Քաղցկեղով հիվանդների թվով Լոռու մարզն առաջին տեղում է. «Փաստ»

«Փաստ» օրաթերթը գրում է.

Նորություն չէ, որ ուրբանիզացված երկրներում քաղցկեղով հիվանդների թիվն ավելի մեծ է լինում համեմատած այլ բնակավայրերի: Սակայն այն լինելով բազմաֆակտորիալ հիվանդություն չի կարելի բացառել, որ դրան կարող է նպաստել նաև հանքարդյունաբերական ձեռնարկությունների «ներկայությունը»:

Բազմաթիվ ուսումնասիրություններ փաստում են, որ քաղցկեղով հիվանդների թվով հանրապետության մարզերից Լոռու մարզն առաջին տեղն է գտնվում: Հայտնի է նաև, որ հանքարդյունաբերական ամենախոշոր ձեռնարկությունները գտնվում են հենց այս մարզում: Եվ որքան էլ հանքեր–հիվանդություն հերքող փաստարկներ բերեն, նույնքան էլ կարելի է հակառակը պնդել:

Լոռու մարզի գլխավոր ուռուցքաբան, Վանաձորի բժշկական կենտրոնի ուռուցքաբանական բաժանմունքի վարիչ Նարինե Քալաշյանը նույնպես չի հերքում, որ մարզը չարորակ գոյացությունների հայտնաբերման թվով առաջինն է: Ամենաշատը կրծքագեղձի չարորակ ուռուցք ունեցողներն են, իսկ գինեկոլոգիական և միզասեռական չարորակ ուռուցքների թիվը մի փոքր ավելի պակաս է:

Մասնագետի խոսքով դա պայմանավորված է նրանով, որ կանայք հետազոտվելու համար ավելի հաճախ են դիմում գինեկոլոգիական բաժանմունքներ: Դա թույլ է տալիս վաղ շրջանում խնդիրը հայտնաբերել և բուժման ընթացքում առավել մեծ հաջողությունների հասնել:

«Բացի այդ, կանանց շրջանում բավականին բարձրացել է զգուշավորությունն այդ հիվանդության հանդեպ, և համեմատաբար ավելի վաղ շրջանում ենք կարողանում հայտնաբերել, քան նախկինում էր: Եվ եթե այն ժամանակ միզասեռական օրգանների քաղցկեղի 3–րդ, 4–րդ փուլ էինք հայտնաբերում, ապա ներկայում հիվանդությունը հայտնաբերում ենք 1–ին կամ նախաքաղցկեղային փուլում»,– ասում է Ն. Քալաշյանը:

Խոսելով մարզերում ապրողների ավանդապաշտական մոտեցումների մասին, նա նշեց, որ այսպես ասած՝ «ամոթի դարաշրջանը» վաղուց անցել է, և մարզը աշխարհից կտրված խուլ բնակավայր չէ, որտեղ ապրողները ոչնչից տեղեկություն չունեն:

Բժշկին ավելի հաճախ չդիմելու պատճառը, մասնագետի կարծիքով, մարզի բնակիչների սոցիալական լարված իրավիճակն ու հայ կանանց՝ սեփական խնդիրներին մատերի արանքով նայելն ու ծնողից մինչև երեխա անսահման նվիրվելն է: Եվ այդ է պատճառը, որ հայ կանանց մոտ ավելի ուշ շրջանում է հայտնաբերվում հիվանդությունը:

Խոսելով մարզի բժշկական հաստատությունների բժշկական սարքավորումներով և լաբորատոր հետազոտական միջոցներով հագեցված լինելու խնդրի մասին Ն. Քալաշյանն ասաց, որ ախտորոշման հարցում որևէ խնդիր չի լինում: Խոսելով ստատիստիկ տվյալներով Լոռու մարզն առաջին տեղում լինելու մասին, մարզի գլխավոր մասնագետն ասաց.

«Ճիշտ եք նկատել, նախորդ տարիների ստատիստիկ տվյալներով մեր մարզը հիվանդացության և մահացության առումով առաջին տեղում էր: Ես չեմ կարող դա կապել հանքարդյունաբերության հետ, քանի որ նման հայտարարություն անելու համար պետք է լուրջ ուսումնասիրություն կատարել և հիմնավոր փաստեր ունենալ, բայց ես հիվանդացության բարձր մակարդակն ավելի շատ կապում եմ սոցիալական վատ պայմանների հետ»:

 Շարունակությունը` «Փաստ» օրաթերթի այսօրվա համարում