«Հայաստան» դաշինքի հետ գնում եմ խորհրդարան, որ մեր երկրում օր առաջ փոխվի իշխանությունը, նոր պատերազմ չլինի, նորից տղերք չզոհվեն, գնում եմ պարզելու ճշմարտությունը՝ սերունդների համար. Նազարյան

Tert.am-ը հրապարակում է «Այլընտրանքային նախագծեր» խմբի անդամ, «Հայաստան» դաշինքի անդամ Գեղամ Նազարյանի՝ «Ես «Հայաստան» դաշինքի հետ գնում եմ խորհրդարան, որ մեր երկրում օր առաջ փոխվի իշխանությունը» վերտառությամբ հոդվածը:

Հերոսների ծնողներ, քույրեր, եղբայրներ, ինձ հարազատ դարձած ընտանիքներ. Ձեր քվեով եւ Ձեր թույլտվությամբ  երկուշաբթի օրը որպես ԱԺ պատգամավոր գնալու եմ նիստի։

Ես գնում եմ պարզելու ճշմարտությունը, պարզելու, թե ինչու եղավ պատերազմը, թե ինչու զոհվեցին մեր տղերքը, թե ինչու չկանխվեց պատերազմը, թե ինչու էր Նիկոլը բանակցությունները սկսում զրո կետից՝ դրանով տապալելով խաղաղ բանակցությունները, թե ինչու էր Մակունցն ասում, թե Թուրքիան չի միջամտի պատերազմին, երբ բայրաքթարները իրենց թուրք մասնագետներով արդեն մեր տղերքի երկնքում էին։

Ես գնում եմ պարզելու ճշմարտությունը՝ սերունդների համար: Ես «Հայաստան» դաշինքի հետ գնում եմ խորհրդարան, որ մեր երկրում օր առաջ փոխվի իշխանությունը, որ նոր պատերազմ չլինի ու նորից տղերք չզոհվեն: Ես գնում եմ պայքարելու։

Ես չեմ լինելու կոնյունկտուրային պատգամավոր, որը պետք է պահպանի համընդհանուր պառլամենտարիզմի կանոնները: Չեմ լինելու ստվերային գործարքների մաս: Պայքարելու եմ՝ բացառելով իրավիճակին հարմարվելու որեւէ տարբերակ:  

«Այլընտրանքային նախագծեր խմբի» շրջանակներում մենք աշխատում ենք մի շարք հետաքրքիր օրենսդրական նախաձեռնությունների, առաջարկությունների վրա, որոնք կներկայացվեն առաջին հերթին Ձեզ՝ ինձ հարազատ ընտանիքներ, իմ քույրեր եւ եղբայրներ։ Դրանք սեպտեմբերից դառնալու են հանրային օրակարգի մաս։

«Ճշմարտություն սերունդների համար»  նախաձեռնության շրջանակներում, ինչպես եւ խոստացել էի, գործարկվելու է մեր տղերքին, մեր հերոսներին ու մեզ համախմբող հարթակը՝ www.imheros.am -ը։

Ավելին․․․