի ուղեկիցն էր վերջինիս տեղակալ Արմեն Հարությունյանը, ում գործուղման և ավիատոմսի գները նույն արժեքն ունեն, ինչ որ Կարապետյանինը:

Դեպի Նյու Դելի գործուղումից բացի՝ Հարությունյանը նախորդ տարի ևս 3 արտասահմանյան գործուղում է ունեցել: Նա գործուղվել է նաև դեպի Վաշինգտոն, Հանոյ (Վիետնամ) և Վիեննա: Դեպի Նահանգներ հոկտեմբերյան եռօրյա գործուղումը բավական թանկ է արժեցել՝ 1 միլիոն 807 հազար 548 դրամ, որից ավիատոմսի ձեռք բերման համար ուղղվել է 447 հազար դրամ, իսկ մնացած 1 միլիոն 360 հազար դրամն էլ ծախսվել է փոխնախարարի գիշերակացի և սննդի վրա: Ստացվում է, որ Հարությունյանը մեկ օրվա համար պետական բյուջեի միջոցներից միջինում ծախսել է մոտավորապես հազար ԱՄՆ դոլար: Ի՞նչ ասես, ախորժակը տեղն է:

1 միլիոն դրամից ավելի է արժեցել նաև Հարությունյանի դեպի Վիետնամ գործուղումը, որին նա մեկնել էր Եվրասիական երկրների և Վիետնամի միջև ազատ առևտրի համաձայնագրի բանակցությունների մասնակցելու նպատակով: Գործուղման ընդհանուր ծախսերը կազմել են 1 միլիոն 29 հազար 31 դրամ, որից 780 հազար դրամը նախատեսվել է ավիատոմս գնելու համար:

 Շարունակությունը` «Փաստ» օրաթերթի այսօրվա համարում