26–ամյա Սեդրակ Զատիկյանի պատվիրված սպանության դատաքննության փուլն ավարտվել է. «Փաստ»

«Փաստ» օրաթերթը գրում է.

Մալաթիա–Սեբաստիա վարչական շրջանի ընդհանուր իրավասության դատարանում ավարտվել է ԵԿՄ Մալաթիա տարածքային կառույցի նախկին նախագահ, 2006 թ.–ին հենց համայնքի կենտրոնում ինքնաձիգի կրակոցներից սպանված 26–ամյա Սեդրակ Զատիկյանի գործով մեղադրվող՝ սպանության 2–րդ «պատվիրատու» Նարեկ Խաչատրյանի մասով դատաքննության փուլը: Դատական հաջորդ նիստում դատարանը լսելու է կողմերի ճառերը և ամբաստանյալի վերջին խոսքը, որից հետո կհրապարակվի վիճիռը:

Նշենք, որ խոսքը Մալաթիա–Սեբաստիա համայնքի նախկին թաղապետ, ԱԺ պատգամավոր, լուսահոգի Վահան Զատիկյանի երկու որդիների՝ Սեդրակի և Անդրանիկի սպանությունը 100000 դոլարով պատվիրելու մեջ մեղադրվող Նարեկ Խաչատրյանի մասին է:

Այս գործով դատապարտված է ԱԺ նախկին պատգամավոր Հակոբ Հակոբյանի եղբորորդին՝ 33–ամյա Ստեփան Հակոբյանը. նա 15 տարվա ազատազրկման է դատապարտվել որպես սպանության պատվիրատու:

Մեղադրող դատախազ Վահագն Պողոսյանը նախորդ նիստում միջնորդել էր հարցում ուղարկել ոստիկանությանը՝ պաշտպանված վկա Ահարոն Հակոբյանին հայտնաբերելու, ով բացակայում է հանրապետությունից: Այս վկային գաղտնազերծել էին սպանության մյուս պատվիրատու Ստեփան Հակոբյանի դատավարության ընթացքում՝ չնայած նա իրավապահներին խնդրել էր չառերեսել իրեն մեղադրյալների հետ՝ զգուշանալով հնարավոր հետևանքներից:

Ըստ քրգործի նյութերի՝ վկա Ահարոն Հակոբյանը մաքսային ծառայության մի պաշտոնյայի ուղեկցությամբ սպանության պատվերի գումարի մի մասը վերցրել էր պատվիրատուներ Ստեփան Հակոբյանից և Նարեկ Խաչատրյանից ու սպանությունից ժամեր անց տարել–տվել էր մարդասպանին:

Գործով մյուս վկան՝ Արամ Արամյանը ինքնասպան է եղել անհասկանալի հանգամանքներում՝ այդպես էլ չհասցնելով ցուցմունք տալ դատարանում: Չի բացառվում, որ այս հանգամանքն է նաև պատճառը, որ Ահարոն Հակոբյանը հեռացել է Հայաստանից:

Մեղադրյալի միջնորդությանն ի պատասխան դատավորը հրապարակեց համապատասխան մարմնից ստացված գրությունը. ըստ այդմ՝ վկան Հայաստանի Հանրապետության սահմանը հատել է 07.01.2015 թ.–ին՝ «Զվարթնոց» օդանավակայանից և մինչ օրս չի վերադարձել: Ամբաստանյալ Նարեկ Խաչատրյանի պաշտպանը հիշատակեց ՄԻԵԴ–ի, Վճռաբեկ դատարանի ևս 2 նախադեպային որոշում վկային չհարցաքննելու հետևանքների մասին, որոնց մեկ անգամ ևս հակադարձեց տուժողի իրավահաջորդի ներկայացուցիչ Վաղարշակ Գևորգյանը՝ նշելով, որ Ահարոն Հակոբյանը միակ առանցքային վկան չէ, և որ նրա ցուցմունքները հիմնավորվել են նաև այլ ապացույցներով:

Պաշտպանը դատարանին ներկայացրեց ամբաստանյալ Նարեկ Խաչատրյանի վերաբերյալ խնդրագիրն ու բնութագիրը՝ ստացված «Բարեգործ» ՀԿ–ից և ամբաստանյալի 6 հարևաններից: Նրանց ձևակերպմամբ՝ Նարեկը խելոք, մեծերին, փոքրերին հարգող, ծնողների կողմից սիրված երիտասարդ է, օգնել է հաշմանդամներին, սոցիալապես անապահով ընտանիքների:

Հասարակական հնչեղություն ունեցող այս դատական գործով հաջորդ նիստը տեղի կունենա մայիսի 30–ին:

Նշենք, որ 26–ամյա Սեդրակ Զատիկյանի հայրը` Վահան Զատիկյանը մահացել է 1999 թ.–ի հոկտեմբերի 7–ին: Պաշտոնական վարկածով վերջինս մահացել է սրտի կաթվածից:

Իսկ Զատիկյանի ավագ որդին` Սեդրակ Զատիկյանը սպանվել էր 2006 թ. հունիսի 22–ին Երևանի Սեբաստիայի և Տիչինայի փողոցների խաչմերուկում, անհայտ անձը ԱԿ–74 տիպի ինքնաձիգից կրակահերթ է արձակել «Մերսեդես» մակնիշի ավտոմեքենայի վրա, որի հետևանքով վարորդ, 31–ամյա Սեդրակ Վահանի Զատիկյանը վիրավորվել է և հիվանդանոցի ճանապարհին մահացել:

Նույն վայրում կրակոցներից մահացել է անցորդ, 37–ամյա, 3 երեխաների մայր Կարինե Սարգսյանը: Իսկ Մալաթիա–Սեբաստիա վարչական շրջանի Մեծարենցի 58 հասցեի մոտ 2013–ի հունվարի 13–ին՝ ժամը 7:00–ի սահմաններում հայտնաբերվել է 31–ամյա Անդրանիկ Վահանի Զատիկյանի դին:

Շարունակությունը` «Փաստ» օրաթերթի այսօրվա համարում