Անապահով խավն այսուհետ կստանա պատշաճ հիվանդանոցային բուժօգնություն. «Փաստ»

«Փաստ» օրաթերթը գրում է.

Մեր երկրում պետբյուջեով առողջապահության ոլորտին տրամադրվում է 85 մլրդ դրամ գումար, որից 67–ը բաժին է հասնում բժշկական օգնության կազմակերպմանը: Այդ գումարից էլ 27 մլրդ–ը տրամադրվում է առաջնային օղակին, իսկ 40 մլրդ–ը՝ հիվանդանոցային ծառայություններին:

Ոլորտի ֆինանսական վերահսկողության և պետական բյուջեից հատկացվող միջոցներն առավել նպատակային և հասցեական ծախսելու համար նախարարությունը մշակել է ֆինանսավորման մեխանիզմների բարելավման ժամանակացույց, ըստ որի՝ մայիսի վերջին կառավարության հաստատմանը կներկայացվի մոտ 100 հազար պետական ծառայողի հիվանդանոցային բժշկական ծառայությունների ապահովագրական փաթեթների տրամադրման մեխանիզմները։

Հունիսի վերջին էլ Առողջապահության նախարարությունը ՀՀ կառավարության հաստատմանը կներկայացնի 612 հազար սոցիալապես անապահով բնակիչների համար հիվանդանոցային բժշկական ծառայությունների ապահովագրական փաթեթների հարցը: Եվ չնայած այդ համակարգը կսկսի գործել 2018 թվականի սկզբից, սակայն հույս կա, որ մոտ ապագայում արդեն պետական բյուջեի գումարներն ավելի համակարգված ձևով կուղղվեն սոցիալապես անապահով խմբերի բուժմանը, որով անապահով խավը կստանա պատշաճ հիվանդանոցային բուժօգնություն:

Բժշկական ծառայությունների որակի բարելավմանը կնպաստի նաև էլեկտրոնային առողջապահական համակարգի ներդրումը, իսկ պետական պատվեր իրականացնող 490 բուժհիմնարկների ֆինանսավորումը մայիսի 1–ից արդեն իրականացվում է համակարգ ներմուծվող տվյալների հիման վրա։ Հաջորդ փուլում գրանցումներ կսկսեն կատարել բոլոր բժշկական հաստատությունները և դեղատները։ Մշակվել են նաև էլեկտրոնային առողջապահական համակարգի հետագա զարգացման մի շարք այլ ուղղություններ նույնպես, այդ թվում` առցանց հերթագրում, հեռաբժշկության ներդրում և այլն։

Առաջին անգամ նախատեսվում է ներդնել պետպատվերի շրջանակներում բժշկական կազմակերպությունների կողմից գնվող դեղերի և բժշկական նշանակության ապրանքների գնումների կենտրոնացված համակարգ։ ՀՀ կառավարության որոշմամբ կկարգավորվեն բժշկական սարքերի և սարքավորումների պետական գրանցումը, կհաստատվեն դրանց անվտանգության, որակի ու արդյունավետության փորձաքննության կանոնները:

Առանձին բժշկական ծառայությունների հասանելիությունն ապահովելու նպատակով Առողջապահության նախարարությունում մշակվել և իրականացվում են թիրախային ծրագրեր: Մասնավորապես՝ հեպատիտ Ց–ով շուրջ 1000 հիվանդի բուժումը կազմակերպվում է ժամանակակից արդյունավետ դեղերով։

Ինչ վերաբերում է պացիենտ–բժիշկ–բուժհաստատություն փոխհարաբերությունների ընթացքում ծագող վեճերի արագ և արդյունավետ քննության իրականացմանը, ապա աշխատանքներ են տարվում բժշկական հաշտարարի ինստիտուտ ներդնելու ուղղությամբ։

Իրականացվում, ինչպես նաև նոր ծրագրեր են մշակվում ողջ աշխարհում մահացության հիմնական պատճառ հանդիսացող ոչ վարակիչ հիվանդությունների կանխարգելման, վաղ հայտնաբերման և արդյունավետ բուժման համար: Շարունակվում են արգանդի վզիկի քաղցկեղի, զարկերակային գերճնշման, շաքարային դիաբետի վաղ հայտնաբերման սկրինինգային ծրագրերը։ Ձեռքբերումներ են արձանագրվում վարակիչ հիվանդությունների կառավարման, համաճարակաբանական հսկողության, պատվաստումների որակի և անվտանգության բարելավման արդյունքում։ 17 հիվանդության դեմ իրականացվող 14 պատվաստման բարձր ընդգրկվածության շնորհիվ մահացության ընդհանուր կառուցվածքում վարակիչ հիվանդություններից մահացությունը չի հասնում 1%–ի:

Շարունակությունը` «Փաստ» օրաթերթի այսօրվա համարում