«Հարուստների մեջ կարող են լինել մարդիկ, ովքեր շատ բան են անում, բայց գերադասում են լռել». «Փաստ»

«Փաստ» օրաթերթը գրում է.

ԱԺ փոխնախագահ Էդուարդ Շարմազանովը վերջերս, մեջբերելով Նժդեհին, Լոռիում հայտարարել էր. «Հայ մեծահարուստները պետք է դատարկեն իրենց քսակները հանուն Հայաստանի: Եթե մենք գնանք այդ ճանապարհով, կունենանք հզոր Հայաստան»: Այս խոսքերին որոշ մեծահարուստ պատգամավորներ մամուլում բացասաբար էին արձագանքել:

Այս առթիվ «Փաստը» մի քանի հարց ուղղեց ՀՀԿ մամուլի խոսնակ Էդուարդ Շարմազանովին:

– Պարոն Շարմազանով, հետաքրքիր է իմանալ, ի վերջո, Նժդեհից ձեր մեջբերում–կոչն արձագանք ունեցա՞վ օլիգարխների շրջանում, և կոնկրետ ֆինանսական ներդրումների տեսքով արձագանք եղա՞վ:

– Ես ֆինանսական ներդրումների կոչ չեմ արել, ես նկատի եմ ունեցել 99 տարի առաջ, մայիսի 24–ին Գարեգին Նժդեհի խոսքը Ղարաքիլիսայի ճակատամարտից առաջ, որտեղ հուսալքություն էր տիրում և Նժդեհը շատ հստակ ներկայացրեց, թե ինչ պետք է անել: Մարդիկ լսելով Նժդեհի կոչը, իրականացրին այդ պատվիրանները, և մենք հաղթեցինք մայիսյան հերոսամարտերը: Հաշվի առնելով հանգամանքը, որ այսօր մենք ունենք անկախ Արցախ և անկախ Հայաստան, բնականաբար Նժդեհի կոչը 99 տարի հետո էլ արդիական է, և կարծում եմ, որ արձագանք գտել է: Իսկ իմ կոչը կապել այսօրվա իրավիճակի, հարկաբյուջետային քաղաքականության հետ, անհեթեթություն է: Ես եթե ուզենամ մեկին բան ասեմ, ուղիղ կասեմ, ոչ թե դրա համար 99 տարի հետ կգնամ:

– Այդ դեպքում իմաստը ո՞րն էր Նժդեհի այդ խոսքերը մեջբերելու: Նաև փաստորեն օլիգարխները մամուլում ասացին՝ մենք դատարկելու բան չունենք:

– Ես նախ որևէ մեկին չեմ ասում, ես ինչ–որ ասել եմ, մեջբերել եմ Նժդեհին, իսկ 99 տարի առաջ ասած խոսքի տակ ստորագրում եմ: Ես ձեզ մի բան ասեմ, բազում են և Հայաստանում և Արցախում ներդրումները, որոնք արվել են ոչ միայն պետական, այլ մասնավոր ներդրումներով:

– Իսկ այսօր մեր օլիգարխների, մեծահարուստների գրպանը բա՞ց է:

– Ես չեմ կարող ասել՝ բաց է, թե փակ է, ես պարտավոր չեմ իմանալ: Հարուստների մեջ կարող են լինել մարդիկ, ովքեր շատ բան անում են, բայց գերադասում են լռել:

– Իսկ միգուցե հայ մեծահարուստներն այսօր մտածում են, որ առանց այդ էլ բավական շատ գումար ծախսեցին այս իշխանության վերարտադրության համար: Գուցե դա է պատճառը, որ չեն արձագանքում կոչին:

– Իշխանության վերարտադրության համար որևէ մեկը գումար չի ծախսել: Իշխանությունն ընտրվել է ժողովրդավարական ընտրությունների արդյունքում, որոնք գնահատված են եվրոպական բոլոր միջազգային դիտորդների կողմից:

– Ընտրակաշառք բաժանելու դեպքեր չե՞ն եղել:

– Մասսայական ընտրակաշառքի դեպքեր չեն եղել, իսկ ով ընտրակաշառքի դեպք կարող է նշել–ասել, թող դիմի դատական ատյաններին: Իսկ էն որ շատ ունեցողը պիտի շատ տա՝ անվիճելի է: Ես օլիգարխներից մի բան եմ լսել, որ Հայաստանի համար ոչ միայն քսակը, այլև կյանքը կտան և ողջունում եմ: Կյանք տալ պետք չի Հայաստանի համար, արժե ապրել, բայց քսակը միշտ բաց պահել:

Շարունակությունը` «Փաստ» օրաթերթի այսօրվա համարում