Հայաստանի հարևաններ Իրանի և Ադրբեջանի հարաբերություններում լարվածությունը օրեցօր աճում է
Ադրբեջանական լրատվամիջոցների հաղորդմամբ, այսօր Բաքվում փակել է Հուսեյնիա մզկիթը և այնտեղ գտնվող Իրանի գերագույն հոգևոր առաջնորդ Սեյիդ Ալի Խամենեիի ներկայացուցչի գրասենյակը: Լուրը հաստատել է նաև Ադրբեջանի ներքին գործերի նախարարությունը՝ պարզաբանելով, թե այս որոշումը պայմանավորված է համաճարակային իրավիճակի վատթարացմամբ:
Մյուս կողմից Իրանը փակել է իր օդային տարածքը ադրբեջանական ռազմական ավիացիայի համար: Ադրբեջանական մամուլը, հղում անելով իրենց ռազմական աղբյուրներին, հայտնում է, որ Իրանը ադրբեջանական կողմին արգելել է օդային ճանապարհով զինամթերքի մատակարարումը դեպի Նախիջևան:
Վերջին օրերին պաշտոնական Բաքուն և Թեհրանը փոխադարձ մեղադրանքներ են հնչեցնում: Իրանի գերագույն հոգևոր առաջնորդը, ապա նաև երկրի արտգործնախարարը հայտարարում են, թե չեն հանդուրժի սիոնիստների և ահաբեկիչների ներկայությունն իրենց սահմանների անմիջական հարևանությամբ:
Ի պատասխան, Իլհամ Ալիևը նախօրեին Ադրբեջանի վերահսկողության տակ անցած տարածքներ այցի ժամանակ զգուշացրել է Իրանին՝ չխառնվել իրենց ներքին գործերին. - «Ադրբեջանը անկախ արտաքին քաղաքականություն է վարում, մենք ենք որոշում, թե որ երկրի հետ ինչ մակարդակի հարաբերություններ ունենանք: Մենք պահանջում ենք հարգել մեր ինքնիշխանությունը և չմիջամտել մեր ներքին գործերին: Մեզ ուղղված մեղադրանքները պետք է ապացուցվեն հստակ փաստերով: Թող գան և այստեղ օտարերկրացիներ գտնեն»:
Ալիևը խոստացել է անպատասխան չթողնել Իրանից հնչող մեղադրանքերը:
Միմյանց ուղղված սպառնալիքներին զուգահեռ կողմերը նաև զինուժի ցուցադրություն են սկսել: Արդեն մի քանի օր է Ադրբեջանի հետ սահմանին Իրանը լայնածավալ զորավարժություններ է անցկացնում, այսօր էլ Նախիջևանում համատեղ վարժանքներ են սկսել Ադրբեջանի և Թուրքիայի զինված ուժերը:
Թուրքիան ևս ուշադրությամբ հետևում է Իրանի հյուսիս-արևմտյան շրջաններում շարունակվող զորավարժություններին: Թուրքական մամուլում գրում են, թե Իրանը խիստ մտահոգված է Ղարաբաղյան պատերազմից հետո Հարավային Կովկասում Թուրքիայի դերի մեծացմամբ և ամեն կերպ փորձում է կանխել տարածաշրջանային միջանցքների բացման ծրագիրը՝ Ադրբեջանի ուղիղ կապը Նախիջևանի հետ:
Independent-ի թուրքական ծառայությունը գրում է, թե Իրանը մտավախություն ունի կորցնել տնտեսական և ռազմավարական կարևորությունը այս տարածաշրջանում, եթե բացվի Զանգեզուրի միջանցը և կարգավորվեն Ադրբեջանի ու Թուրքիայի հարաբերությունները Հայաստանի հետ։
Բացի այդ, Իրանը նաև էթնիկական խնդիր ունի ի դեմս թյուրքալեզու ազգաբնակչության: Իրանցի քաղաքագետ Էհմեդ Հաշեմին «Ազատության» ադրբեջանական ծառայությանը տված հարցազրույցում պատահական չի համարել, որ Իրանը զորավարժություններ է անցկացնում այն տարածքում, որտեղով անցնելու է այսպես կոչված Զանգեզուրի միջանցքը. - «Իրանի ցամաքային զորքերի հրամանատարը ասել է, որ Զանգեզուրի կարգավիճակի փոփոխությունն ու ճանապարհների բացումը իրենց համար կարմիր գիծ են հանդիսանում: Եթե գործարկվի այդ միջանցքը, թյուրքական աշխարհի, Թուրքիայի և Ադրբեջանի միջև կապը ավելի կսերտանա, հարաբերությունները կընդլայնվեն: Իրանի ամենամեծ վախն ու մղձավանջը Հարավային Ադրեջանն է, որտեղ գնալով աճում են ազգայնական տրամադրությունները: Եթե բացվի Զանգեզուրի միջանցքը, իրենց խոսքով՝ Թուրքիայի ոտքը դեպքի Կովկաս և Հյուսիսային Ադրբեջան, գնալով կակտիվանան անջատողական շարժումները Հարավային Ադրբեջանում: Այդ սահմանային հատվածում զորքերի տեղակայումը բարոյական աջակցություն է Հայաստանին»:
Հաշեմիի կարծիքով, Իրանին անհանգստացնում է Ղարաբաղյան պատերազմից հետո տարածաշրջանում ուժերի հավասարակշռության խախտումը:
Какой армянский деятель стал членом комиссии при президенте РФ? «Паст»
Завершился международный шахматный турнир, организованный при поддержке IDBank
Актриса Джульетта Степанян удостоена премии «Белый слон»
Чья кандидатура будет выдвинута на пост президента Союза армян России? «Паст»
Ваге Овеян разгромил соперника и стал чемпионом Европы по греко-римской борьбе
Европейские обещания на фоне закрытых дверей: «Паст»
На Евразийском экономическом форуме в Астане ожидается рекордное число участников
Великая Победа и великий подвиг армянского народа. Арман Варданян
Здание семинарии было возвращено армянской епархии при поддержке Самвела Карапетяна: «Паст»
BBC: Звучит как угроза: Путин за месяц до выборов напомнил Армении об Украине
